2 ¿Kꞌinaloj ta jix waon jin naꞌbꞌal yin ebꞌ ix? Ta jaxca tuꞌ, ¿tumi man oj yakꞌ spajtzebꞌal Naj a satcan ey jin, Naj tol chi skeꞌ yu Masanil?

3 ¿Tumi man jaꞌ oj yibꞌan ebꞌ penawom cꞌal yibꞌan ebꞌ cꞌam yeloc apnoj Dios yul sat chi jul syaꞌilal?

4 ¿Tumi cꞌam chi yil Dios tzetyetal chi wunne? ¿Tumi cꞌam chin yil bꞌey chin eqꞌui?

5 Chi wakꞌ jin tiꞌ tol cꞌam bꞌey jix waoc jin bꞌa yin spenail, cꞌam bꞌey jix ecꞌ yin jin naꞌbꞌal yu wetnen junoj wet animail.

6 Toloj wal chi naꞌle oc win yu Dios, ma chin echele yul junoj echbꞌal yet watxꞌ chi yilaꞌ tol tzꞌajan jin yin swatxꞌil.

7 Ta tol jix jin elcan yul sbꞌeal watxꞌ bꞌeybꞌale, ta tol jix watoj jin bꞌa xol tzetyetal ochbꞌetaj yili ocoj, ma ey stzetyetal ebꞌ ánima jix ilcha el win,

8 txꞌojxa ojabꞌ mactxequel chi loꞌon can eytoj tzetyetal jix wawaꞌ, sjot ojabꞌ atej xeꞌ tzetyetal tol awbꞌil wu.

9 Ta ey bꞌey jix wiloc jin cꞌul yin yistil junoj wet conobꞌ, ma ey bꞌey jix jin maj xacꞌal bꞌey stiꞌ spuertail sna,

10 oc ojabꞌ ix wistil tuꞌ yilomaloj jun mactxequel tuꞌ, wey ojabꞌ junoj txꞌoj winajil yetoj ix.

11 Ta jaxca tuꞌ jix wute jin bꞌa, smoo mi chi ale oc syaꞌilal wibꞌan yu ebꞌ juez.

12 Ta jaxca tuꞌ, laan mi jaxca junoj bꞌolobꞌ chi akꞌon tzꞌaꞌtoj masanil tzetyetal, quey ojabꞌ tuꞌ chi yun slawi el masanil tzetyetal ey, ey jin.

13 Ta ey tzet jix yal ebꞌ wakꞌomal servil ey jin, jix jin chaꞌ wabꞌ tzetyetal jix skꞌan ebꞌ ey jin.

14 Ta cꞌamaj, ¿tzet to wal chi yun woc sattaj Dios? ¿tzet to wal oj wute takꞌwoj jin bꞌa tet Naj yet oj skꞌanlen el tzet jix wunne?

15 Junne Dios jix cu akꞌon pitzcꞌu oc yin cu txutx yetoj ebꞌ wakꞌomal servil, jacꞌal pax oc Naj chi akꞌon kiquisal.

16 Cꞌam bꞌey tol ma jin colwa tet ebꞌ mebꞌa snan xol scawxinajil, tam wal jix yal jin cꞌul tol jix yetne scꞌul ebꞌ ix ix camnaj yichamil yu wail.

17 Jaꞌ yet jix jin lowi, jix wakꞌ sloꞌbꞌe ebꞌ mebꞌa unin.

18 Jaxca tol wuninal jix wute cꞌal oc ebꞌ mebꞌa unin tuꞌ; jain tiꞌ jix jin colwa tet ebꞌ ix ix camnajxa yichamil.

19 Jaꞌ yet jix wiloni tol ey mactxequel cꞌamxa cꞌal spichil, ma junoj mebꞌa tol cꞌamxa cꞌal tzetyetal eyoc yin,

20 jaꞌ xil noꞌ jin meꞌ jix waoc spichiloj ebꞌ; jix yal ebꞌ yu diosalil ey jin.

21 Ta ey bꞌey jix waoc jin kꞌabꞌ yin junoj mebꞌa unin, yu xacꞌal mi tol chabꞌil jin kꞌane yu ebꞌ yaaw,

22 ta jaxca tuꞌ, watxꞌ xacꞌal mi tol chi makꞌle kꞌatoj jin kꞌabꞌ; el ojabꞌ tujna jun jin kꞌabꞌ tiꞌ.

