2 ¿Ja wotaj mi jayebꞌ xꞌaaw chi yijoc yuneꞌ noꞌ, cꞌal bꞌakꞌin oj aloj yuneꞌ noꞌ tuꞌ?

3 Jaꞌ yet chi ali yuneꞌ noꞌ chi ey mocꞌan noꞌ yu syaꞌil yet chi jul yuneꞌ noꞌ.

4 Chi lawi tuꞌ catuꞌ chi oc yip noꞌ yuneꞌ tuꞌ, jaxa stoo noꞌ xol-laj teꞌ, cꞌamxa chi meltzo noꞌ junelxa scꞌatan xutx.

5 ¿Mactxequel jix jajon el noꞌ xol-laj teꞌal bꞌuru? ¿mactxequel jix aloni, yuxan tol jajbꞌil can el noꞌ?

6 Jain jix walaꞌ bꞌeytuꞌ chi skeꞌ scaey ecꞌ noꞌ, jaꞌ bꞌey cusiltaj txꞌotxꞌ cꞌal bꞌey acꞌal-laj bꞌey cꞌam tzet chi chꞌibꞌi.

7 Cꞌam chi ẍaꞌ scꞌul noꞌ chi eyecꞌ bꞌey yul-laj conobꞌ bꞌey caan ebꞌ ánima, cꞌam mac chi skeꞌ yaon oc noꞌ yin mulnail.

8 Chi ecꞌ noꞌ sey low sbꞌa bꞌey txꞌotxꞌ tzalquiltaj, yet chi seyon yaax cꞌultaj noꞌ sloꞌbꞌeoj.

9 ¿Tumi cha naꞌ jaach tiꞌ tol chi ẍaꞌ scꞌul noꞌ xol-laj teꞌal wacax yoc yin mulnail cꞌal yecꞌ junoj akꞌbꞌal noꞌ yul ja colal?

10 ¿Tumi oj skeꞌ ja kꞌalon oc teꞌ yugo yin noꞌ, catuꞌ oj ja wakꞌon pural noꞌ yoc yin mulnail yin kꞌuo txꞌotxꞌ, ma chi oc tzajan noꞌ ja wintaj yet cha kꞌuon ja txꞌotxꞌ yetoj noꞌ?

11 ¿Tumi yu caw ey yip noꞌ yuxan oj skeꞌ ja waon oc noꞌ yipoj ja cꞌul yin ja mulnail?

12 ¿Tumi cha naꞌ tol oj skeꞌ ja kꞌanon noꞌ yet oj ja yambꞌan a sat ja wawo bꞌey ja tecꞌbꞌal tiriw?

13 Ilaꞌ noꞌ avestruz, chi sjenoꞌtane xicꞌ noꞌ yin tzalacꞌulal, cꞌam chi skeꞌ stoo jenenoj noꞌ jaxca noꞌ cigüeña.

14 Jaꞌ yibꞌan arena, jaꞌ tituꞌ chi yakꞌ sjos noꞌ, yet watxꞌ chi kꞌaxna a yu yajan cꞌu.

15 Cꞌam chi snaꞌ noꞌ ta ey mactxequel oj tecꞌon poꞌo, ma junojxa noꞌ noꞌ chi oc tecꞌan yibꞌan.

16 Caw pena chi yute scꞌul noꞌ yin yuneꞌ, jaxca tol man yuneꞌ oj noꞌ; cꞌam cꞌal yeloc apnoj yul sat noꞌ, caxcꞌal mi cꞌam chi atej yuneꞌ noꞌ tuꞌ.

17 Yutol jain ma wakꞌ snaꞌbꞌal noꞌ yuxan queytuꞌ chi yute sbꞌa noꞌ.

18 Jaꞌ yet chi a waan noꞌ chi too jenenoj noꞌ yin ani, cꞌam chi xiw noꞌ tet mac eyoc yibꞌan che, tol chi tzala noꞌ yutol cꞌam chi tzaji sbꞌey noꞌ che tuꞌ yintaj noꞌ.

19 ¿Tumi jaach jix ja wakꞌ cꞌal pax yip noꞌ che tuꞌ? ¿Mactxequel jix aon oc xil steel snukꞌ noꞌ yet watxꞌ yili noꞌ?

20 ¿Tumi ja wu yuxan chi a tꞌujna noꞌ jaxca noꞌ kochiꞌ? Caw chi xiwa ebꞌ ánima yu noꞌ yet chi jorna yul xaam noꞌ.

21 Chi sjota txꞌotxꞌ noꞌ yet chi yochen noꞌ chi toi; cꞌam chi xiw noꞌ stoo yin jowal.

22 Man yotaj noꞌ ta tol ey tzetyetal ey smey, tol chi tzala noꞌ, cꞌam chi xiw noꞌ, tumi ey bꞌey oj oc tucan niꞌoj noꞌ yu espada.

23 Caxcꞌal tuxa cꞌal chi txinlabꞌi chꞌen chꞌen eyoc yin naj eyoc yibꞌan che, cꞌal skopopial yili yespada cꞌal slanza naj,

24 yetoj masanil yip noꞌ chi too jenenoj noꞌ. Jaꞌ yet chi xuꞌle chꞌen trompeta, cꞌamxa chi yal scꞌul noꞌ chi oc tucanoj.

25 Chi okꞌ noꞌ yet chi xuꞌle chꞌen trompeta; naat to ey noꞌ chi yabꞌen noꞌ tol ey jowal, chi yabꞌen noꞌ yel yaw ebꞌ yaaw.

26 Tumi yel xacꞌal jelan jaach, tumi oj skeꞌ ja chejontoj noꞌ chii bꞌey yetcꞌulal sur.

27 ¿Tumi jaach cha chejtoj noꞌ mimej chii, yuxan tol yel xacꞌal naat chi yatoj sweyubꞌ noꞌ skꞌabꞌlaj teꞌ?

28 Jaꞌ bꞌey satlaj chꞌen eyecꞌ noꞌ yet chi ecꞌ cꞌu cꞌal akꞌbꞌal, jaꞌ bꞌey sjolomlaj chꞌen chi atoj linan noꞌ.

29 Jaꞌ bꞌey yel xacꞌal naat yeaoj, jaꞌ tituꞌ chi yiltoj junoj ẍiꞌbꞌe noꞌ.

30 Jaꞌ noꞌ yuneꞌ, jaꞌ ẍiqꞌuil noꞌ noꞌ chi yuqꞌueytoj noꞌ yuxan iquis noꞌ; jaꞌ bꞌey ey smimanil junoj camnaj noꞌ, jaꞌ tituꞌ chi ilcha noꞌ ku, ẍi Jehová.