2 ¿Chim skeꞌ ja waon ecꞌtoj junoj txꞌan yul xaam noꞌ, ma ja waon ecꞌtoj junoj chꞌen gancho yalan stiꞌ noꞌ?

3 ¿Ma skeꞌ yalon noꞌ ey jaach, yet watxꞌ chi okꞌ ja cꞌul yin noꞌ? Yin mi kꞌununi kꞌaneal oj yute yalon noꞌ ey jaach.

4 Tumi oj skeꞌ ja walon tet noꞌ, tol cha waoc noꞌ ja chejabꞌoj.

5 ¿Oj mi skeꞌ ja sajchi yetoj noꞌ jaxca chi yun ja sajchi yetoj junoj noꞌ tzꞌiquin? ¿Chim skeꞌ ja kꞌalon oc junoj lasu yin yajan noꞌ yet chi oc noꞌ sajchobꞌaloj ebꞌ ja cutzꞌin?

6 ¿Tumi oj skeꞌ spoꞌole ecꞌ ẍiꞌbꞌeal noꞌ xol-laj ebꞌ ánima? ¿tumi oj skeꞌ skꞌupontoj ebꞌ, catuꞌ chi xonon ebꞌ txonom chiꞌbꞌe?

7 ¿Tumi oj skeꞌ yecꞌ el julbꞌal yul stzꞌuumal noꞌ ja wu? ¿Tumi oj skeꞌ yecꞌ el chꞌen julbꞌal chi yij arpón yul sjolom noꞌ ja wu?

8 Ta tol cha wakꞌle ja mitxꞌon ey noꞌ, chach skꞌojey noꞌ sat txꞌotxꞌ, man oj toj qꞌueycꞌulal jun tuꞌ ja wu, cꞌamxa bꞌakꞌin oj ja wun junelojxa yetoj noꞌ.

9 Jaꞌ mac chi ilon yin noꞌ Leviatán tuꞌ, chi pax yip ebꞌ yu xiwcꞌulal.

10 ¿Mac wal junoj mactxequel chi skeꞌ stecꞌbꞌan sbꞌa xꞌemon noꞌ Leviatán tuꞌ? Jaxca tam wal Jin Jain tiꞌ, ¿mactxequel junoj chi skeꞌ stecꞌbꞌan sbꞌa jin sattaj?

11 ¿Tumi ey mactxequel jix akꞌon junoj tzetyetal ey jin yin sbꞌabꞌelal yet watxꞌ tol ey jin jec tet, catuꞌ chin toolanen tet junelxa? Yutol wet cꞌal el masanil tzetyetal ey bꞌey yul yibꞌankꞌinal tiꞌ.

12 Cꞌam cꞌal chin bꞌej wakꞌon bꞌina yajan noꞌ Leviatán tuꞌ, yutol cꞌamxa chi alcha jantaj yip noꞌ.

13 ¿Mactxequel chi skeꞌ yiꞌon el stzꞌuumal noꞌ eyoc yin tuꞌ, mac chi skeꞌ stejontoj junoj chꞌen lanza yul stzꞌuumal noꞌ, yutol laan yili jaxca chꞌen majbꞌal sat julbꞌal?

14 ¿Mac wal txequel oj skeꞌ sjajon stiꞌ noꞌ, yutol eyxa smey yili yoc yee noꞌ?

15 Jal stzꞌuumal yichin noꞌ, laan xacꞌal yetoj chꞌen majbꞌal sat julbꞌal txolanxa cꞌal ocoj, tol nubꞌubꞌi xacꞌal yeocoj, yutol caw jaxca chꞌen chꞌen.

16 Nubꞌubꞌi xacꞌal yeocoj, cꞌam chi skeꞌ yoctoj kaꞌeꞌ snanlaj xol yee noꞌ tuꞌ.

17 Junne xacꞌal yeocoj, cꞌam mactxequel chi skeꞌ spoꞌon ey snan.

18 Jaꞌ yet chi jatꞌiẍli noꞌ, laan wal jaxca letzꞌlom; caw chi kopopi yili yul sat noꞌ jaxca yajan cꞌu yet chi kꞌinibꞌi.

19 Jaꞌ yul stiꞌ noꞌ chi eltej xaj kꞌakꞌ, catuꞌ chi el tzititoj skꞌakꞌal.

20 Jaꞌ yul xaam noꞌ chi eltej mucꞌ, laan jaxca junoj xi tol chi juji atoj yibꞌan kꞌakꞌ.

21 Cajxeinaj xacꞌal chi yun stzakꞌakꞌ yu yet chi yiꞌon skaꞌeꞌ noꞌ, catuꞌ chi eltej xaj kꞌakꞌ yul stiꞌ noꞌ.

22 Caw ey yip snukꞌ noꞌ, masanil ánima chi xiw tet noꞌ.

23 Tol tax laan scawil ẍiꞌbꞌeal noꞌ jaxca chꞌen hierro tzꞌaꞌnaj xol kꞌakꞌ.

24 Caw wal caw spixan noꞌ jaxca junoj miman chꞌen, laan jaxca chꞌen kaꞌ.

25 Ta tol chi tit noꞌ yin ebꞌ ánima, chi xiwa ebꞌ tet noꞌ, cꞌal ebꞌ chi yaloc sbꞌa jelanil yin xacꞌal ani chi yun yela ebꞌ tet noꞌ.

26 Cꞌam cꞌal yopiso chꞌen espada, chꞌen lanza, tam wal chꞌen julbꞌal yet chi yakꞌlen jowal ebꞌ ánima yetoj noꞌ.

27 Jaꞌ chꞌen hierro laan cꞌal jaxca chꞌim yul sat noꞌ, jaꞌ chꞌen bronce, laan cꞌal jaxca skꞌail teꞌ.

28 Cꞌam chi el noꞌ tet junoj julbꞌal; ta tol chꞌen chi cu kꞌojtoj yin noꞌ laan jaxca skꞌail ixim tiriw chi cu kꞌojtoj yin noꞌ.

29 Ta chi cu makꞌoc junoj miman teꞌ yin noꞌ, laan jaxca junoj teꞌ aa chi cu makꞌoc yin noꞌ; tucꞌal chi ya el yaw noꞌ yet chi yabꞌen noꞌ sbꞌilwi chꞌen julbꞌal.

30 Ta tol chi sjutxtoj sbꞌa noꞌ sat txꞌotxꞌ, chi jolcha can yul-laj bꞌe yu noꞌ jaxca bꞌey chi kꞌuletoj txꞌotxꞌ yu chꞌen arado.

31 Chi somlabꞌi a sat jaꞌ mar yu noꞌ, jaxca wal tol chi juji a jaꞌ, laan jaxca junoj xi bꞌey chi juji junoj tzetyetal tol sukꞌukꞌi yoc sabꞌ.

32 Sajpolinaj xacꞌal chi yun yili jaꞌ bꞌey chi ecꞌ noꞌ, jaxca sajil xil jolome.

33 Cꞌam junojxa tzetyetal bꞌey sat txꞌotxꞌ tiꞌ chi skeꞌ slaanbꞌane sbꞌa yetoj noꞌ; jaꞌ noꞌ tuꞌ jix jin waꞌne yin tol cꞌam cꞌal bꞌey chi xiw niꞌoj.

34 Jaꞌ noꞌ tuꞌ yel ecꞌbꞌan yipal noꞌ yintaj wanojxa noꞌ noꞌ tol ey smey; jaꞌton jun tuꞌ sreyal masanil noꞌ chiꞌwawom noꞌ, ẍi Jehová tet naj Job.