2 Jaꞌ chꞌen hierro chi iꞌle el chꞌen xol txꞌotxꞌ txꞌotxꞌ, jal chꞌen chꞌen xin, jaꞌ yet chi tzꞌaꞌ chꞌen, chi eltej chꞌen cobre yin.

3 Jaꞌ ebꞌ ánima chi mulna oc yin chꞌen, cꞌam cꞌal yeloc apnoj kꞌejkꞌinal yul sat ebꞌ; chi eytoj ebꞌ yul-laj jolan naat yich. Jaꞌ bꞌey xol kꞌejkꞌinal tuꞌ, jaꞌ tituꞌ chi seyecꞌ chꞌen oro ebꞌ.

4 Chi seyatej minas ebꞌ bꞌey naat yeel stiꞌlaj conobꞌ, jaꞌton bꞌey cꞌamxa chi ecꞌ ebꞌ ánima. Yetoj xa lasu chi ecꞌ tꞌununoj ebꞌ yet chi mulna ebꞌ.

5 Jal bꞌey sat txꞌotxꞌ txꞌotxꞌ, chi chꞌibꞌa tzet chi loꞌlei, jaxa bꞌey yalan txꞌotxꞌ txꞌotxꞌ uchquiltaj yeoc yu kꞌakꞌ.

6 Jaꞌ tituꞌ, chi ilcha chꞌen zafiro, yetoj chꞌen oro calan yetoj txꞌotxꞌ.

7 Jaꞌ bꞌey chi eltej minas tuꞌ, cꞌam chi skeꞌ yapni oc noꞌ chii cꞌal noꞌ milano, tam wal junojxa tujan noꞌ noꞌ chi skeꞌ yapni ocoj.

8 Jaꞌ noꞌ chiꞌwawom noꞌ cꞌamxa chi ecꞌ noꞌ tituꞌ, tam wal noꞌ icham león.

9 Jaꞌ ebꞌ winaj chi eytoj tꞌununoj yul-laj jolan chꞌen tuꞌ, catuꞌ chi cꞌoli sjoton atej yichlaj mimej wonan ebꞌ.

10 Chi sjot jolan ebꞌ, naat chi yun yich bꞌey satlaj chꞌen yu ebꞌ, catuꞌ chi seyon ecꞌ masanil tujan bꞌeomal ebꞌ tituꞌ.

11 Chi sjotatej jaꞌ snukꞌ jaꞌ ebꞌ tituꞌ, catuꞌ chi yiꞌon atej ebꞌ bꞌey xol sajkꞌinal jantaj tzetyetal tol ewan cꞌuan yeocoj.

12 Yu jun tuꞌ xin ¿bꞌeytuꞌ chi caꞌ stitoc jun jelanilal tuꞌ? ¿bꞌeytuꞌ chi titoc jun jelan naꞌbꞌale tuꞌ?

13 Man yotaj oj ebꞌ ánima jantaj yeloc apnoj jun tuꞌ, yutol cꞌam chi ilcha oc xol ebꞌ ánima bꞌey yul yibꞌankꞌinal tiꞌ.

14 Caxcꞌal chi cu seyecꞌ yich jaꞌ mar, man oj ilcha oc jelan naꞌbꞌale ku tituꞌ.

15 Cꞌam chi skeꞌ cu manon yetoj oro, tam wal yetoj chꞌen plata.

16 Cꞌam chi skeꞌ chi toolanele yetoj chꞌen oro caw watxꞌ yili, tam wal yetoj chꞌen cornalina ma yetoj chꞌen zafiro.

17 Jaꞌ jun tuꞌ, yel xacꞌal ecꞌbꞌan swatxꞌil yintaj chꞌen oro ma yintaj chꞌen cristal cꞌal yintaj chꞌen nen, cꞌam chi skeꞌ chi qꞌuexle yetoj chꞌen oro waꞌnebꞌilxa.

18 Jaꞌ jelanil naꞌbꞌale yel xacꞌal ochebꞌil yintaj chꞌen chꞌen chi yij coral. Ecꞌbꞌan swatxꞌilal yintaj chꞌen chꞌen chi yij perla, cꞌam chi skeꞌ ku laanbꞌanen jun jelanil tuꞌ yetoj chꞌen.

19 Jaꞌ chꞌen crisólito chi tit bꞌey Etiopía cꞌam chi skeꞌ ku laanbꞌanen yetoj chꞌen, tam wal chi skeꞌ chi toolanele yetoj chꞌen oro yel xacꞌal watxꞌ scawxi.

20 ¿Bꞌeytuꞌ chi kaꞌ stitoc jelanilal tuꞌ xin? ¿Tzet conobꞌal bꞌey chi ilcha oc jun jelan naꞌbꞌale tuꞌ?

21 Jaꞌ jun tuꞌ cꞌuan el tet masanil ebꞌ ánima iquis yeecꞌ yul yibꞌankꞌinal tiꞌ, tol tax cꞌam chi yil noꞌ tzꞌiquin jun jelanil tuꞌ.

22 Jaꞌ camich cꞌal bꞌey cꞌuan spixan ebꞌ camom, jix yal ebꞌ jaxca tiꞌ: Jaꞌ skꞌaneal jun tuꞌ tucꞌal jix kꞌabꞌ niꞌoj skꞌaneal, ẍi ebꞌ.

23 Jal Dios yotaj sbꞌeal jelanil; asanne Naj yotaj bꞌey chi ilcha oc jun tuꞌ.

24 Yutol chi yil Dios masanil slawubꞌal txꞌotxꞌ txꞌotxꞌ tiꞌ, yetoj cꞌal masanil tzetyetal ey bꞌey yalan satcan tiꞌ.

25 Jaꞌ yet jix waꞌnele can oc kaꞌeꞌ yu Dios, cꞌal yet jix yaon can oc smoonal jaꞌ jaꞌ,

26 jaꞌ yet jix swaꞌnen can oc xolilal nabꞌilkꞌinal cꞌal xꞌoxon can oc sbꞌeal raya yet chi makꞌwa cꞌu,

27 jaꞌ yet tuꞌ, jix yilon cꞌal pax jelanilal tol caw miman yeloc apnoj jix snaꞌon yibꞌan, jix yilon xin tol watxꞌ jix yunne.

28 Jix yalon Dios tet ebꞌ ánima jaxca tiꞌ: Ta miman weloc apnoj yul je sat, jaꞌton wal jelanilal tuꞌ; ta che poꞌoel je bꞌa xol spenail, jaꞌton wal jun jelan naꞌbꞌale tuꞌ xin, ẍi Dios, ẍi naj Job.