3 Oj jin kꞌanbꞌalne jin jelanil yel xacꞌal miman yeloc apnoj, yin jin txꞌoxon eloj tol miman yeoc sjelanil Naj jix jin waꞌneni.

4 Otajne eloj tol man lekꞌtiꞌal kꞌane oj wal ey jaach; tol jain chin kꞌanabꞌ ja wetoj, yutol tzꞌajan jin jelanil.

5 Jaꞌ Dios ey yipalil, ey cꞌal pax sjelanil, yuxan cꞌam junoj mactxequel chi intajnele el yu Naj.

6 Chi iꞌle el skꞌinal ebꞌ penawom yu Naj, catuꞌ chi waꞌnele yeoc skꞌane ebꞌ chi etnelei.

7 Jaꞌ Dios chi teynen ebꞌ ánima watxꞌ sbꞌeybꞌal; jaꞌ chi aon oc ebꞌ yaaw yin reyal yet chi bꞌinale cꞌal ebꞌ yet bꞌakꞌin.

8 Ta tol chi kꞌal-le ey ebꞌ penawom yetoj chꞌen cadena, caw chi yabꞌ syaꞌil ebꞌ.

9 Jaꞌ Dios chi txꞌoxon oc spenail ebꞌ chi smimanbꞌane sbꞌa.

10 Chi kꞌanabꞌ Dios tet ebꞌ yu yakꞌle cuenta ebꞌ yu, catuꞌ chi yalon Naj tol chi sbꞌejcan yunen jantaj spenail ebꞌ.

11 Ta tol chi ẍaꞌ yabꞌ cuybꞌanile ebꞌ, catuꞌ chi yaon oc sbꞌa ebꞌ yul skꞌabꞌ Dios, caw oj yakꞌ tzalabꞌoj scꞌul ebꞌ yet iquisto ecꞌ ebꞌ yul jun yibꞌankꞌinal tiꞌ.

12 Ta man oj ẍaꞌ yabꞌ ebꞌ xin, oj tzokꞌle cam ebꞌ, oj tojcan ebꞌ bꞌey cambꞌal yin tol cꞌam tzet yotaj.

13 Jaꞌ ebꞌ cꞌam yeloc apnoj Dios yul sat, caw chi el sjowal ebꞌ, catuꞌ ey cꞌal pax tej sjowal scꞌul Dios yibꞌan ebꞌ, caxcꞌal mi chi ale oc syaꞌilal ebꞌ, cꞌam cꞌaltaꞌ chi yal sbꞌa ebꞌ tet Dios.

14 Caw achꞌe winaj to ebꞌ yet chi camtoj ebꞌ, qꞌuixwiltaj xacꞌal chi yun slawi ey ebꞌ.

15 Jaꞌ snan xol syaꞌilal junoj mactxequel, jaꞌ Dios chi akꞌon naꞌcha el spenail yu ebꞌ, yu jun tuꞌ chi colcha el ebꞌ xol syaꞌilal.

16 Jaach Job, queytuꞌ chi yoche Dios ja win, tol chach smonte el yul skꞌabꞌ jun syaꞌilal tuꞌ, catuꞌ oj jaach yiꞌontoj bꞌey jun conobꞌ caw wal watxꞌ bꞌey cꞌamxa cuscꞌulal, yin ja wakꞌon tzalabꞌoj ja cꞌul yin loꞌbꞌe manxa jantajoj swatxꞌil bꞌey sat ja meẍa.

17 Yuxan jaꞌ tinaniꞌ, jaꞌ Dios chi naꞌon oc ja win, lalan ja chaꞌon syaꞌil jaxca smoo ẍaꞌon ebꞌ penawom.

18 Yu jun tuꞌ, yuxan cha teyne cꞌal ja bꞌa yet watxꞌ cꞌam chach qꞌueyle el yu Dios yin junne txolan yetoj sjowal scꞌul. Yutol ma skeꞌ ja colcha el yu mimanoj tumin tet sjowal scꞌul Dios tuꞌ.

19 Yutol cꞌam yeloc apnoj ja bꞌeomal yul sat Naj. Tumi ey cꞌal pax yeloc apnoj caxcꞌal miman yeoc ja bꞌinabꞌilal.

20 Teyne cꞌal ja bꞌa yet watxꞌ cꞌam cha wiꞌtej kꞌejkꞌinal ja wibꞌan, chi yal yeloc apnoj jaꞌton sjowal scꞌul Dios tol chi qꞌueyle el mimej conobꞌ yu yin eymanil.

21 Teyne cꞌal ja bꞌa yet cꞌam ojabꞌ cha watoj ja bꞌa xol spenail, jix ale oc jun syaꞌilal tiꞌ ja wibꞌan yet watxꞌ cꞌam chach too yin spenail.

22 Chi cam wal ja wilon oc yipal Dios. Tumi ey junoj cuywam tol jelan chi skeꞌ slaanbꞌane sbꞌa yetoj Naj.

23 Cꞌam junoj mactxequel chi skeꞌ yalon tet tzetyetal oj yunne, tam wal stzuoni: Caw pena jix ja wute, man ẍi oj junoj mactxequel tet Dios.

24 Masanil ebꞌ chi alon watxꞌ kꞌane yin tzetyetal watxꞌ jix swaꞌne Dios. Cꞌam ojabꞌ bꞌakꞌin chi too qꞌueycꞌulal ja wu, yet cha walon cꞌal watxꞌ kꞌane tet.

25 Masanil ánima chi ilon tzet jix swaꞌne, caxcꞌal mi tol naat ey.

26 Cꞌam chi naꞌcha el ku jantaj wal yeoc smimanbꞌilal Dios; tam wal chi skeꞌ cu bꞌison cꞌal pax jantaj yabꞌilal.

27 Jaꞌ chi iꞌon atoj junjun tujan jaꞌ jaꞌ bꞌey satcan, jaxa jaꞌ jaꞌ tuꞌ chi meltzo oc yin nabꞌil yu.

28 Chi syambꞌa oc sbꞌa nabꞌ bꞌey xol asun, catuꞌ chi eyqꞌuey nabꞌ kibꞌan.

29 Mactxequel chi naꞌcha el yu tzet chi yun spoꞌochatoj asun tuꞌ yu Dios, ma tzet chi yun yakꞌon bꞌilwoj cꞌu masantaꞌcꞌal bꞌey scalubꞌal.

30 Jaꞌ yu Naj chi ecꞌ koplabꞌoj raya yinlaj bꞌey eyecꞌoj, jaꞌ skopopial tuꞌ chi akꞌon txeclo jantaj snaatil yich jaꞌ mar yu.

31 Queytuꞌ chi yun yakꞌon yaawil Dios yibꞌan ebꞌ conobꞌ, catuꞌ caw ey loꞌbꞌe chi akꞌle tet ebꞌ ánima yu.

32 Jaꞌ mitxꞌnen a raya, jaꞌ chi kꞌojontoj yetoj skꞌabꞌ bꞌey chi yal scꞌul chi skꞌojoctoj.

33 Jaꞌ yet chi nilili sbꞌilwi cꞌu, chi xꞌoxel yipalil cꞌal sjowal scꞌul, catuꞌ chi txeclo eloj tol tuxa chi tit yaxnabꞌ.