3 ¿Tumi cꞌam slawubꞌal wan je kꞌane cꞌam yeloc apnoj tuꞌ che naꞌ? ¿Tzet chex ioni, yuxan jacꞌalaꞌ cꞌal je pajtzen ey jin?

4 Toloj wal jaex tiꞌ queytuꞌ je yeoc jaxca weoc tiꞌ, chim skeꞌ cꞌal pax jin kꞌanabꞌ jaxca je kꞌanabꞌ tuꞌ. Caw mi chin yum jin jolom yet chex jin cuyoni, catuꞌ chi walon mimanoj kꞌane ey jex.

5 Jajxa xin, kꞌane mi yet iptzebꞌal chi wal ey jex yu je mimancꞌulnele xol je yaꞌilal.

6 Man yu oj chin kꞌanabꞌi catuꞌ chi oc tucan jin yaꞌilal, man yu oj tol chin tzꞌini eyoj, catuꞌ chi oc tucan chi wabꞌe.

7 Jaꞌ Dios chi akꞌon lawoj ey wip; jix yiꞌon el masanil ebꞌ wuninal cꞌal ebꞌ jin watxꞌil ánima.

8 Jaxca tol ey jin oc preso yu. Tzꞌuumtaj xacꞌal yoc jin mimanil, yuxan chi yal ebꞌ ánima tol penawom jin, caw pena kꞌane cꞌal chi yal ebꞌ win.

9 Jaꞌ Dios chin ujten ecꞌ yetoj sjowal scꞌul, yet chin qꞌueyle el yu, ian xacꞌal chin yakꞌ cam Naj jaxca chi yun junoj noꞌ xol-laj teꞌal noꞌ. Caw chi oc xacꞌal tꞌanan win jaxca xacꞌal tol jin cajat jin bꞌa yetoj.

10 Jantaj ebꞌ ánima chi syambꞌa sbꞌa yet chin sbꞌuchon ebꞌ; chi smakꞌontoj jin sat ebꞌ, caw yeynajil chin yute ebꞌ.

11 Jaꞌ Dios jix jin aon oc yul skꞌabꞌ wan ánima pena snaꞌbꞌal.

12 Ey jin wal oc yin tzalacꞌulal catuꞌ jix oc yubꞌna Dios yin jin nukꞌ, jix jin makꞌle wejcha yu, jix jin yaon oc sattaj sjulbꞌal.

13 Yal cꞌal bꞌeytuꞌ chi julwatej win; chi ecꞌ el sjulbꞌal tuꞌ yul-laj jin mimanil, cꞌamxa cꞌal chi okꞌ scꞌul win. Sajleminaj xacꞌal chi yun cantoj yul jin cꞌul yu bꞌey sat txꞌotxꞌ.

14 Yasquiltaj xacꞌal jix wuncantoj yu; jix oc xacꞌal win jaxca junoj soldado caw jelan yakꞌon jowal.

15 Caw chin yakꞌ cus sicꞌlebꞌil, jix waon oc an eel pichile yet cuscꞌulal, cꞌamxa niꞌoj wopiso.

16 Caw chi mal jin sat yu okꞌil; kꞌejtaninaj xacꞌal chi wilaꞌ.

17 Queywal tuꞌ weocoj, caxcꞌal mi cꞌam mac jix wetne, watxꞌ cꞌal chi yun jin txali.

18 Cꞌam ojabꞌ chi majchele el jantaj syaꞌilal jix ale oc wibꞌan tiꞌ an, cꞌam ojabꞌ chi majchele el jin txa yu txꞌotxꞌ txꞌotxꞌ yet chin kꞌanon scolwal Dios.

19 Jaꞌ jun mac eyoc jin testigooj, jatuꞌ eyecꞌ bꞌey satcan, jatuꞌ ey jun chi aon oc jin tiꞌ, catuꞌ chin scolon pax eloj.

20 Jain tiꞌ caw chin okꞌ sattaj Dios, yutol jaꞌ ebꞌ jin watxꞌil ánima tucꞌal chi bꞌuchwa ebꞌ win an.

21 Eyoj wal junoj mactxequel chi kꞌanabꞌ sattaj Dios yu jin watxꞌiloj, jaxca chi yun cu kꞌanabꞌ sattaj junoj ánima yu swatxꞌiloj junojxa ket animail.

22 Jain tiꞌ, jayebꞌxane abꞌil ey jin ecꞌoj, yutol lalanxa sjul scꞌual jin cami, jaꞌton tituꞌ cꞌamxa bꞌakꞌin oj jin meltzotej.