23 Jain tiꞌ chin xiw tet syaꞌilal chi yaoc Dios win, yutol man oj skeꞌ jin tecꞌbꞌan jin bꞌa sattaj yipalil Naj.

24 Cꞌam bꞌey tol asanne yin chꞌen tumin jix waoc jin naꞌbꞌal, tam wal jix waoc chꞌen oro yipoj jin cꞌul.

25 Cꞌam bꞌey jix woche xacꞌal tol chi a can jin bꞌeomal, cꞌam cꞌal bꞌey jix woche oc miman tumin.

26 Jix wil stzejejial yajan cꞌu, yetoj cꞌal pax yajan xꞌaaw tol caw watxꞌ xacꞌal yili,

27 man yu oj tuꞌ, cꞌam bꞌey jix jin oc yin eyilal yin ewantajil tet wan tuꞌ, cꞌam cꞌal bꞌey jix jin tzꞌubꞌel jin kꞌabꞌ yin jin txꞌoxon eloj yu woc yin eyilal tet wan tuꞌ.

28 Ta jix wun jaxca tuꞌ, smoo mi tol chi ale oc syaꞌilal wibꞌan; ta jaxca tuꞌ yin mi caabꞌ satil chi wiꞌey jin bꞌa tet Dios, Naj a satcan, chi yal tuꞌ.

29 Cꞌam bꞌey jix tzala jin cꞌul yu syaꞌilal jix yabꞌ ebꞌ jin cajat, tam wal jix jin tzala yet jix jul syaꞌilal yibꞌan ebꞌ.

30 Cꞌam bꞌey jix oc jin penail yu jin kꞌanontej scamichal ebꞌ.

31 Masanil ebꞌ caan ecꞌ wetoj, yotaj ebꞌ tol jaꞌ yet jix jul ebꞌ txꞌoj conobꞌal jin cꞌatan, cꞌam junoj ebꞌ tol ma wakꞌ lowoj.

32 Ma yal jin cꞌul tol chi cancan ebꞌ ecꞌabꞌwom bꞌey yul-laj calle yet akꞌbꞌalil; jajan cꞌal spuertail jin na tet ebꞌ.

33 Cꞌam bꞌey jix webꞌa el jin penail, jaxca chi yun wanxa ebꞌ, cꞌam bꞌey tol ewantaj yeoc jin penail wu,

34 yutol chin xiw tet ebꞌ ánima, tala pena tzet chi yal ebꞌ win. Cꞌam bꞌey jix jin majche octoj jin bꞌa yin ewantajil yul jin na yu xiwcꞌulal tet ebꞌ eyto wu jin bꞌa yetoj.

35 Toloj wal ey mactxequel chi abꞌen tzet chi walaꞌ. Jaꞌ masanil tzetyetal jix walaꞌ tutun caw yel tzet chi walaꞌ. Jaꞌ tinaniꞌ chi wechbꞌane spajtzebꞌal oj akꞌle ey jin yu Dios Naj tol chi skeꞌ yu masanil. Ta ey mac chi aon oc junoj kꞌane wibꞌan, tol oj wal tzꞌajan chi yun stzꞌibꞌen jun mac chi aon oc wibꞌan tuꞌ.

36 Chim waoc wan kꞌane tuꞌ sjolom jin xicꞌ, ma yin jin jolom jaxca junoj corona, yu jin maynen jin bꞌa yetoj.

37 Chim wal tet Dios masanil tzetyetal jix wunne, cꞌam mi chin qꞌuixwi wapni oc sattaj Naj.

38 Ta tucꞌal tokꞌbꞌil ecꞌ txꞌotxꞌ txꞌotxꞌ wu bꞌey chin mulnai, ta tucꞌal iꞌbꞌil ecꞌ wu tet ebꞌ ey xꞌotxꞌ,

39 ta tucꞌal jix jin loꞌeytoj tzet jix chꞌibꞌa tituꞌ yin ma jin toolane tet ebꞌ mulnawom, ta tucꞌal jix swaꞌne ebꞌ ey yet jun txꞌotxꞌ tuꞌ,

40 chꞌibꞌ ojabꞌ teꞌ qꞌuix bꞌey jin txꞌotxꞌ sqꞌuexeloj ixim tiriw, jaꞌ ojabꞌ an pena cꞌultaj chi chꞌibꞌa sqꞌuexeloj ixim cebada.

Jaꞌ yetoj wan kꞌane tiꞌ jix lawi skꞌanabꞌ naj Job yin scolon sbꞌa.