3 Jaꞌ tinaniꞌ xin, tecꞌbꞌa ja bꞌa yet oj ja pajtzen wan jin kꞌanlebꞌal oj wal ey jaach tiꞌ:

4 ¿Bꞌeytuꞌ eyoc jaach ecꞌoj yet jix jin waꞌnen ey sbꞌatxlubꞌal yich txꞌotxꞌ txꞌotxꞌ tiꞌ? Al ey jin ta tol caw yel miman tzet ja wotaj.

5 ¿Ja wotaj mi mactxequel jix naꞌoni jantaj wal jix yun yechel yeeytoj yich txꞌotxꞌ txꞌotxꞌ tiꞌ? ¿mactxequel jun jix naꞌon tuꞌ jantaj jun jix yun yechel sat txꞌotxꞌ txꞌotxꞌ tiꞌ?

6 ¿Ja wotaj mi bꞌeytuꞌ bꞌatxan ey sbꞌatxlubꞌal yich? ¿Mactxequel jix bꞌabꞌi aon ey chꞌen chꞌen ey can eytoj yich tuꞌ?

7 Jaꞌ yet tuxa chi kꞌinibꞌi a yet jun cꞌual tuꞌ, jix bꞌitni a wan weycan, yetoj masanil ebꞌ wángel, jix el yaw ebꞌ yu tzalacꞌulal.

8 Jaꞌ yet jix maltoj jaꞌ mar bꞌey yibꞌan txꞌotxꞌ txꞌotxꞌ tiꞌ, ¿mactxequel jix aon oc smajil sat jaꞌ yet jix cancan tucan jaꞌ?

9 Jain jix waoc asun spichiloj jaꞌ, jacꞌalaꞌ pax asun tuꞌ jix wa can oc xotiloj jaꞌ.

10 Jain jix wa can ey smoonal jaꞌ mar, jix waon can oc slaveal stiꞌ jaꞌ.

11 Jix walon tet jaꞌ jaxca tiꞌ: Asan titiꞌ chach cancan tucanoj cꞌamxa chi skeꞌ ja wecꞌtoj tituꞌ, asan titiꞌ oj jaach jul pomnaoj, jin chi tet jaꞌ.

12 ¿Eyxam bꞌey cha wal juneloj jaach tiꞌ, tol chi tit sajil yichcan yet jix sajbꞌi a junxa cꞌual?

13 ¿Xax mi ja poꞌoeltoj juneloj sajkꞌinal bꞌey masanil sat txꞌotxꞌ txꞌotxꞌ tiꞌ yu ja kꞌane, cꞌal yewbꞌan el sbꞌa ebꞌ penawom tet?

14 Caw mi chi txeclo tzet utbꞌil yili txꞌotxꞌ txꞌotxꞌ yu yajan cꞌu yet chi kꞌinibꞌi, jaxca yili stzꞌibꞌil junoj an pichile, ma jaxca chi yun scancan yechel sello yin txꞌotxꞌ ixcabꞌ txꞌotxꞌ.

15 Catuꞌ chi mitxꞌle oc tucan ebꞌ penawom yu jun sajkꞌinal tuꞌ, yet watxꞌ cꞌamxa chi skeꞌ yu ebꞌ yetnen ánima.

16 ¿Eyxam bꞌey jix ja wil wan mimej jolan xabꞌ tol ewan cꞌuan yeoc bꞌey chi tit snukꞌ jaꞌ mar?

17 ¿Xax mi ja wilaꞌ bꞌeytuꞌ eyoc spuertail cambꞌal tol caw wal ey smey?

18 ¿Ja wotaj mi jantaj jun yeoc yechel sat txꞌotxꞌ txꞌotxꞌ tiꞌ? Al ey jin an, ta tol yel ja wotaj masanil.

19 ¿Ja wotaj mi bꞌeytuꞌ chi titoc sajkꞌinal cꞌal kꞌejkꞌinal, bꞌeytuꞌ eyoc oc scꞌuanbꞌal?

20 ¿Chim skeꞌ ja wiꞌontoj sajkꞌinal bꞌey chi yal ja cꞌul cha wiꞌtoj, catuꞌ cha wiꞌon pax meltzo junelxa bꞌey ey cꞌaltaꞌa?

21 ¡Tejan ja wotaj sicꞌlebꞌil! Yutol mimanxa ja wabꞌilal, xax mi jaach ali yet jix waꞌxi masanil tzetyetal.

