2 yin xacꞌal xaam wakꞌ eyecꞌ spajtzebꞌal ja kꞌane tiꞌ.

3 Jain tiꞌ yel cꞌal tzet oj wal ey jaach, oj wal tzetyetal tol naꞌbꞌilxa wu.

4 Jaꞌ Dios, Naj tol chi skeꞌ yu masanil, jaꞌ jix jin waꞌneni, jaꞌ chi akꞌon jin kꞌinal yuxan iquis jin.

5 Ta chi skeꞌ ja pajtzeni, takꞌwan ey jin; naꞌ tzet chi yun ja teelen ja bꞌa wetoj.

6 Laan cꞌal keloc apnoj cu cawanil sattaj Dios; yutol jaꞌ yin txꞌotxꞌ txꞌotxꞌ jix cu waꞌnelei.

7 Yu jun tuꞌ xin, ma skeꞌ tol oj jaach jin xibꞌte, ma skeꞌ tol yeynajil oj jaach wute.

8 Yutol jix wabꞌ ja walon jaxca tiꞌ:

9 Jain tiꞌ caw watxꞌ jin bꞌeybꞌal, cꞌam jin mul, cꞌam niꞌoj jin penail.

10 Tuxa cꞌal chi seyecꞌ Dios tzet chi yun wakꞌle queja, tuxa cꞌal chin yujte ecꞌ jaxca junoj scajat.

11 Jix yaoc cadena yin wajan, catuꞌ ey cꞌal oc sat win bꞌey chin ecꞌ ocoj, ja chi.

12 Jaꞌ jun kꞌane jaxca tuꞌ man watxꞌoj, yutol jaꞌ Dios caw miman yeoc kintaj jaon ánima jon tiꞌ.

13 ¿Tzet yuxan cha wal yin Dios tol cꞌam chi spajtze tzet cha kꞌan tet?

14 Jaꞌ Dios caw ecꞌal tujan tzet chi yute kꞌanabꞌ sbꞌa, jal jon jaon tiꞌ cꞌam chi naꞌcha el ku.

15 Ey bꞌey chi kꞌanabꞌ Dios yin weyicheal yet lalan cu wey yet akꞌbꞌalil, cꞌal yin ilwalil.

16 Jaꞌ yet weynaj jon tuꞌ chi kꞌanabꞌ Dios yin cu naꞌbꞌal, yet watxꞌ chi yun cancan scuybꞌanil tuꞌ yin cu naꞌbꞌal.

17 Queytuꞌ chi yunne yet watxꞌ chi yiꞌel sbꞌa ebꞌ ánima yin spenail, yet cꞌam chi yiꞌa can sbꞌa ebꞌ.

18 Queytuꞌ chi yun scolcha el ebꞌ tet camich, yet watxꞌ cꞌam chi qꞌueyle el ebꞌ yu.

19 Ey cꞌal pax bꞌey xin, tol chi akꞌle cuenta ebꞌ ánima yu Dios yetoj syaꞌilal, chi oc wal mimej syaꞌilal yin smimanil ebꞌ.

20 Jaꞌ masanil loꞌbꞌe caw watxꞌ, cꞌamxa chi yal scꞌul ebꞌ chi sloꞌ.

21 Chi tzꞌonbꞌitoj cu mimanil, txequel xacꞌal eltej cu bꞌajil tiꞌ yul cu tzꞌuumal.

22 Jaꞌ jun tuꞌ lalanxa stoo can bꞌey smujbꞌanil ebꞌ camom; eyxa ecꞌ bꞌey stiꞌ spuertail cambꞌal.

23 Kꞌinaloj ta jaꞌ xol ebꞌ yángel Dios, chi tit colwa yetoj junoj ánima, chi yalon tet Dios tol watxꞌ sbꞌeybꞌal jun tuꞌ,

24 catuꞌ chi yaloni tol chi okꞌ scꞌul Dios yin, jix scol can el yul skꞌabꞌ camich, yutol txequel ye mactxequel oj colon can eloj.

25 Jal smimanil tuꞌ oj waꞌxoj pax junelxa, oj uninbꞌoj smimanil jaxca yet jix titoc yin achꞌeal.

26 Jaꞌ yet chi kalon cu bꞌa tet Dios, chi yakꞌ swatxꞌcꞌulal ey jon. Yin tzalacꞌulal chi yun kiꞌon ey cu bꞌa sattaj Dios, yutol jacantej Dios cu sattaj yet chi cu txali tet, catuꞌ chi yakꞌon swatxꞌcꞌulal ey jon.

27 Chi kalon junjun jon sattaj ebꞌ ánima jaxca tiꞌ: Jix oc jin penail, jix wun tzetyetal man watxꞌoj, jal Dios ma yaoc syaꞌilal wibꞌan jaxca smooalil.

28 Tol jix jin col-le el yu bꞌey camich, yuxan iquis jin tocꞌal ecꞌoj, cu chi.

29 Ey bꞌey cael oxel queytuꞌ chi utele ebꞌ ánima yu Dios,

30 yu cu col-le el tet camich, catuꞌ chi yakꞌon tzalabꞌoj cu cꞌul junelxa.

31 Jaach Job abꞌ tzet oj walaꞌ, tzꞌin cꞌal ja chi yajbꞌan chin kꞌanabꞌi.

32 Ta ey tzet chi yoche ja cꞌul cha walaꞌ, chi skeꞌ ja takꞌwi ey jin. Chi woche tol watxꞌ chi yun ja kan sattaj Dios wetoj an.

33 Ta tol cꞌam tzet cha wal xin, abꞌ cꞌal tzet oj walaꞌ, oj jaach jin cuy yin jelanil, ẍi naj Eliú tet naj Job.