2 Jaꞌ ebꞌ naj rey cꞌal ebꞌ syaawil junjun conobꞌ chi yoche ebꞌ chi yakꞌ jowal, jun laan chi yun slatiꞌne sbꞌa ebꞌ yet chi cajtzan oc ebꞌ yin Jehová, cꞌal yin Naj Rey Sicꞌbꞌil El Yu.

3 Chi yalon ebꞌ jaxca tiꞌ: Oj kiꞌcan el wan cadena eyoc kin yu Naj. Oj kiꞌon el cu bꞌa yul skꞌabꞌ Naj, ẍi ebꞌ.

4 Jal Jehová, Naj Yaaw yeoc bꞌey satcan, tucꞌal chi tzee Naj yin ebꞌ, yutol cꞌam niꞌoj tzet chi skeꞌ yu ebꞌ.

5 Yin eymanil chi tit sjowal Naj yin ebꞌ, chi xibꞌtele ebꞌ yu; yetoj wal sjowal scꞌul Naj, catuꞌ chi yalon tet ebꞌ jaxca tiꞌ:

6 Jix wa can oc yopiso jun Naj Rey sicꞌbꞌil el wu bꞌey tzalan Sión, jaꞌton Jerusalén, jaꞌton bꞌey jun conobꞌ bꞌey chi oc eyilal ey jin, ẍi Naj.

7 Jix yalon jun naj Rey tuꞌ, jaxca tzet jix yun yalon Jehová tet, jix yalon jaxca tiꞌ: Jin Cꞌaal jaach an, Jaꞌ yet jun cꞌu tiꞌ jix wakꞌ ja kꞌinal an.

8 Kꞌan ey jin, catuꞌ oj wakꞌon wan mimej conobꞌ ey jaach cꞌal masanil yul yibꞌankꞌinal tiꞌ oj wakꞌ yul ja kꞌabꞌ.

9 Oj ja wakꞌ cuenta ebꞌ conobꞌ yetoj sjowal ja cꞌul, jaxca wal chi yun spoꞌo junoj txꞌotxꞌ xi yu junoj chꞌen kꞌojoche, jaxca tuꞌ oj yun ebꞌ ja wu, ẍi Jehová tet.

10 Jaꞌ tinaniꞌ jex rey, yetoj jex yaaw bꞌey junjun conobꞌ, watxꞌ ojabꞌ chi yun je cuyun yibꞌan wan oj wal ey jex tiꞌ.

11 Ocanwej yin eyilal tet Jehová yin tzalacꞌulalil, ey ojabꞌ yeloc apnoj Naj yul je sat.

12 Eyanwej noan sattaj Naj Cꞌaale yin xiwcꞌulalil, cꞌam ojabꞌ che yiꞌtej sjowal scꞌul je yibꞌan, yet watxꞌ cꞌam chex qꞌueyle el yu, yutol yin eymanil chi yun stit sjowal Naj.

Caw tzalacꞌulal yet masanil ebꞌ chi scol sbꞌa yin Naj.