3 Jaxca ojabꞌ chi yun yabꞌen yul cu tiꞌ yu tzet chi cu loꞌ, jaxca tuꞌ chi yun yabꞌen cu txiquin tzet chi al-lei ta watxꞌ.

4 Yu jun tuꞌ xin, cu naꞌwej yibꞌan wan kꞌane chi kalwej tiꞌ, catuꞌ naꞌcha ojabꞌ el ku tzet yeocoj.

5 Jix yal naj Job jaxca tiꞌ: Jain tiꞌ cꞌam jin penail, cꞌam pax chi waꞌnele yeoc jin kꞌane yu Dios.

6 Lekꞌtiꞌal kꞌane mi chi walaꞌ, ta tol chi walaꞌ tol ey jin penail; caxcꞌal mi cꞌam jin mul, cꞌam cꞌal chi waꞌxi jin yaꞌilal tiꞌ, ẍi naj.

7 Tumi ey mactxequel laan yetoj naj Job tiꞌ. Subꞌo xacꞌal sbꞌuchwa yin Dios, jaxca xacꞌal kuqꞌuen eytoj jaꞌ.

8 Caw chi ẍaꞌ scꞌul chi sjunbꞌane sbꞌa yetoj ebꞌ penawom; jaꞌ yetoj ebꞌ ánima pena snaꞌbꞌal chi eqꞌui.

9 Chi yaloni tol cꞌam tzet chi kiꞌ yin kunen watxꞌil sattaj Dios.

10 Jaex tol ey je naꞌbꞌal tiꞌ, abꞌwej tzet oj walaꞌ. Jaꞌ Dios, Naj chi skeꞌ yu masanil, cꞌam bꞌey chi yun junoj man watxꞌoj.

11 Jaꞌ Naj chi toolanen tet junjun jatacꞌalaꞌ tzet chi el yuneni, catuꞌ chi yakꞌon spaj tet junjun tol smoo ẍaꞌoni.

12 Cꞌam chi skeꞌ cu naꞌoni tol man watxꞌoj tzet chi yun Dios, yutol jichan cꞌal tzet chi yunne, jaꞌton Naj chi skeꞌ yu masanil.

13 Cꞌam mactxequel jix aon oc Naj yin yopiso yu yakꞌon yaawil bꞌey masanil yul yibꞌankꞌinal tiꞌ.

14 Kꞌinaloj ta chi el yin scꞌul Dios tol chi yiꞌel cu kꞌinal akꞌbꞌil ey jon yu bꞌey yul yibꞌankꞌinal tiꞌ,

15 jun laan mi chi yun cu cam cu masanil, catuꞌ chi cu meltzo can oc yin pojojal junelxa.

16 Jaach Job, ta ey ja naꞌbꞌal xin, abꞌ tzet oj walaꞌ; tzꞌin ojabꞌ cꞌal ja chi yajbꞌan chin kꞌanabꞌi.

17 Kꞌinaloj ta jaꞌ Dios man watxꞌoj tzet chi yunne, ta jaxca tuꞌ, ¿Tumi oj skeꞌ yakꞌon Yaawilal? ¿Tumi cha woche chach ecꞌbꞌantoj yintaj Dios tol caw watxꞌ snaꞌbꞌal?

18 Ta tol penawom ebꞌ rey cꞌal ebꞌ ey yopiso, jaꞌ Dios cꞌam chi xiw yalon oc yin sat ebꞌ.

19 Jaꞌ Dios cꞌam chi yaoc sbꞌa yetoj ebꞌ yaaw, cꞌam chi yaoc sbꞌa yetoj ebꞌ bꞌeom, cꞌal ebꞌ mebꞌa, yutol jaꞌ Naj jix waꞌnen ebꞌ masanil.

20 Ta chi yal scꞌul Dios, junne akꞌbꞌal chi yun cu cami. Jaꞌ ebꞌ jelan chi yute snaꞌoni, oj cam cꞌal ebꞌ jaxca tuꞌ, man sowaliloj ánima oj makꞌon cam ebꞌ.

