3 Man tucꞌal oj chi kꞌanabꞌi, tam wal chi skꞌanbꞌalne naꞌbꞌale cꞌam yopiso.

4 Jaach Job, jix ja walaꞌ tol cꞌam yeloc apnoj xiwcꞌulal tet Dios, man pax sowaliloj chi kiꞌey cu bꞌa tet.

5 Yu ja penail tuꞌ, yuxan queytuꞌ cha wute kꞌanabꞌ ja bꞌa, cha woche cha wiꞌeytej cu sat yu ja kꞌane tuꞌ.

6 Manche ja naꞌ tol jain oj walatej ja penail tuꞌ, jacꞌal oc ja kꞌane tuꞌ oj akꞌon low ja win.

7 ¿Chim ja naꞌ tol jaach bꞌabꞌel alinaj jaach? Tumi ey jaachxa ecꞌ yet jix txeclo a txꞌotxꞌ mimej wonanlaj.

8 ¿Tumi jaach oj ja wakꞌ snaꞌbꞌal Dios tzet oj yunne? Tumi asanne jaach jelan jaach bꞌey yul yibꞌankꞌinal tiꞌ cha naꞌ.

9 ¿Masanil tzet ja wotaj jaach tiꞌ, kotaj pax jaon tiꞌ jon?

10 Jaꞌ cu jelanil jaon tiꞌ, jix cu cuy yintaj ebꞌ icham winaj sajxa xil sjolom, ebꞌ tol icham winajxa yintaj naj ja mam jaach tiꞌ.

11 Jaꞌ Dios chi yoche chi yakꞌ smimanil ja cꞌul yetoj cꞌununi kꞌane chi yun kalon ey jaach, ¿tzet yuxan cꞌam cha chaꞌ ja wabꞌe?

12 ¿Tzet yuxan cha wiꞌel ja bꞌa scꞌatan Dios, caw chi cajbꞌi el yul ja sat stit ja jowal?

13 ¿Tzet yuxan chi tit sjowal ja cꞌul yin Dios, comon xacꞌal cha wal junoj kꞌane yin Naj?

14 ¿Tumi ey junoj ánima caw watxꞌ xacꞌal sbꞌeybꞌal? ¿Tumi ey junoj cꞌamxa cꞌal niꞌoj spenail chi oqui?

15 Ilaꞌ tax ebꞌ ángel man eyoj oc ebꞌ yipoj scꞌul Dios, tam wal satcan tol watxꞌ xacꞌal yul sat Naj.

16 Jajxa tam wal jaon ánima jon tiꞌ, ¿tumi ey niꞌoj cu watxꞌil? Caw yaabꞌetaj jon. Bꞌejan xacꞌal cu cꞌul kunen spenail, jaxca chi yun kuqꞌuen eytoj jaꞌ.

17 Abꞌ wal tzet oj wal jaach Job, jaꞌ niꞌoj tzet wotaj an, jaꞌ oj wal ey jaach.

18 Jaꞌ ebꞌ ey snaꞌbꞌal jix jin cuyoni, jaꞌ ebꞌ tuꞌ jix cuywi can ebꞌ yintaj yichmam.

19 Jaꞌ ebꞌ ichmame tuꞌ asan tet ebꞌ jix akꞌle can txꞌotxꞌ txꞌotxꞌ tuꞌ, yuxan man calan oj yeoc ebꞌ yetoj ebꞌ txꞌoj conobꞌal.

20 Jaꞌ ebꞌ ánima caw pena sbꞌeybꞌal txenne chꞌan skꞌinal ebꞌ, caw yin syaꞌtajil chi yun yecꞌ yu ebꞌ.

21 Jaꞌ yet chi yabꞌen sbꞌilwi junoj tzetyetal ebꞌ, caw chi xiwa ebꞌ. Jaꞌ yet cꞌamxa tzetyetal chi snaꞌ ebꞌ, jaxa sjul pax ebꞌ elkꞌom yelkꞌanentoj masanil stzetyetal ebꞌ.

