3 Watxꞌ xin, caw ja wotaj cha wakꞌ naꞌbꞌale cꞌal cuybꞌanile ey jin an, yet cha wakꞌon jin naꞌbꞌal.

4 ¿Mactxequel jix alon ey jaach yuxan cha wal wan kꞌane tuꞌ? ¿Mactxequel jix jaach ijbꞌani yuxan chach kꞌanabꞌ jaxca tuꞌ?

5 Catuꞌ jix yalon cꞌal naj Bildad jaxca tiꞌ: Jaꞌ ebꞌ camom eyecꞌ yul txꞌotxꞌ cꞌal yalan jaꞌ mar, caw chi ecꞌ txꞌumumoj ebꞌ yabꞌen syaꞌil.

6 Jaꞌ cambꞌal bꞌey eyecꞌ ebꞌ camnajxatoj, man ewan cꞌuanoj yeoc sattaj Dios, yuxan cꞌam junoj tzetyetal chi skeꞌ yewbꞌale el sattaj Dios.

7 Jaꞌ Dios jix jenbꞌantoj satcan yetcꞌulaltoj norte yin tol cꞌam bꞌey tꞌunan can ocoj, jix swaꞌne can pax ey txꞌotxꞌ txꞌotxꞌ yin tol cꞌam bꞌey bꞌatxan can ey sbꞌatxlubꞌal.

8 Jaꞌ Dios chi majchen cantoj jaꞌ jaꞌ xol asun, cꞌam chi poꞌotoj asun tuꞌ yu yalil jaꞌ.

9 Jaꞌ chi majchen el sat xꞌaaw; caxcꞌal caw jow yajan xꞌaaw, catuꞌ chi scꞌubꞌan cantoj asun yet watxꞌ cꞌamxa chi yakꞌ nabꞌ.

10 Jaꞌ Dios jix aon ey yechel bꞌey chi apni oc ian jaꞌ mar, jaxca yakꞌon cꞌualil yetoj akꞌbꞌalil, snan xol sajkꞌinal yetoj kꞌejkꞌinal.

11 Ta tol jaꞌ Dios chi tit sjowal, caw chi bꞌilwi a wan wonanlaj cꞌal sbꞌatxlubꞌal satcan bꞌey bꞌatxan eyoj.

12 Jaꞌ yetoj yipalil chi akꞌon bꞌilwoj jaꞌ mar; jaꞌ yetoj sjelanil yuxan jix eyqꞌuey noꞌ miman noꞌ chi yij Rahab.

13 Tucꞌal chi xutoj skaꞌeꞌ, catuꞌ chi jajlo a bꞌey satcan, yetoj skꞌabꞌ chi smakꞌon cam noꞌ labꞌa tuxa cꞌal chi too bꞌacꞌlabꞌoj yet chi bꞌeyi.

14 Jaꞌ wan kꞌane qꞌueyubꞌtaj yal-le tiꞌ, jaxca tol stiꞌlaj xacꞌal smulnail Dios. Jaꞌ tzet jix ja wabꞌ tiꞌ tucꞌal wal jix kabꞌ skꞌumal. Jajxa tam wal tol tzꞌajan jix yun kabꞌeni. ¿Tumi oj skeꞌ snaꞌcha el sjelanil Dios ku?