Jaꞌ jun libro tiꞌ jix tzꞌibꞌelecan yet abꞌil 971-686 a.C.

Jaꞌton yul stiempoal naj Salomón, jix tzꞌibꞌelecan jun libro tiꞌ, ecꞌbꞌan nan jix stzꞌibꞌe can naj. Proverbios sbꞌi jun libro tiꞌ, yutol jaꞌ titiꞌ tzꞌibꞌebꞌilcan wan jelanil cꞌal watxꞌ naꞌbꞌale yetoj wan cuybꞌanile tzet chi yun yoc eyilal sattaj Dios. Jaꞌ wan tiꞌ caw jix kꞌanle yet chi akꞌle scuybꞌanil ebꞌ ánima yet peyxa. Jaꞌ wan cuybꞌanile txenne yeocoj, jaꞌton chi yij proverbios. Jaꞌ wan tiꞌ, chi yaltej yu tzet chi oc yopiso cu yin junjun cꞌu. Bꞌabꞌel chi yakꞌ cu naꞌ, ta tol chi koche jelan chi eloc cu naꞌbꞌal, sowalil miman ojabꞌ yeloc apnoj Dios yul cu sat. Chi yalon cꞌaltej yu watxꞌ bꞌeybꞌale, yet watxꞌ tol ey cꞌal oc cu naꞌbꞌal yin Dios, ey ojabꞌ cu naꞌbꞌal, watxꞌ ojabꞌ kakꞌon yetoj ebꞌ ket animail.

Jaꞌ wan kꞌane tiꞌ chi aloni tzet smoo yunen ebꞌ jelan snaꞌbꞌal. Jaꞌ wan kꞌane tiꞌ chi aloni tzet smoo yunen junjun ánima yetoj yuninal cꞌal yetoj yistil. Chi yakꞌon pax naꞌbꞌale tet junjun conobꞌ, yet watxꞌ chi bꞌey ebꞌ yin sjichanil. Chi yalon pax oj, tol sowalil chi cu teyne cu bꞌa yetoj cu mimanil junjun jon, yeynajil chi kute cu bꞌa, ey ojabꞌ cu mimancꞌulal, ey ojabꞌ yeloc apnoj ebꞌ mebꞌa yul cu sat, cꞌal ebꞌ cu watxꞌil ánima, yetoj cꞌal ebꞌ yaaw.

Ey wan versículo chi alon yul jun libro tiꞌ, tol jaꞌ yetoj sjelanil Dios, jix swaꞌne masanil tzetyetal ey bꞌey yul yibꞌankꞌinal tiꞌ.