2 Abꞌwej sbꞌilwi cꞌu, jaꞌ jun tuꞌ yul snukꞌ Dios chi oqui; jaꞌton yul stiꞌ chi eltej jun chi bꞌilwi tuꞌ.

3 Jaꞌ Naj chi aon eytej koplabꞌoj raya bꞌey satcan, chi txeclo tacꞌal bꞌey slawubꞌal txꞌotxꞌ txꞌotxꞌ tiꞌ yu.

4 Chi lawi tuꞌ, catuꞌ chi abꞌle sbꞌilwi yoc yul snukꞌ Naj tol miman yeloc apnoj. Jaꞌ yet chi abꞌle sbꞌilwi tuꞌ, jal pax raya xin, cꞌamxa chi oc tucan yey koplabꞌoj.

5 Qꞌueyubꞌtaj xacꞌal chi yun snilili sbꞌilwi yul snukꞌ Dios, ey cꞌal mimej tzetyetal chi yun Naj tol cꞌam chi naꞌcha el ku.

6 Jaꞌ Naj chi aloni, catuꞌ chi eyqꞌuey chꞌen cheew yibꞌan txꞌotxꞌ txꞌotxꞌ tiꞌ; catuꞌ eyxa smey yeyqꞌuey nabꞌ yu Naj.

7 Jaꞌ Dios chi majchen octoj ebꞌ ánima yul sna, yet watxꞌ chi naꞌcha el masanil yipalil Naj yu ebꞌ.

8 Jaꞌ noꞌ noꞌ chi too noꞌ yul-laj snachꞌen, jaꞌ tituꞌ chi scꞌubꞌa can octoj sbꞌa noꞌ.

9 Chi tit sjowal kaꞌeꞌ bꞌey yetcꞌulal sur, jal bꞌey norte xin, chi tit siic yu kaꞌeꞌ.

10 Jaꞌ yu skaꞌeꞌ Dios chi pitzcꞌu a chꞌen cheew, catuꞌ chi sicbꞌi el jaꞌ mimej jaꞌ yu chꞌen.

11 Jaꞌ Naj chi aon oc jaꞌ jaꞌ xol asun, jaꞌ xol wan tuꞌ chi pitzcꞌu a raya.

12 Jaꞌ raya chi ecꞌ cꞌal bꞌey chi ẍaꞌ scꞌul Dios; queytuꞌ chi yun sjijen tzetyetal chi yal Naj bꞌey masanil sat txꞌotxꞌ txꞌotxꞌ tiꞌ.

13 Jaꞌ yin wan tuꞌ chi xꞌoxel yipalil Dios yin yakꞌon syaꞌilal ma yin yakꞌon swatxꞌcꞌulal bꞌey sat txꞌotxꞌ txꞌotxꞌ tiꞌ.

14 Jaach Job, abꞌ wal tzet chi walaꞌ, catuꞌ chi cam ja naꞌoni tol caw qꞌueyubꞌtaj yoc tzetyetal chi yun Dios.

15 ¿Chim naꞌcha el ja wu jaach tiꞌ tzet chi yun skꞌanbꞌalnen Dios masanil wan tiꞌ, tzet utbꞌil chi yun yecꞌ koplabꞌoj raya xol asun?

16 ¿Ja wotaj mi tzet utbꞌil chi yun scancan tucan asun xol kaꞌeꞌ? Jaꞌ jun tuꞌ chi txꞌoxon eloj tol cꞌamxa chi alcha el jantaj sjelanil Dios.

17 Jaach tiꞌ, ian xacꞌal cꞌam chi techa kꞌakꞌ ja wu yul ja pichil, jaꞌton yet chi tit kaꞌeꞌ bꞌey sur yuxan numomi xacꞌal chi yun can sat txꞌotxꞌ tiꞌ yu.

18 ¿Chim skeꞌ ja colwa yetoj Dios yet chi too jenan jun satcan tiꞌ, jaxca junoj jenan chꞌen chꞌen caw chi yun canoj?

19 Al ey jon tinaniꞌ tzetyetal watxꞌ chi kal tet Dios; yutol jaxca tol xol kꞌejkꞌinal bꞌey ey jon ecꞌoj, cꞌamxa tzet watxꞌ chi kalaꞌ.

20 Jain tiꞌ cꞌam chin tecꞌbꞌa jin bꞌa waloni tol chin kꞌanabꞌ yetoj Dios, ta chi wunne, jaxca mi tol chi wiꞌtej camich wibꞌan.

21 Cꞌamxa chi skeꞌ kilon yajan cꞌu ta tol chi kꞌejbꞌi oc asun yin; ta chi xuꞌle pax el asun tuꞌ yu kaꞌeꞌ bꞌey satcan tuꞌ xin, catuꞌ chi jajlo pax aoj.

22 Jaxca xacꞌal skopopial chꞌen oro, queywal tuꞌ chi yun yili bꞌey yetcꞌulal norte, jaꞌ yu stzejejial Dios tuxa cꞌal chi qꞌueycan a cu cꞌul.

23 Cꞌam chi naꞌcha el ku jantaj wal yeoc sjelanil Naj tol chi skeꞌ yu masanil, yutol cꞌamxa chi alcha jantaj yeoc yipalil cꞌal swatxꞌilal; caw watxꞌ ton Naj, cꞌam bꞌey chi yetne junoj mactxequel.

24 Yu jun tuꞌ, caw chi xiw ebꞌ ánima tet; tumi ey niꞌoj yeloc apnoj ebꞌ chi yaloc sbꞌa jelanil yul sat Dios, ẍi naj Eliú.