2 Jain tiꞌ, yel xacꞌal cꞌam niꞌoj jin naꞌbꞌal yintaj masanil ebꞌ wet animail, cꞌam jin naꞌbꞌal jaxca snaꞌbꞌal ebꞌ tuꞌ.

3 Ma jin cuy jin jelanil, man wotaj oj niꞌoj, tzet utbꞌil wal yeoc jun Dios tol miman yeloc apnoj.

4 ¿Mac wal jix atoj bꞌey satcan cꞌal yey pax tej? ¿Mactxequel chi skeꞌ smitxꞌon a kaꞌeꞌ yetoj skꞌabꞌ? ¿Mactxequel chi skeꞌ spichon jaꞌ mar yetoj xotil? ¿Mactxequel jix aon ey smoonal txꞌotxꞌ txꞌotxꞌ tiꞌ? Al ey jin, ta tol je yotaj tzet sbꞌi, cꞌal tzet sbꞌi scꞌaal.

5 Jaꞌ Dios chi teynen ebꞌ chi yaoc scꞌul yin; masanil tzetyetal bꞌey chi yakꞌ can stiꞌ, smoo ton wal chi kaoc yipoj cu cꞌul.

6 Cꞌam ojabꞌ cha waoc stzꞌajil tzetyetal jix yalcanoj, ta che yunne oj jex tzule yu, catuꞌ chex ilcha oc yin je lekꞌtiꞌal.

7 Jaach Jehová jin Diosal, asan caabꞌ tzetyetal chin kꞌan ey jaach; jaꞌ tzet chin kꞌan tiꞌ, akꞌ ey jin, yet cꞌamto chin cami:

8 Cꞌam ojabꞌ chin ja chaꞌoc yin lekꞌtiꞌal, cꞌal yin wetnen junoj wet animail; cꞌam ojabꞌ chin oc yin bꞌeomal, tam wal yin mebꞌail; asan ojabꞌ cha wakꞌ jin loꞌbꞌe chi oc yopiso wu junjun cꞌu.

9 Ta tol yel xacꞌal miman tzetyetal ey yul jin kꞌabꞌ, ey smey chach too qꞌueycꞌulal wu, catuꞌ chi walon aoj tol man jaach wotaj oj. Ta cꞌam pax tzetyetal ey, ey jin, jin too tala pax yin elkꞌan, catuꞌ chi oc jin penail ey jaach, catuꞌ chi al-le pena kꞌane ja win jin yaꞌiloj.

10 Cꞌam ojabꞌ cha wal pena kꞌane yin junoj yakꞌomal servil sattaj spatrón, tala cꞌuxan chach intajnele can el yu jun eyoc yakꞌomaloj servilal tuꞌ, catuꞌ cha wabꞌen syaꞌil yu.

11 Ey mactxequel chi yal pena kꞌane yin smam, catuꞌ cꞌam bꞌey chi yal niꞌoj watxꞌ kꞌane yin xutx.

12 Ey mactxequel chi snaꞌ tol caw cꞌam niꞌoj spenail, cꞌam pax chi skꞌan mimancꞌulal yu spenail chi el yunen tuꞌ.

13 Ey mactxequel chi snaꞌ tol caw miman yeloc apnoj, caw chi smimanbꞌane sbꞌa tet wanojxa.

14 Ey mac caw cꞌam chi okꞌ scꞌul yin ebꞌ mebꞌa, caw chi etnele ebꞌ yu, catuꞌ chi stokꞌon xacꞌal ecꞌ tzetyetal tet ebꞌ.

15 Ey cacꞌon yuneꞌ noꞌ uqꞌuem chicꞌ, asan cꞌal skꞌanon sloꞌbꞌe noꞌ chi yunne. Ey oxebꞌ tzetyetal cꞌal junxa yet scan, tol cꞌam bꞌakꞌin chi oc tucan yochen tzetyetal:

16 Jaꞌton smujbꞌanil ebꞌ camom, ix ix cꞌam chi uneꞌwi, txꞌotxꞌ txꞌotxꞌ cꞌam jaꞌ chi aol sat, cꞌal kꞌakꞌ kꞌakꞌ cꞌam chi oc tucan stzꞌaꞌtoj siꞌ yu.

17 Jaꞌ mactxequel chi yintajne el smam catuꞌ cꞌam chi sjije tzet chi yal xutx, jaꞌ jun tuꞌ smoo wal tol chi iꞌle eltej sbꞌakꞌ sat yu noꞌ joo, catuꞌ chi chiꞌle eytoj ẍiꞌbꞌeal yu noꞌ miij.