21 Jaꞌ Dios chi ilon tzet chi cu bꞌeybꞌalne jaon ánima jon tiꞌ, yotaj Naj tzet chi cu waꞌne junjun jon.

22 Cꞌam kꞌejkꞌinal chi skeꞌ smajchen el ebꞌ penawom.

23 Man sowaliloj tol chi awtele junoj ánima yu Dios yet chi naꞌle oc yin ebꞌ yu.

24 Man sowaliloj tol chi cam skꞌanlen yabꞌ Dios, yet chi skeꞌ yakꞌon lawoj ey ebꞌ mimej winaj yet chi cancan yopiso ebꞌ tet junojxa.

25 Jaꞌ Dios yotaj tzetyetal chi yun ebꞌ; caxcꞌal akꞌbꞌalil chi skeꞌ sqꞌueyle el ebꞌ yu.

26 Chi ale oc syaꞌilal ebꞌ sattaj masanil ánima jaxca chi utele junoj ebꞌ penawom.

27 Yutol cꞌam chi sjije ebꞌ tzet chi yalaꞌ, cꞌam chi ẍaꞌ yabꞌ ẍejbꞌanil Dios ebꞌ, cꞌam chi sbꞌeybꞌalne ebꞌ.

28 Yu spenail ebꞌ yaaw tuꞌ, yuxan chi el yaw ebꞌ mebꞌa yet chi etnele ebꞌ, jaꞌton ebꞌ okꞌbꞌal cꞌul yeoc yu ebꞌ; jaꞌ yet chi el yaw ebꞌ jix apni tacꞌal oc yaw ebꞌ sattaj Dios.

29 Ta jaꞌ Dios cꞌam tzet chi yalaꞌ ¿mactxequel oj skeꞌ yakꞌon low yin ebꞌ? Ta chi scꞌubꞌa el sbꞌa Naj ¿macto wal oj skeꞌ yilon yin? Jaꞌ Dios ey cꞌal yopiso yibꞌan masanil nacionlaj cꞌal yibꞌan junjun ánima.

30 Jaꞌ Dios chi aon oc yin xolilal, yet watxꞌ cꞌam chi yakꞌ yaawilal ebꞌ pena snaꞌbꞌal xol conobꞌ, yet cꞌam chi etnele ebꞌ ánima yu ebꞌ.

31 Jaach Job, tumi taꞌ jix ja wal tet Dios jaxca tiꞌ: Caw jix oc jin penail, yuxan manxa oj wunne.

32 Tol oj wal jix ja wal jaxca tuꞌ: Txꞌox jantaj spenail jix wunne tol cꞌamxa chi naꞌchatej wu tinaniꞌ. Ta pena jix wunne manxa oj wun junelxa.

33 ¿Tumi chi yoche ja cꞌul tol chi spajtze Dios ey jaach, jaxca wal bꞌey chi yoche ja cꞌul, yuxan ma ja chaꞌ jaxca snaꞌbꞌal Naj? Jaach oj ja naꞌ, manaj jin oj walaꞌ. Al to wal ey jon tzetyetal ja wotaj tuꞌ.

34 Jaꞌ ebꞌ jelan chi abꞌen tzet chi walaꞌ, oj yal ebꞌ jaxca tiꞌ:

35 Man yotaj oj naj Job tiꞌ tzet chi yalaꞌ, cꞌam yeloc apnoj skꞌane naj chi yalaꞌ, ẍim ebꞌ.

36 Miman ojabꞌ cꞌal chi yun snaꞌle oc yibꞌan naj Job tiꞌ, yutol laan mi spajtzebꞌal oj ẍaꞌ naj jaxca junoj penawom.

37 Jaꞌ naj Job tiꞌ, man asanne oj tol ey spenail naj, yutol yel xacꞌal pit chi yute sbꞌa naj; cu sattaj wal chi bꞌuchwa naj yin Dios catuꞌ chi steelen sbꞌa naj yetoj, ẍi naj Eliú.