3 Caxcꞌal jaxca tuꞌ jix yun ja walon tet Dios: ¿Tzet ja walon ja wet yin caxcꞌal mi chi oc jin penail? ¿tzet oj wiꞌ yin ta cꞌam pax bꞌey chi oc jin penail? ja chi.

4 Jain tiꞌ oj jin takꞌwoj ey jaach, cꞌal tet ebꞌ ja watxꞌil ánima tiꞌ.

5 Aan tꞌanan bꞌey satcan tuꞌ; queytuꞌ oj yun ja wiloni tol jaꞌ asun yel xacꞌal naat yeatoj ja wibꞌan.

6 Ta chi oc ja penail, cꞌam tzetyetal oj yun Dios ja wu; caxcꞌal miman ja penail chi oqui, jaꞌ wan tuꞌ cꞌam tzet chi yalaꞌ.

7 Ta caw watxꞌ tzetyetal cha wunne, cꞌam cꞌal pax tzet chi yiꞌ Dios ja win; cꞌam niꞌoj wan tzetyetal tuꞌ chi oc swatxꞌiloj Naj.

8 Jaꞌ ebꞌ ket animail, jaꞌ ebꞌ chi etex yu ja penail tuꞌ; jaꞌcꞌal pax ebꞌ watxꞌ chi eloc yu tzetyetal watxꞌ cha wunne.

9 Jaꞌ yet chi etex ebꞌ ánima chi el yaw ebꞌ, chi skꞌanon colwal ebꞌ yet chi col-le el ebꞌ yul skꞌabꞌ ebꞌ chi etnen tuꞌ.

10 Cꞌam cꞌal bꞌey chi seyecꞌ jun Dios jix waꞌnen ebꞌ, jun chi akꞌon cu tzalacꞌulal xol cu yaꞌilal,

11 jaꞌton Naj ecꞌbꞌan chi yun cu scuyon yintaj noꞌ noꞌ, ecꞌbꞌan sjelanil chi yakꞌ ey jon yintaj noꞌ tzꞌiquin.

12 Chi el yaw ebꞌ chi etexi, cꞌam cꞌal chi takꞌwi Dios tet ebꞌ, yutol caw pena snaꞌbꞌal ebꞌ, caw chi smeyne sbꞌa ebꞌ.

13 Yutol jaꞌ Dios, Naj Miman yeoc yipalil, cꞌam chi ẍaꞌ yabꞌ kꞌane tol cꞌam yeloc apnoj.

14 ¿Tzet wal oj yun stakꞌwi ey jaach yet cha waloni tol cꞌam cha wiloc yin Dios; tol jaꞌ kꞌane eyoc ja wibꞌan eyecꞌ sattaj Naj, yuxan tol cha wechbꞌane tzet oj yun snaꞌon oc Naj ja win?

15 Cha waloni tol cꞌam chi tit sjowal scꞌul Dios, tam wal yaon oc syaꞌilal ebꞌ chi oc spenail, tam wal miman yeloc apnoj ebꞌ chꞌaan chi yute sbꞌa yul sat.

16 Yu jun tuꞌ xin jaach Job, cꞌam niꞌoj tzet chi yal yeloc apnoj wan kꞌane cha wal tuꞌ. Caw miman ja kꞌane cha walaꞌ jaxca wal tol cꞌam ja naꞌbꞌal yet chach kꞌanabꞌ tuꞌ, ẍi naj Eliú.