40
Jix yalon pax Jehová tet naj Job jaxca tiꞌ:2 Jaach Job, chi yoche ja cꞌul cha teele ja bꞌa wetoj Jain tol chi cꞌal skeꞌ wu Masanil, ¿Ey tom wal tzet chi yoche ja cꞌul cha wal ey jin an? Chi skeꞌ chach takꞌwi ey jin xin, ẍi Jehová.
3 Jix takꞌwi naj Job tet Dios jaxca tiꞌ:
4 ¿Tzet to wal oj wute takꞌwoj jin bꞌa jain cꞌam niꞌoj weloc apnoj tiꞌ? Yel xacꞌal mi watxꞌ tol cꞌam tzet chi walaꞌ.
5 Tuxa jix jin kꞌanabꞌ cael oxel, cꞌamxa tzet chi skeꞌ waloni, ẍi naj Job.
Jaꞌ Dios Jix Xꞌoxel Yipalil Yet Jix Kꞌanabꞌ Tet Naj Job
6 Jix kꞌanabꞌ pax eytej Jehová junelxa tet naj Job bꞌey snan xol jun cajxuchum kaꞌeꞌ nabꞌ, jix yalon jaxca tiꞌ:
7 Tecꞌbꞌa ja bꞌa xin, catuꞌ cha pajtzen wan jin kꞌanlebꞌal oj wakꞌ ey jaach:
8 ¿Chim wal ja tecꞌbꞌa ja bꞌa ja waloni tol man watxꞌoj chi wute jin bꞌa, yet watxꞌ chi skeꞌ ja waloni tol cꞌam niꞌoj ja penail cha naꞌ?
9 ¿Tumi cha naꞌ tol laan ja wip wetoj an? ¿Chim wal nilili sbꞌilwi yel yaw yul ja nukꞌ jaxca wet tiꞌ an?
10 Txꞌox wil an ta tol miman ja weloc apnoj, txeclo ojabꞌ a ja jelanil yetoj ja wipal.
11 Chi cam wal ja wiloc ebꞌ tol chi smeyne sbꞌa; akꞌ jowal yetoj ebꞌ, masantaꞌcꞌal cha wakꞌ eyqꞌuey ebꞌ.
12 Jaꞌ ebꞌ chi yiꞌa can sbꞌa yetoj spena bꞌeybꞌal, chim ja tecꞌ can ey ebꞌ sat txꞌotxꞌ yet cha chaꞌlen ja bꞌa yetoj ebꞌ.
13 Cha mujcan eytoj ebꞌ masanil yalan txꞌotxꞌ; cha majchen can eytoj ebꞌ bꞌey mujan can eytoj ebꞌ camom.
14 Queywal tuꞌ oj yun wiloni tol ey ja jelanil, yuxan oj skeꞌ ja colon ja bꞌa yetoj ja wipalil tuꞌ.
15 Ocan tꞌanan yin noꞌ mimej Behemot,a jain jix jin waꞌne noꞌ tuꞌ jaxca jix yun jaach jin waꞌneni. Jaꞌ noꞌ tiꞌ chi sloꞌ an cꞌultaj noꞌ jaxca noꞌ wacax.
16 Ilaꞌ tol caw ey yip yichin noꞌ cꞌal yajan noꞌ.
17 Jaꞌ sne noꞌ laan scawil jaxca teꞌ kꞌuteꞌ, jaꞌ xꞌanil xubꞌ noꞌ txꞌumquiltaj xacꞌal yoqui.
18 Jaꞌ sbꞌajil noꞌ laan jaxca chꞌen tubo bronce cꞌal eloj, jaꞌ yajan noꞌ laan jaxca chꞌen hierro.
19 Asanne jun tujan noꞌ tuꞌ yel xacꞌal qꞌueyubꞌtaj yili xol masanil noꞌ noꞌ waꞌnebꞌil wu. Asan jin chi skeꞌ wakꞌon qꞌueyeloj, yutol jain jix jin waꞌne noꞌ.
20 Jaꞌ bꞌey sjolomlaj wonan bꞌey chi sajchi noꞌ xol-laj teꞌal noꞌ, jaꞌ tituꞌ chi sey low sbꞌa noꞌ yin an yaax cꞌultaj.
21 Chi ey kupan noꞌ bꞌey yalanlaj yenel teꞌ, cꞌal bꞌey xol-laj yajan an cꞌultaj bꞌey yaax txꞌotxꞌlaj yeqꞌui.
22 Jaꞌ bꞌey yalan yenel-laj teꞌ tuꞌ chi yewbꞌa el sbꞌa noꞌ; bꞌey xol-laj yenel xaj teꞌ joyan oc bꞌey stiꞌlaj jaꞌ, jaꞌ tituꞌ ey noꞌ.
23 Caxcꞌal mi chi chꞌibꞌ jaꞌ jaꞌ yul sbꞌe noꞌ, cꞌam chi xiw noꞌ; caxcꞌal mi chi oc secna masanil jaꞌ Jordán yin sat noꞌ, cꞌam cꞌal tzet chi snaꞌ noꞌ.
24 ¿Mac wal junoj chi tzaji smitxꞌon ey noꞌ? ¿mac wal junoj oj skeꞌ yiꞌon eltej sbꞌakꞌ sat noꞌ? ¿mac wal junoj oj skeꞌ yaon oc junoj txꞌan lasu yin xaam noꞌ?