18 Ey oxebꞌ tzetyetal cꞌal junxa yet scan, chi qꞌueya jin cꞌul yu, catuꞌ cꞌam chi naꞌcha el wu:

19 Jaꞌton tzet chi yun stoo jenenoj noꞌ chii satcan, tzet wal chi yun sbꞌeyecꞌ noꞌ labꞌa satlaj chꞌen, tzet chi yun stoo junoj teꞌ barco yibꞌan jaꞌ miman mar, cꞌal tzet chi yun smontele sbꞌa naj winaj yetoj ix ix.

20 Caw wal chi qꞌuey cꞌal pax a jin cꞌul yu tzet chi yute sbꞌa junoj ix ix ey yichamil, catuꞌ chi too ix yin amulal. Chi mulwi ix, chi lawi tuꞌ chi aẍni, catuꞌ chi yalon jaxca tiꞌ: Tumi ey spenail chi el wuneni, ẍi ix.

21 Ey oxebꞌ tujan ánima cꞌal junxa yet scan tol cꞌam chi techa sbꞌeybꞌal ku chi wilaꞌ, jaxa cꞌal ebꞌ chi bꞌina sbꞌi yul cu conobꞌ:

22 Junoj yakꞌomal servil chi oc yin reyal, ma junoj cꞌam snaꞌbꞌal tol caw chi yakꞌ sobra sloꞌbꞌe,

23 ma junoj ix ix comon cꞌal yili, tol chi oc pax yichamil, yetoj pax junoj ix ix eyoc yin yakꞌomaloj servil, jaꞌ chi oc can sqꞌuexeloj ix bꞌey eyoc yin yakꞌomaloj servil tuꞌ.

24 Ey canebꞌ tujan noꞌ kocꞌ noꞌ bꞌey sat txꞌotxꞌ txꞌotxꞌ tiꞌ, tol ey snaꞌbꞌal yintaj mac jelan snaꞌbꞌal:

25 Jaꞌ noꞌ sanic, jun wal miman bꞌulan chi yun yecꞌ noꞌ, jaxca tol cꞌam yip noꞌ, jaꞌ jun tujan noꞌ noꞌ tuꞌ, chi syambꞌa can sloꞌbꞌe noꞌ yet nabꞌilkꞌinal;

26 jaꞌ noꞌ txitx, cꞌam yip noꞌ, jaꞌ yul-laj chꞌen chi wey noꞌ;

27 jaꞌ noꞌ kochiꞌ, cꞌam junoj syaawil noꞌ chi ijbꞌani, yin pax xolilal chi yun sbꞌey noꞌ;

28 jaꞌ noꞌ xim, chi skeꞌ cu mitxꞌon ey noꞌ yu cu kꞌabꞌ, chi apni cꞌal pax oc noꞌ bꞌey sna ebꞌ naj rey.

29 Ey oxebꞌxa tujan noꞌ noꞌ caw wal jelan chi yute sbꞌa, ey cꞌal pax junxa tujan noꞌ yet scan:

30 Jaꞌton noꞌ bꞌalam, jaꞌ noꞌ tuꞌ yel xacꞌal ey smey noꞌ, tol cꞌam chi xiw noꞌ tet junoj tzetyetal;

31 jaꞌ noꞌ atzꞌokꞌ, caw chi smeyne sbꞌa noꞌ, yetoj cꞌal noꞌ icham chiw chi smeyne cꞌal pax sbꞌa noꞌ, quey cꞌal pax tuꞌ junoj rey tol chi bꞌabꞌi too sattaj ebꞌ soldado yin yakꞌon jowal.

32 Ta yin cꞌal ja comon naꞌbꞌal cha mimanbꞌane ja bꞌa, catuꞌ cha naꞌon ja waꞌnen junoj tzetyetal man watxꞌoj, yel watxꞌ ta yin sbꞌabꞌelal chi cam wal ja naꞌon sicꞌlebꞌil tzet cha wunne.

33 Ta tol chi cal-le noꞌ lech, queytuꞌ chi yun swaꞌxi el noꞌ mantequilla, ta cha makꞌ ja txaam, chi tit ẍiqꞌuil, ta tol cha txꞌem junoj mactxequel, jowalxa chi yun slawi can apnoj, ẍi naj Agur.