22 Cꞌamxa tzet eyoc yipoj scꞌul ebꞌ, yet chi colcha el ebꞌ xol kꞌejkꞌinal; caw tꞌanan xacꞌal oc chꞌen nawax yin ebꞌ yet chi akꞌle cam ebꞌ.

23 Jaꞌ noꞌ miij oj chiꞌon eytoj smimanil ebꞌ. Yotaj ebꞌ tol cꞌam chi ecꞌtoj tzetyetal oj tit yibꞌan ebꞌ.

24 Jaꞌ syaꞌilal cꞌal bꞌiscꞌulal, jaꞌ chi akꞌon xiwa ebꞌ, jaxca chi yun cu xiwa sattaj junoj yaaw chi jul yakꞌ jowal ketoj.

25 Queywal tuꞌ chi yun sjul yibꞌan mactxequel tol chi yiꞌa skꞌabꞌ yin Dios, ebꞌ chi stecꞌbꞌa sbꞌa sattaj Naj tol ey yipal yibꞌan masanil tzetyetal.

26 Jaxca tol chi yaoc majbꞌal sat julbꞌal ebꞌ sattaj, yet chi too yakꞌon jowal ebꞌ yetoj Dios snaꞌoni.

27 Caw bꞌakꞌech ebꞌ, caw miman sbꞌaley smimanil ebꞌ.

28 Jaꞌ sconobꞌ ebꞌ bꞌey caan oj lawoj eyoj, cꞌamxa mactxequel caan yul-laj na. Caw tzꞌinini xacꞌal oj yun canoj, jaxca xacꞌal bꞌey chi too bꞌulan kꞌalem.

29 Man mimanoj tiempo oj yakꞌ tzalabꞌoj scꞌul ebꞌ yetoj sbꞌeomal, man mimanoj tzet oj swaꞌne ebꞌ sat xꞌotxꞌ.

30 Manxa oj skeꞌ scolon sbꞌa ebꞌ xol kꞌejkꞌinal. Laan xacꞌal oj yun ebꞌ jaxca junoj bꞌocꞌan teꞌ awbꞌeal teꞌ, tol chi tzꞌaꞌtoj swol yu kꞌakꞌ. Oj akꞌle lawoj el ebꞌ yu skꞌane Dios yetoj sjowal scꞌul.

31 Cꞌam ojabꞌ chi yetne sbꞌa ebꞌ yaon oc snaꞌbꞌal yin tzetyetal cꞌam yeloc apnoj, yutol cꞌam yeloc apnoj tzet oj ẍaꞌ spajtzebꞌaloj ebꞌ.

32 Oj cam ebꞌ yet cꞌamto chi aapnoj stiempoal, cꞌamxa bꞌey oj bꞌinale ecꞌ ebꞌ junelxa.

33 Laan xacꞌal oj yun can ebꞌ jaxca junoj an uva tol chi iꞌle el sat yet cꞌamto chi kꞌanbꞌi eloj, ma jaxca junoj teꞌ xumac olivo tucꞌal chi pujeloj.

34 Jaꞌ ebꞌ ánima pena sbꞌeybꞌal, cꞌam yicꞌaal ebꞌ oj chꞌibꞌ can aoj. Jaꞌ jantaj bꞌeomal jix yiꞌ ebꞌ yin tumin jix ẍaꞌ yin ewantajil, tucꞌal oj tzꞌaꞌcantoj yetoj sna ebꞌ.

35 Jaꞌ ebꞌ tuꞌ, asan cꞌal spenail naꞌbꞌil yu ebꞌ, chi yoche ebꞌ chi jul syaꞌtajilal yibꞌan wanojxa yet animail; asanne yin wan tuꞌ eyoc snaꞌbꞌal ebꞌ, ẍi naj Elifaz.