3 Jaꞌ yet tuꞌ, cꞌam bꞌey chin xiw tet kꞌejkꞌinal yutol tzejtenebꞌil jin yu Dios.

4 Jaꞌ yet caw achꞌe winaj jin to an, jaꞌ yet tuꞌ caw eyecꞌ syaaxilal Dios yibꞌan tzet ey, ey jin.

5 Jaꞌton yet tuꞌ ey cꞌal ecꞌ Naj tol chi skeꞌ yu masanil tzetyetal wetoj; jaꞌ ebꞌ wuninal joyan oc ebꞌ winlaj.

6 Jaꞌ yet tuꞌ, cꞌamxa chi alcha jantaj noꞌ lech chi yamcha el yin noꞌ jin wacax. Jaꞌ teꞌ olivo awbꞌil wu xol-laj chꞌen, cꞌamxa chi alcha jantaj aceite olivo chi yamcha el yin teꞌ wu an.

7 Jaꞌ yet chin apni oc xol ebꞌ ánima yin junoj yambꞌabꞌail, caw seybꞌil jin ẍila yu ebꞌ bꞌey chin ey chotanoj, yet chi txeclo eloj tol miman weloc apnoj sattaj ebꞌ conobꞌ,

8 jaꞌ yet chin yilon ebꞌ achꞌe, chi el ebꞌ yul jin bꞌe; jaxa ebꞌ ichamtaj winaj, chi a linan ebꞌ yet chin yilon ebꞌ.

9 Jaꞌ ebꞌ syaawil conobꞌ chi sbꞌej ebꞌ skꞌanabꞌi, chi xꞌoxon ebꞌ yetoj skꞌabꞌ tol chi stzꞌini ey wanojxa ebꞌ ánima.

10 Jaꞌ ebꞌ syaawil conobꞌ, chi yiꞌeytej yul snukꞌ ebꞌ, tuxa cꞌal chi sason ebꞌ.

11 Jaꞌ yet chin yilon ebꞌ ánima cꞌal yabꞌen ebꞌ tzet chi walaꞌ, caw chi yaoc xiquin ebꞌ yin, chi yal watxꞌ kꞌane ebꞌ win an.

12 Yutol jix jin colwa tet ebꞌ cꞌamxa smam xutx cꞌal yetoj tet ebꞌ mebꞌa, jaꞌton ebꞌ cꞌam mac chi colon el xol syaꞌilal.

13 Jaꞌ ebꞌ lalan scam yu mebꞌail, jix yal yu diosal ebꞌ ey jin; chi tzala a scꞌul ebꞌ ix ix camnajxa yichamil yu jin colwal an.

14 Jaꞌ swatxꞌilal cꞌal jijemal ey cꞌal ecꞌ win, jaxca tol jin pichil yeocoj.

15 Jix jin quetzecꞌ ebꞌ cꞌam chi skeꞌ yilwani, jix jin colwa cꞌal pax tet ebꞌ cꞌam chi skeꞌ sbꞌeyi.

16 Jaxca wal tol mame weoc yin ebꞌ ey scawxinajil, jix jin colwa tet ebꞌ txꞌoj conobꞌal yin swaꞌxi yeoc junoj skꞌane ebꞌ.

17 Jix wiꞌel yopiso ebꞌ lalan yetnen ánima, catuꞌ jix jin colon can el ebꞌ ánima lalan wal yetnele yu ebꞌ.

18 Jix walon yin jin naꞌbꞌal jaxca tiꞌ: Jain tiꞌ, laan sbꞌisil cꞌual oj wilaꞌ jaxca sbꞌisil yarenail stiꞌ jaꞌ mar, yin xa icham winajil oj yun jin cam bꞌey caan jin tiꞌ.

19 Laan jin jaxca junoj teꞌ teꞌ awbꞌil bꞌey stiꞌ junoj jaꞌ jaꞌ, jaxa yin skꞌabꞌlaj teꞌ chi low yal akꞌbꞌal yet akꞌbꞌalil.

20 Watxꞌ cꞌal oj yun jin yakꞌon bꞌina ebꞌ ánima, cꞌam bꞌakꞌin oj pax wip, cꞌam bꞌakꞌin oj lawoj jin bꞌinalei.

21 Masanil ánima jix yaoc xiquin yin tzet jix walaꞌ, tzꞌin xacꞌal ẍi ebꞌ yet jix yabꞌen jin naꞌbꞌal ebꞌ.

22 Jaꞌ yet jix lawi jin kꞌanabꞌi, tumi ey mactxequel jix scaecꞌne yaloni. Jaꞌ jin kꞌane watxꞌ cꞌal jix yabꞌ ebꞌ.

23 Jix yoche wal ebꞌ jix yabꞌ jin kꞌane tzet jix walaꞌ, jaxca wal yochen nabꞌ ebꞌ mulnawom yet ey waresma.

24 Jaꞌ yet chin tzeewi yetoj ebꞌ, ian cꞌam chi yaoc ebꞌ yin scꞌul ta yel, cꞌamxa chi yiꞌel sat ebꞌ win yet chin tzala yetoj ebꞌ.

25 Jix jin txꞌoxel wopiso xol ebꞌ, catuꞌ jix jin naꞌon tzetyetal sowalil chi yun ebꞌ. Jix wute jin bꞌa xol ebꞌ jaxca junoj rey chi ijbꞌan ebꞌ soldado. Jaꞌ yet eyoc ebꞌ yin cuscꞌulal, jain jix jin mimancꞌulne ebꞌ.