3 yajbꞌan chi to yakꞌ wip yet chi skeꞌ wiꞌon jin kaꞌeꞌ,

4 cꞌam cꞌal bꞌey oj wal tzet man yeloj, cꞌam cꞌal bꞌey oj wal lekꞌtiꞌal kꞌane.

5 Yajbꞌan iquis jin to, cꞌam bꞌakꞌin oj walaꞌ tol yel che yalaꞌ, man oj jin chaꞌ wabꞌe ta tol yu jin penail yuxan queytuꞌ chi wunne.

6 Jain tiꞌ, oj walaꞌ tol watxꞌ xacꞌal jin naꞌbꞌal, cꞌam bꞌakꞌin oj jin qꞌuextoj jin kꞌane oj walaꞌ, yutol wotaj tol cꞌam jin penail.

7 Masanil ebꞌ chi jowi oc win, tit ojabꞌ syaꞌilal yibꞌan ebꞌ jaxca chi yun stit syaꞌilal yibꞌan ebꞌ penawom.

8 ¿Tzet to wal yetal eyoc yipoj scꞌul ebꞌ penawom, ta chi iꞌle el skꞌinal ebꞌ yu Dios?

9 Jaꞌ yet eyoc ebꞌ yin syaꞌtajilal, ¿Tumi chi chaꞌle xa ebꞌ yu Dios?

10 ¿Tumi oj skeꞌ yakꞌle stzalacꞌulal ebꞌ yu Dios, Naj Chi Skeꞌ yu Masanil, ta cꞌam bꞌey chi yal sbꞌa ebꞌ tet?

11 Jaꞌ tinaniꞌ oj jin txꞌox miman yipalil Dios ey jex, Naj tol Chi Skeꞌ yu Masanil, cꞌal jantaj tzetyetal tol naꞌbꞌilxa yu.

12 Ta tol je yilnaj xa masanil wan tuꞌ jaex tiꞌ, ¿tzet yuxan cꞌam cꞌal yeloc apnoj wan je kꞌane che yalaꞌ?

13 Jix yalon naj Zofar jaxca tiꞌ: Jaꞌ Dios Naj Chi Skeꞌ Yu Masanil, jaꞌ syaꞌilal chi skeꞌ yakꞌon spajtzebꞌaloj tet ebꞌ chi etnen ánima.

14 Caxcꞌal ecꞌal yuninal ebꞌ, sowalil oj cam ebꞌ xol jowal ma yu wail.

15 Jal ebꞌ iquisto can ecꞌoj, jaxa syaꞌilal oj akꞌon cam ebꞌ, jal yistil ebꞌ oj cancanoj, man oj okꞌ ebꞌ ix ix tuꞌ yu ebꞌ.

16 Jaꞌ ebꞌ penawom tuꞌ, caxcꞌal miman chꞌen tumin chi syambꞌa ecꞌ bꞌulan ebꞌ jaxca txꞌotxꞌ txꞌotxꞌ, caxcꞌal tuxa cꞌal bꞌulan ecꞌ spichil ebꞌ,

17 jal ebꞌ watxꞌ sbꞌeybꞌal cꞌal ebꞌ tol jijem oj aon can oc wan pichile tuꞌ, jaxa mi ebꞌ oj yakꞌ snaꞌbꞌaloj yetoj chꞌen plata tuꞌ.

18 Jaꞌ sna ebꞌ penawom tuꞌ, caw cꞌuun spoꞌotoj jaxca sweyubꞌ noꞌ tzolol ma jaxca sweyubꞌ noꞌ tzꞌiquin bꞌey chi chꞌibꞌi, ma jaxca junoj pat waꞌnebꞌil a xol mulnail.

19 Jaꞌ ebꞌ penawom oj ey telan ebꞌ swey yet chi kꞌejbꞌicantoj yetoj sbꞌeomal, jaxa yet oj el sweyan ebꞌ cꞌamxa sbꞌeomal ebꞌ eyecꞌ yetoj.

20 Jaꞌ xiwcꞌulal oj low xacꞌal yin ebꞌ jaxca jaꞌ elom jaꞌ, jaxca chi yun xuꞌletoj junoj tzetyetal yu mimej kaꞌeꞌ nabꞌ yet akꞌbꞌalil.

21 Yin jun txolan oj iꞌle el ebꞌ bꞌey caan ecꞌoj, jaxca chi yun yiꞌle bꞌey junoj tzetyetal yu junoj miman kaꞌeꞌ chi tit bꞌey chi aol cꞌu.

22 Oj akꞌle lawoj el ebꞌ yu, caxcꞌal chito yakꞌle scolon sbꞌa ebꞌ.

23 Jaꞌ jun kaꞌeꞌ tuꞌ, caw jow oj yun yoc xumomoj yin ebꞌ, jaxca tuꞌ oj yun sqꞌueyle el ebꞌ yin junelne, ẍi naj Job.