42
Jix lawi tuꞌ jix yalon naj Job tet Jehová jaxca tiꞌ:2 Wotaj tol masanil chi skeꞌ ja wu, jaꞌ tzet chi yoche ja cꞌul chi cꞌal elocoj.
3 Yutol jix ja wal ey jin jaxca tiꞌ: ¿Tzet ja we yuxan tol cha webꞌa el jin jelanil yetoj ja kꞌane cꞌam yeloc apnoj? Jain tiꞌ jaꞌ tzetyetal qꞌueyubꞌtaj yili tol cꞌam chi naꞌcha el wu, jaꞌ jix walaꞌ.
4 Jix ja walon ey jin jaxca tiꞌ: Abꞌ tzet oj walaꞌ, chi woche oj jin kꞌanle ey jaach, takꞌwan ey jin, pajtze wan jin kꞌanlebꞌal tiꞌ, ja chi.
5 Jaꞌ yet yalantoj asan ja kꞌaneal jix wabꞌe, jal tinaniꞌ xin, chach wotajne eloj yutol chi wiloc ja win yetoj jin sat.
6 Yu jun tuꞌ, chi naꞌcha el wu tol cꞌam weloc apnoj niꞌoj, chin ey xacꞌal chotan xol pojoj cꞌal xol stikꞌakꞌil taan tiꞌ, yu snaꞌon sbꞌa jin cꞌul, ẍi naj Job.
Jix Yakꞌ Syaxilal Dios Tet Naj Job Junelxa
7 Jix lawi skꞌanabꞌ Jehová tet naj Job tuꞌ xin, jix yalon cꞌal pax tet naj Elifaz a Temán jaxca tiꞌ: Caw eytej sjowal jin cꞌul ja win jaach tiꞌ, yetoj cꞌal yin cawanxa ebꞌ jaꞌjun ja wetoj tiꞌ, yutol man watxꞌoj tzet jix je yal win, jal pax naj jin chejabꞌ Job, watxꞌ cꞌal jix yun skꞌanabꞌi. 8 Jaꞌ tinaniꞌ, iꞌwejtoj jujcꞌonoj noꞌ wacax cꞌal jujcꞌonoj noꞌ icham meꞌ, catuꞌ chex too je yilon naj jin chejabꞌ Job. Jaꞌ wan noꞌ tuꞌ che yakꞌ tzꞌaꞌ yin xaambꞌalil je yu jaex tiꞌ. Jaꞌ naj jin chejabꞌ Job tuꞌ oj txaloj je yu, catuꞌ oj jin chaꞌon wabꞌ xa naj, catuꞌ cꞌamxa tzet oj jex wute, caxcꞌal tol je moo je chaꞌon junoj syaꞌilal, yutol man watxꞌoj jix yun je kꞌanabꞌ win, jal pax naj jin chejabꞌ Job, watxꞌ cꞌal jix yun skꞌanabꞌi, ẍi Jehová.
9 Catuꞌ jix too naj Elifaz, naj Bildad cꞌal naj Sofar, jaxca jix yun yal-le tet ebꞌ yu Jehová; queytuꞌ jix yun ẍaꞌle xa naj Job tuꞌ.
10 Jaꞌ yet jix lawi xali naj Job yu ebꞌ swatxꞌil ánima tuꞌ, catuꞌ jix yakꞌon pax meltzo syaaxilal Jehová yibꞌan naj jaxca yet yalantoj, tol caabꞌ tujanxa jix yun yakꞌle tet naj. 11 Queytuꞌ jix yun stoo il-le naj Job yu ebꞌ yuẍtaj cꞌal yu ebꞌ yanabꞌ, cꞌal yu ebꞌ swatxꞌil ánima, yetoj cꞌal masanil ebꞌ ánima otajnen naj yet yalantoj. Masanil ebꞌ tuꞌ jix swaꞌne jun miman loꞌbꞌe ebꞌ bꞌey sna naj. Jix mimancꞌulnele naj Job yu ebꞌ, cꞌal yalon ebꞌ tol jix cus cꞌal pax scꞌul ebꞌ yu syaꞌilal jix ecꞌ el yibꞌan yu Jehová. Junjun cꞌal ebꞌ jix yakꞌ tumin ebꞌ tet cꞌal junjun kolkꞌabꞌe tol oro xacꞌal eloj.
12 Yin slawubꞌal tuꞌ jix yakꞌon syaaxilal Dios tet naj Job yintaj yet yalantoj. Jix aapnoj sbꞌisil smeꞌ yin 14,000, 6,000 noꞌ camello, jun mil moan noꞌ wacax kꞌuom txꞌotxꞌ cꞌal mil noꞌ bꞌuru. 13 Jix ali jujwan scꞌaal yetoj oxwan scutzꞌin. 14 Jaꞌ ix bꞌabꞌel, jix yakꞌ yij sbꞌi Jemimá, jaꞌ ix yet scaabꞌ, jix yij ix Quesiá, jaꞌ ix yet yox, jix yij ix Queren-hapuc.a 15 Cꞌamxa junojxa ix bꞌey yul yibꞌankꞌinal laan jaxca swatxꞌil yili ebꞌ ix scutzꞌin naj Job tuꞌ. Jix akꞌle smajul stzetyetal ebꞌ ix yu smam jaxca jix yun yakꞌle yet ebꞌ naj sno ebꞌ ix.