2 ¿Tzet tocꞌal chi oc yopiso ebꞌ tuꞌ wu? jaꞌ ebꞌ tuꞌ tuxa jix lawi ey yip ebꞌ.

3 Yu wail cꞌal yu mebꞌail, yuxan jix ecꞌ ebꞌ bꞌey txꞌotxꞌ cusiltaj txꞌotxꞌ yet akꞌbꞌalil; jaꞌ tituꞌ jix sjotatej tajin xeꞌ teꞌ ebꞌ scꞌuxuꞌ;

4 jix syambꞌan a an kꞌaꞌ ita ebꞌ bꞌey xol-laj teꞌ, jix sjoton atej xeꞌ teꞌ kꞌisbꞌal teꞌ ebꞌ sloꞌ.

5 Jaꞌton wan ánima tuꞌ intajnebꞌil el ebꞌ yu ebꞌ yet conobꞌ; chi el yaw ebꞌ chi ujtele ecꞌ ebꞌ jaxca chi yun yujtele ecꞌ ebꞌ elkꞌom.

6 Jaꞌ yul-laj chꞌen nachꞌen, cꞌal bꞌey satlaj jootxꞌ cꞌal bꞌey satlaj chꞌen jix kaey ecꞌ ebꞌ.

7 Jix awi eltej ebꞌ xol-laj cꞌultaj, jix syambꞌan sbꞌa ebꞌ yalan yenel teꞌ qꞌuix.

8 Caw cꞌam niꞌoj yeloc apnoj wan ánima tuꞌ, cꞌam yeloc apnoj smam ebꞌ, yuxan ujtebꞌil can eltoj ebꞌ yul sconobꞌ.

9 Jaꞌ tinaniꞌ chi bꞌuchwa yuninal ebꞌ win, caw chi yal jin kꞌumal ebꞌ.

10 Chin yaale yu ebꞌ, yuxan chi el ebꞌ jin cꞌatan, tol tax chi stzubꞌli oc ebꞌ yin jin sat.

11 Yuxan jaꞌ tinaniꞌ, yajbꞌan tol jix yiꞌel wopiso Dios, jaxa syaꞌilal jix yaoc wibꞌan, cꞌamxa weloc apnoj yul sat ebꞌ.

12 Jaꞌ ebꞌ ánima chi chichon oc scꞌul win, chi jul ebꞌ jin cꞌatan yet chin eyqꞌuey yu ebꞌ snaꞌoni, chi yakꞌon jowal ebꞌ wetoj, chi yoche xacꞌal ebꞌ chin yakꞌ camoj.

13 Chi smajche el jin bꞌe ebꞌ yet chin yakꞌ eyqꞌuey ebꞌ yaloni, cꞌamxa mac chi tenon oc tucan ebꞌ.

14 Jaxca junoj smuroal conobꞌ tol jajan bꞌey chi octej lemna ebꞌ win, ma jaxca junoj kaꞌeꞌ nabꞌ.

15 Queywal tuꞌ jix yun sjul xiwcꞌulal win. Jaꞌ jin bꞌinabꞌil, jix ela jaxca chi yun stoo kaꞌeꞌ. Jaꞌ tzettaj yetal ey, ey jin jix qꞌueycan a jaxca asun.

16 Jaꞌ tinaniꞌ lalan jin cami, cꞌamxa chi oc tucan jun jin yaꞌilal tiꞌ, cꞌamxa chi yoche jin cꞌul chin eyecꞌoj.

17 Jaꞌ syaꞌilal tiꞌ jix oc tacꞌal apnoj yul-laj jin bꞌajil; cꞌam chi oc tucan wabꞌen syaꞌil yet chi ecꞌ akꞌbꞌal.

18 Yetoj yipalil Dios jix sutꞌon oc jin pichil yin jin nukꞌ. Caw kꞌanani xacꞌal yeoc win, jaxca tol sutꞌan oc snukꞌ jin camiẍ win.

19 Jix jin kꞌojle ey yu xol stzokꞌom; jaxca xacꞌal pojoj ma stikꞌakꞌil taan weoc yul sat.

20 Jaach jin Diosal, caxcꞌal chin kꞌan ja colwal, cꞌam chach takꞌwi ey jin, caxcꞌal chi wal jin bꞌa ey jaach cꞌamxa cha chaꞌ ja wabꞌ tzet chi walaꞌ.

21 Caw pena xacꞌal jix ja wute ja naꞌbꞌal win, chin ja wujten ecꞌ yetoj sjowal ja cꞌul.

22 Jaxca tol chin ijletoj yu kaꞌeꞌ, jaxca tol chin tzicoꞌtanele yu kaꞌeꞌ nabꞌ.

23 Wotajxa tol lalanxa jin ja wiꞌontoj bꞌey camich; jaꞌton bꞌey tꞌinan cꞌaltaꞌ oj apnoj oc masanil ebꞌ ánima.

24 ¿Cꞌam cꞌal bꞌey ma jin colwa tet ebꞌ jix kꞌanon jin colwal?

25 Tumi ma jin okꞌ yu ebꞌ chi yabꞌ syaꞌil; jix cus jin cꞌul yu ebꞌ ey scawxinajil.

26 Jaꞌ yet chi woche chi ilcha oc tzalacꞌulal wu, jacꞌal pax cuscꞌulal chi jul wibꞌan. Jaꞌ yet chi wechbꞌane sajkꞌinal, jaꞌ kꞌejkꞌinal chi jul win.

27 Tuxa cꞌal chi pucꞌxi a jin pixan yu xiwcꞌulal, cꞌamxa bꞌey chi wiꞌ niꞌoj wip; asanxane syaꞌilal chi jul wibꞌan.

28 Jix jul wal cuscꞌulal wibꞌan, cꞌamxa chi wil niꞌoj sajil yajan cꞌu; sattaj wal masanil ánima jix jin a waanoj, yu jin kꞌanon colwal.

29 Caw cusiltaj xacꞌal yel waw jaxca noꞌ ooj ma jaxca noꞌ tonton.

30 Jaꞌ jin mimanil tiꞌ, caw chi chiꞌwa yinlaj masanil yu kꞌakꞌ, catuꞌ jix kꞌejbꞌi el jin tzꞌuumal.

31 Jaꞌ yet yalantoj, chin bꞌitni yin tzalacꞌulal yetoj mitxꞌkꞌabꞌe yet bꞌit, jaxa tinaniꞌ, asan xacꞌal okꞌil chi wunne.