Jaꞌ An Libro
SALMOS
LIBRO 1
(Salmos 1–41)
Ebꞌ Watxꞌ Yetoj Cꞌal Ebꞌ Penawom
1
Caw tzalacꞌulal yet mactxequel,cꞌam chi jijen tzet chi yal ebꞌ pena sbꞌeybꞌal, watxꞌ yet ebꞌ cꞌam chi oc tzajan yintaj ebꞌ pena snaꞌbꞌal, watxꞌ yet ebꞌ cꞌam chi oc tzajan yintaj ebꞌ comon cꞌal chi bꞌuchwa yin Dios.
2 Jaꞌ ebꞌ chi camcꞌulnen skꞌane Dios, catuꞌ chi snaꞌoꞌtane ebꞌ yet cꞌualil cꞌal yet akꞌbꞌalil, caw tzalacꞌulal yet ebꞌ.
3 Jaꞌ ebꞌ tuꞌ, laan ebꞌ jaxca junoj teꞌ teꞌ awbꞌil ey stiꞌ junoj jaꞌ jaꞌ, chi satni cꞌal yin stiempoal, cꞌam bꞌakꞌin chi pujel xaj, masanil tzet chi yun ebꞌ chi eloc yin watxꞌ.
4 Jal pax ebꞌ penawom xin, man jaxca oj tuꞌ chi yun ebꞌ. Laan ebꞌ jaxca skꞌail ixim tiriw, ma jaxca pojoj chi ijletoj yu kaꞌeꞌ.
5 Jaꞌ ebꞌ chi yun spenail tuꞌ, oj tit sjowal scꞌul Dios yibꞌan ebꞌ. Jaꞌ ebꞌ penawom tuꞌ caw cꞌam yalon yet ebꞌ yapni oc bꞌey oj syambꞌa sbꞌa ebꞌ watxꞌ snaꞌbꞌal.
6 Jaꞌ Jehová chi teynen ebꞌ watxꞌ sbꞌeybꞌal, jal pax ebꞌ pena sbꞌeybꞌal xin, tol jaꞌ yul sbꞌeal syaꞌilal lalan stoo can ebꞌ.