2 Jaxca junoj an xumac teꞌ tol tocꞌal chi poꞌoeloj catuꞌ chi tajtoj, queytuꞌ keocoj; jun txolan chi ecꞌ el cu kꞌinal catuꞌ chi cu qꞌueya jaxca junoj enele.

3 Jaach jin Diosal, ¿tzet yuxan cha waoc ja sat win yutol naꞌbꞌa ánima jin? ¿tumi cha woche cha naꞌoc win an?

4 ¿Tumi ey mactxequel chi skeꞌ yiꞌon el junoj watxꞌ xol ebꞌ man watxꞌoj snaꞌbꞌal?

5 Yutol jaach tiꞌ, cha wakꞌ skꞌinal junjun ánima, txequelne yeoc jantaj sbꞌisil cꞌu chi yilaꞌ, ¿macto wal oj skeꞌ sqꞌuexon ecꞌoj?

6 Iꞌel ja sat win yet chin cancan yin tzalacꞌulal, masantaꞌcꞌal chi lawi scꞌual jaxca yet chi lawi smulna junoj maan yin smulnail.

7 Jaꞌ yet chi tzokꞌle a junoj teꞌ teꞌ, chito wal skeꞌ swoli.

8 Caxcꞌal mi caw ichamxa xeꞌ teꞌ, caxcꞌal lalanxa skꞌaꞌtoj teꞌ skꞌoal tuꞌ sat txꞌotxꞌ,

9 jaꞌ yet chi ey apnoj siical jaꞌ jaꞌ yin, jaxa yaaxbꞌi a tuꞌ; catuꞌ chi aol swol, jaxca wal junoj bꞌocꞌan awo tol to chi awlei.

10 Jal jaon ánima jon tiꞌ, jaꞌ yet chi cu cami junelne chi cu qꞌueya jon, ¿cꞌamxa bꞌey chi il-le oc kin junelxa jon?

11 Jaxca chi yun stantoj jaꞌ naabꞌ jaꞌ, cꞌal jaꞌ mimej jaꞌ,

12 queytuꞌ chi yun cu cam jaon ánima jon tiꞌ, cꞌamxa bꞌakꞌin chi cu waan jon. Jaꞌ yet eyto cꞌal ecꞌ jun satcan tiꞌ, cꞌam tocꞌal mac oj eltej bꞌey mujan octoj, cꞌam tocꞌal mactxequel oj eltej bꞌey eyoctoj tuꞌ.

13 Toloj wal chin ja webꞌa el tet camich, yajbꞌan chi ecꞌtoj sjowal ja cꞌul. Cha naꞌon pax oj bꞌakꞌin chin ja naꞌtej.

14 Ta chi cam junoj ánima ¿oj mi pitzcꞌu a junelxa? Jain tiꞌ oj wechbꞌane cꞌal bꞌakꞌin oj jul scꞌual jin jajcha eloj.

15 Jaꞌ yet oj jaach awoj ey jin, oj jin takꞌwoj ey jaach; oj mi jaach tzala a yet oj ja wilon oc win, yutol jaach jix jin ja waꞌne.

16 Jaꞌ tinaniꞌ, tꞌanan jaach cꞌal oc yin jin bꞌeybꞌal. Jal yet jun cꞌual tuꞌ, manxa oj jin ja wakꞌ cuenta yin jin penail.

17 Oj ja wakꞌ mimancꞌulal win, catuꞌ oj toj qꞌueycꞌulal jin penail ja wu, yet chin cancan yin watxꞌil ja sattaj.

18 Ilaꞌ tax junoj txꞌotxꞌ mimej eltzabꞌ chi kꞌajletoj steꞌal, chi lawi eyoj, catuꞌ chi too bꞌal-labꞌoj chꞌen mimej chꞌen bꞌey ey cꞌaltaꞌ eyoj.

19 Jacꞌalaꞌ pax chꞌen chꞌen yetoj txꞌotxꞌ chi ijletoj yu jaꞌ jaꞌ, chi ulitoj masanil yu jaꞌ, catuꞌ chi lawi eyoj. Queytuꞌ chi yun ja wakꞌon lawoj ey jantaj tzet eyoc yipoj cu cꞌul jaon ánima jon tiꞌ.

20 Jaach chi skeꞌ jon ja wakꞌon lawoj ey yin junelne, jaach cha wiꞌel cu kꞌinal, catuꞌ chi cu toocan bꞌey chi cu mujle can eytoj jon.

21 Jaꞌ ebꞌ kuninal yet bꞌakꞌin jon, ta jaxa ebꞌ oj bꞌinale oj, ma tol caw yeynajil oj utele ebꞌ xin, jaꞌ jun tuꞌ manxa kotajoj jon.

22 Asanne cu yaꞌilal yul ket kotaj jon, asanne cu bꞌiscꞌulal yul ket yuxan chi cu okꞌ jon, ẍi naj Job.