2 Asan ebꞌ bꞌuchwawom joyan oc win, masanil tiempo chin txꞌemle cus yu ebꞌ, cꞌamxa chi skeꞌ jin colon jin bꞌa tet ebꞌ.

3 Jaach jin Diosal, chi skeꞌ ja takꞌwi ey jin yet chin kꞌanon ja colwal; yutol cꞌamxa junoj mactxequel oj skeꞌ scolwa wetoj.

4 Jaach jix ja majche el sjelanil ebꞌ chi jowi oc win, yuxan manche jin ja chaꞌ eyqꞌuey yul skꞌabꞌ ebꞌ.

5 Ta ey mac chi yakꞌ penacꞌulal yin swatxꞌil ánima yu tumin, jaxa yuninal ebꞌ oj abꞌen syaꞌil.

6 Jaach jin Diosal, jaach jix ja wakꞌ yun ebꞌ jaxca tuꞌ, yuxan masanil ebꞌ pena tzet chi yal ebꞌ win, ey ebꞌ jix tzubꞌli oc yin jin sat.

7 Tuxa cꞌal kꞌejtaninaj wilon yu jin yaꞌilal. Jaxca tol manxa txequeloj jin mimanil tiꞌ, yutol jix jin bꞌajbꞌitoj.

8 Jaꞌ yet chin yilon oc ebꞌ ánima watxꞌ sbꞌeybꞌal yu tzet chin ioni, caw chi qꞌueya scꞌul ebꞌ; chi tit sjowal ebꞌ, jaxca tol penawom jin snaꞌon ebꞌ.

9 Jaꞌ ebꞌ watxꞌ snaꞌbꞌal, watxꞌ cꞌal oj yun sbꞌey cꞌaltoj ebꞌ; jaꞌ ebꞌ cꞌam spenail chi yunne, oj bꞌinale cꞌal ebꞌ.

10 Yuxan titanwej, kꞌanabꞌoj jonwej junelxa. Cꞌam junoj caw ey snaꞌbꞌal oj ilcha wu je xol tiꞌ.

11 Lalan cꞌal yecꞌtoj txololoj scꞌual jin kꞌinal, jaꞌ masanil tzetyetal naꞌbꞌil wu, cꞌal tzet chi woche, tuxa jix etex can eloj.

12 Jaex tiꞌ jaꞌ yet akꞌbꞌalil che yalaꞌ tol cꞌualil, jaꞌ yet ey kꞌejkꞌinal che yalaꞌ tol tuxa chi sajbꞌi eloj.

13 Asanxane jin camichal chi wechbꞌane, yet oj jin ey telan wey xol kꞌejkꞌinal.

14 Jaꞌ cambꞌal oj wal jin mamoj, jaꞌ noꞌ yaax jaꞌ oj jin chiꞌonoj, oj waloc noꞌ jin txutxoj cꞌal wanabꞌoj.

15 ¿Tzetyetal chi skeꞌ waon oc yipoj jin cꞌul? Jaꞌ tzet eyoc yipoj jin cꞌul, ¿bꞌey wal tuꞌ eyoc tinaniꞌ?

16 ¿Oj mi octoj jun tuꞌ wetoj bꞌey spuertail cambꞌal, yet watxꞌ junne xacꞌal oj yun jin xew yetoj xol pojoj tuꞌ? ẍi naj Job.