22 ¿Eyxam bꞌey jix jaach bꞌetecꞌ bꞌey yaman ecꞌ chꞌen cheew yetoj cꞌal chꞌen sajbꞌat wu an?

23 Cꞌuan ecꞌ wan tuꞌ wu yet chin kꞌanbꞌalne yin waon oc junoj syaꞌilal ma yu junoj jowal.

24 ¿Ja wotaj mi bꞌey chi titoc sajkꞌinal cꞌal yet chi spoꞌontoj sbꞌa? ¿Ja wotaj mi tzet chi yun spoꞌontoj sbꞌa kaꞌeꞌ chi tit yetcꞌulal bꞌey chi aol cꞌu?

25 ¿Mactxequel chi jajon yet chi tit secna yaxnabꞌ, catuꞌ chi xꞌoxon bꞌey chi caꞌ stooc mimej kaꞌeꞌ yaax nabꞌ,

26 yet watxꞌ chi yakꞌ nabꞌ bꞌey txꞌotxꞌ cusiltaj txꞌotxꞌ, bꞌey cꞌam mactxequel caan sat,

27 yet chi yaaxbꞌi sat txꞌotxꞌ txꞌotxꞌ tol ey can xꞌojli, yet chi aol an yaax cꞌultaj sat?

28 ¿Mactxequel junoj mame yeoc yibꞌan nabꞌ cꞌal yin yal akꞌbꞌal?

29 ¿Mactxequel txutxe yeoc yin chꞌen cheew cꞌal chꞌen sajbꞌacom?

30 ¿Mactxequel chi akꞌon cawbꞌoj el jaꞌ jaꞌ jaxca chꞌen chꞌen; catuꞌ chi cawbꞌi el sat jaꞌ mar yu siic?

31 ¿Chim skeꞌ ja yambꞌan oc wan weycan chi yij Motz, ma chi skeꞌ ja sajlemnen cantoj wan weycan chi yij Orión?

32 ¿Tumi jaach cha wakꞌ aol jun miman weycan yet tuxa chi sajbꞌi? ¿Jaach mi cha wiꞌeltej wan weycan chi yij Miman Osa cꞌal Yaliẍ Osa?

33 ¿Ja wotaj mi yeoc xolilal wan ley chi kꞌanbꞌalnele bꞌey satcan? ¿Lalan mi ja wakꞌon cuyle wan ley tuꞌ bꞌey sat txꞌotxꞌ tiꞌ?

34 ¿Chim skeꞌ ja walon tet asun tol chi sec eytej nabꞌ?

35 ¿Chim skeꞌ ja chejontoj raya yet chi too bꞌey junoj lugar? ¿Chim takꞌwi ey jaach jaxca tiꞌ: Ti ey jin an xin, jaach cha walaꞌ, yal cꞌal bꞌeytuꞌ chin ja chejtoj, ẍim ey jaach?

36 ¿Mactxequel jix akꞌon sjelanil noꞌ atzꞌokꞌ caẍlan cꞌal wanxa noꞌ tzꞌiquin yet chi okꞌ noꞌ ta tol oj yakꞌ nabꞌ?

37 ¿Mactxequel yel xacꞌal jelan tol yotaj jantaj wal asun ey? ¿Mactxequel chi skeꞌ secon el jaꞌ eyoc xol asun tuꞌ, catuꞌ chi yakꞌon nabꞌ,

38 yet watxꞌ jaꞌ pojoj chi oc can yin ixcabꞌ txꞌotxꞌal catuꞌ junxane chi yute ey sbꞌa?

39-40 ¿Tumi jaach cha sey ẍiꞌbꞌe noꞌ xutx león, yet chi yewbꞌa el sbꞌa noꞌ bꞌey sweyubꞌ, ma yet chi smajon ẍiꞌbꞌe noꞌ bꞌey xol-laj cꞌultaj yet watxꞌ chi ẍiꞌ chiꞌbꞌe noꞌ yuneꞌ masantaꞌcꞌal chi no scꞌul noꞌ?

41 ¿Mactxequel chi txꞌoxon sloꞌbꞌe noꞌ xutx joo yet chi ecꞌ seyon sloꞌbꞌe yuneꞌ noꞌ, yutol chi el yaw noꞌ skꞌanon sloꞌbꞌe ey jin an?