2 Jaꞌ yet chi oc ebꞌ watxꞌ snaꞌbꞌal yin yopiso, caw chi tzala ebꞌ ánima; jal ta pena ebꞌ chi oc yin yaawil xin, caw chi cus scꞌul ebꞌ ánima.

3 Jaꞌ junoj uninale watxꞌ snaꞌbꞌal, caw chi yakꞌ tzalabꞌoj scꞌul smam. Jaꞌ mactxequel chi oc tzajan yintaj ebꞌ ix amul ix, caw chi yakꞌ lawoj ey stumin.

4 Jaꞌ junoj yaaw watxꞌ chi yun swaꞌnen yeoc junoj jowal, caw watxꞌ chi yun yeloc sconobꞌ tuꞌ; jal pax junoj yaaw tol asan cꞌal tumin chi skꞌaneloj, jaꞌ jun tuꞌ chi yakꞌ lawoj ey sconobꞌ.

5 Jaꞌ mactxequel tucꞌal chi slan yalon watxꞌ kꞌane yin yamigo, jaxca tol lalan yaon ey yaal sattaj jun yamigo tuꞌ.

6 Jaꞌ junoj pena sbꞌeybꞌal, jaꞌ spenail tuꞌ laan jaxca junoj yaal yeoc tet; jal pax ebꞌ watxꞌ snaꞌbꞌal xin, cꞌam cꞌal tzet chi snaꞌ ebꞌ, yutol tzalacꞌulal cꞌal yeoc ebꞌ.

7 Jaꞌ junoj yaaw watxꞌ snaꞌbꞌal, watxꞌ chi yute swaꞌnen yeoc junoj kꞌane xol ebꞌ mebꞌa; jal pax junoj pena snaꞌbꞌal xin, cꞌam yeloc apnoj ebꞌ mebꞌa yul sat.

8 Jaꞌ ebꞌ bꞌuchwawom chi yucha bꞌulna junoj conobꞌ ebꞌ; jal pax ebꞌ ey snaꞌbꞌal xin, yotaj ebꞌ chi yakꞌ sicbꞌoj ey jowal.

9 Ta jaꞌ junoj ey snaꞌbꞌal chi steele sbꞌa sattaj juez yetoj junoj cꞌam snaꞌbꞌal, jaꞌ jun cꞌam snaꞌbꞌal tuꞌ, cꞌuun stit sjowal, ma tucꞌal chi bꞌuchwa aoj, cꞌam tzetyetal chi waꞌxi oc yu.

10 Jaꞌ ebꞌ makꞌom cam ánima, chi intajnele el ebꞌ watxꞌ snaꞌbꞌal yu ebꞌ, chi yoche ebꞌ chi smakꞌ cam ebꞌ watxꞌ snaꞌbꞌal tuꞌ.

11 Jaꞌ ebꞌ pena snaꞌbꞌal, cꞌam chi techa yewbꞌan ey sjowal sjolom ebꞌ, jal pax ebꞌ ey snaꞌbꞌal xin, chi smitxꞌoc tucan sbꞌa ebꞌ yetoj sjowal scꞌul.

12 Ta jaꞌ junoj yaaw chi ẍaꞌ yabꞌ lekꞌtiꞌal, masanil ebꞌ eyoc yin yopiso yetoj, lekꞌtiꞌ cꞌal el ebꞌ masanil.

13 Jaꞌ mactxequel chi etnelei, cꞌal ebꞌ chi yetne yet animail, laan cꞌal yeloc apnoj ebꞌ; jaꞌ Jehová jix waꞌnen ebꞌ, yuxan chi skeꞌ yilwan ebꞌ scawanil.

14 Jaꞌ junoj yaaw watxꞌ chi yute swaꞌnen yeoc junoj kꞌane xol ebꞌ mebꞌa, caw watxꞌ cꞌal yeoc ebꞌ yin yopiso.

15 Jaꞌ mactxequel chi yabꞌ syaꞌil yu yakꞌle cuenta, chi waꞌxi oc snaꞌbꞌal jun tuꞌ; jal pax ebꞌ uninale cꞌam chi akꞌle cuenta xin, chi yakꞌ sqꞌuixwiloj xutx ebꞌ.

16 Jaꞌ yet chi a can ebꞌ penawom, caw chi a can spenailal; jaꞌ slawubꞌal, tꞌanan wal oc ebꞌ ánima watxꞌ snaꞌbꞌal, yet chi eyqꞌuey ebꞌ penawom tuꞌ.

17 Akꞌwej cuenta ebꞌ je yuninal, yet watxꞌ ey watxꞌcꞌulal snan je xol yetoj ebꞌ, ta jaxca tuꞌ, oj jaach eecꞌ cꞌal yin tzalacꞌulal.

18 Jaꞌ bꞌey cꞌam chi abꞌle skꞌanabꞌ ebꞌ ẍejabꞌ Dios, chi cꞌal yun masanil spenail ebꞌ ánima, jal pax ebꞌ chi jijen sley Dios, caw wal watxꞌ yet ebꞌ.

19 Ta yin cꞌal kꞌaneal chi yun yakꞌle cuenta junoj eyoc yin yakꞌomaloj servilal, caxcꞌal chi naꞌcha el yu, cꞌam pax chi sjije yuneni.

20 Watxꞌ to wal chi eloc junoj cꞌam snaꞌbꞌal, yintaj pax mac comon cꞌal chi kꞌanabꞌi.

21 Jaꞌ mactxequel cꞌam chi stenchane ebꞌ yakꞌomal servil yin syaliẍal, jaꞌ yet slawubꞌal, caw oj yabꞌ syaꞌil yu.

22 Jaꞌ mactxequel jow chi yute sbꞌa, chi xꞌema jowal xol yet animail; jaꞌ mactxequel cꞌuun stit sjowal, ey cꞌal tzetyetal man watxꞌoj chi yunne.

23 Jaꞌ mactxequel chi smimanbꞌane sbꞌa, chi iꞌle eyoj; jaꞌ mactxequel yeynajil chi yute sbꞌa xin, chi iꞌle a can.

24 Jaꞌ mactxequel chi yaoc sbꞌa yetoj ebꞌ elkꞌom, jacꞌal oc chi yiꞌtej yibꞌan. Caxcꞌal mi chi yalaꞌ tol ey tzet yotaj yin sjichanil, cꞌam pax chi sbꞌeybꞌalne swatxꞌilal.

25 Jaꞌ mactxequel chi xiw tet yet animail, jacꞌal oc chi yakꞌ eyqꞌuey sbꞌa; jaꞌ mac chi yaoc scꞌul yin Jehová xin, caw wal teynebꞌil cꞌal.

26 Ecꞌal mactxequel chi seyon swatxꞌcꞌulal ebꞌ yaaw; jaꞌ jun mactxequel chi skeꞌ swaꞌnen yeoc kꞌane yin swatxꞌil, asanne Jehová, Naj chi skeꞌ yu masanil.

27 Jaꞌ ebꞌ ánima watxꞌ snaꞌbꞌal, cꞌam chi ochele ebꞌ penawom yu ebꞌ; quey pax tuꞌ ebꞌ pena snaꞌbꞌal, cꞌam pax chi ochele ebꞌ watxꞌ snaꞌbꞌal yu ebꞌ.