2 Ta pena tzet chi yun junoj conobꞌ, txololi xacꞌal yecꞌ ebꞌ yaaw, ta tol jelan snaꞌbꞌal junoj yaaw eyoc yin yopiso bꞌey junoj nación, chi skeꞌ yiꞌon bꞌey yin swatxꞌilal.

3 Ta jaꞌ junoj pena snaꞌbꞌal chi yetne yet mebꞌail, jaꞌ jun tuꞌ laan jaxca junoj jow yaxnabꞌ chi etnen el awo.

4 Jaꞌ mactxequel cꞌam yeloc apnoj ley yul sat, caw chi tzala yetoj ebꞌ penawom; jal pax mac chi jijen ley xin, chi jowi oc ebꞌ yin ebꞌ chi jijen tzet chi yal ley.

5 Jaꞌ ebꞌ ánima pena snaꞌbꞌal, cꞌam chi naꞌcha el sjichanil yu ebꞌ, jal pax mactxequel tol chi yaoc sbꞌa yul skꞌabꞌ Jehová xin, chi naꞌcha el yu.

6 Yel xacꞌal watxꞌ, caxcꞌal mebꞌa jon, asantane tol watxꞌ ojabꞌ cu naꞌbꞌal, yintaj pax tol bꞌeom jon, ta tol asan cꞌal spenail chi cu naꞌ.

7 Jaꞌ ebꞌ uninale watxꞌ snaꞌbꞌal, chi sjije masanil ẍejbꞌanil Dios ebꞌ; jal pax junoj pekꞌ cꞌamxa tzet chi yiꞌ canoj, chi yiꞌel sqꞌuixwil smam.

8 Jaꞌ mactxequel miman sbꞌeomal chi yiꞌ yin skꞌanon yucꞌaꞌ stumin chi yakꞌ maanil, chi syambꞌa ecꞌ bꞌulan sbꞌeomal tuꞌ, jaxa tet junoj chi okꞌ scꞌul yin ebꞌ mebꞌa chi ale cantoj tet yu Dios.

9 Ta ey junoj tol cꞌam chi ẍaꞌ yabꞌ sley Dios, quey cꞌal pax tuꞌ oj yunne, man oj abꞌle xa yu Dios.

10 Jaꞌ mactxequel chi ijbꞌantoj ebꞌ ánima watxꞌ sbꞌeybꞌal yin spenail, jaꞌ jun tuꞌ oj eyqꞌuey yul yaal chi swaꞌne eyoj; jal pax ebꞌ ánima watxꞌ sbꞌeybꞌal xin, asan swatxꞌilal chi ẍaꞌ ebꞌ.

11 Jaꞌ junoj bꞌeom, chi snaꞌ tol miman tzet chi skeꞌ yu; jal pax junoj mebꞌa ey snaꞌbꞌal, chi skeꞌ yilon oc snaꞌbꞌal jun mactxequel tuꞌ.

12 Jaꞌ yet chi oc ebꞌ watxꞌ sbꞌeybꞌal yin yopiso, caw chi tzala ebