Jaꞌ Tzetyetal Jix Yal Naj Eliú
32
Jaꞌ yet jix yilon ebꞌ oxwan winaj tuꞌ tol yelcꞌulal chi yal naj Job tol cꞌam spenail, yuxan jix sbꞌej steelen sbꞌa ebꞌ yetoj naj. 2 Jal jun winaj a conobꞌ Buz chi yij Elihú, scꞌaal Baraquel, yicꞌaal Ram, caw jix tit sjowal yin naj Job, jaꞌ yet jix yiloni tol chi yal cꞌal oc sbꞌa naj watxꞌil, catuꞌ chi yaon can naj Job yul skꞌabꞌ Dios, tol jaꞌ chi uten naj jaxca tuꞌ. 3 Caw jix tit cꞌal pax sjowal naj tuꞌ yin ebꞌ oxwan yamigo tuꞌ, yutol ma naꞌcha el yu ebꞌ tzet jix yun spajtzen skꞌane naj Job ebꞌ, jacꞌalaꞌ yalon ebꞌ tol caw ey spenail naj sattaj Dios yalon ebꞌ. 4 Yutol caw achꞌe winaj to naj Elihú tuꞌ xol ebꞌ naj tuꞌ, yuxan jix too yechbꞌane slawi skꞌanabꞌ wanxa ebꞌ tuꞌ yetoj naj Job. 5 Jaꞌ yet jix yiloni tol cꞌamxa chi skeꞌ spajtzen ebꞌ tet naj Job, ma xa techa yu smitxꞌon oc tucan sbꞌa yetoj skꞌane chi yoche chi yalaꞌ, 6 jix yalon xacꞌaltoj yet Elihú tuꞌ xol ebꞌ, jix yalon jaxca tiꞌ:Wan Sbꞌabꞌel Kꞌane Naj Elihú
Jain tiꞌ achꞌe winaj jin to, jal jex jaex tiꞌ icham winaj jex xa, yuxan ma cꞌal yal jin cꞌul jix waltoj jin kꞌane xol je yet.
7 Jix jin naꞌ jaxca tiꞌ: Kꞌanabꞌ ojabꞌ ebꞌ icham winaj tuꞌ, xꞌox ojabꞌ el sjelanil ebꞌ, jin chi.
8 Asan xin, masanil ebꞌ ánima ey cꞌaltaꞌ snaꞌbꞌal ebꞌ, yutol jaꞌ Dios Naj chi skeꞌ yu masanil, jaꞌ jix akꞌon Yespíritu ey jon junjun jon.
9 Man yu oj tol mimanxa sbꞌisil kabꞌilal yuxan ey cu jelanil, tam wal yu icham winaj jon xa, yuxan chi naꞌcha el ku.
10 Jaꞌ yu jun tuꞌ yuxan chi walaꞌ: Smoo tol che yabꞌ tzet chi wal tinaniꞌ, yutol jain tiꞌ ey cꞌal pax niꞌoj tzet oj walaꞌ.
11 Jix jin maj wabꞌ tzetyetal jix je yalaꞌ, jix wil je naꞌoni tzet oj yun je pajtzen skꞌane jun naj jelan tiꞌ;
12 jix wilon cꞌal pax oj tol cꞌam junoj jex jaex tiꞌ jix skeꞌ je spajtzen tet naj Job jaxca wal xolilal.
13 Je yal tala oc je bꞌa jelanil. Yutol jaꞌ Dios oj pajtzen skꞌane naj Job tuꞌ, yutol ma skeꞌ je yu jaex tiꞌ.
14 Yutol manaj ey jin jix kꞌanabꞌ naj Job tiꞌ, yu jun tuꞌ yuxan man oj jin pajtze tet naj jaxca jix yun je kꞌanabꞌ jaex tiꞌ.
15 Jaꞌ tinaniꞌ xin, jaach Job, jaꞌ ebꞌ naj oxwan ja watxꞌil ánima tiꞌ, tucꞌal jix somcha a ja naꞌbꞌal yu ebꞌ naj, cꞌam kꞌane watxꞌ jix yun spajtzen ebꞌ ey jaach.
16 Jain tiꞌ ¿tumi oj skeꞌ jin tzꞌini eyoj caxcꞌal jaꞌ ebꞌ naj tiꞌ cꞌamxa chi naꞌcha tzet watxꞌ chi yal ebꞌ naj ey jaach, yutol cꞌamxa chi naꞌcha el yu ebꞌ tzet chi yun spajtzen kꞌane ebꞌ?
17 Yuxan jain tiꞌ, oj waoc jin bꞌa xol jun kꞌane tiꞌ, catuꞌ oj walon jin naꞌbꞌal.
18 Caw ecꞌal jin kꞌane chi skeꞌ waloni, cꞌamxa chi skeꞌ jin mitxꞌon oc tucan jin bꞌa yetoj;
19 tuxa chin nicꞌcha yu chi wabꞌe, jaxca wal junoj neet nonaj yu acꞌ vino.
20 Yuxan sowalil oj walaꞌ, catuꞌ oj akꞌlo jin cꞌul walon atej, sowalil oj wakꞌ junoj spajtzebꞌal ja kꞌane tuꞌ.
21 Jain tiꞌ man txꞌoj txꞌoj oj yili ebꞌ ánima yul jin sat, yutol laan jon cꞌal el cu masanil.
22 Caw yel, jain tiꞌ cꞌam chi woche chi wiꞌa can junoj mactxequel; chim jin qꞌueyle el yu Naj jix jin waꞌneni ta tol chi wun jaxca tuꞌ.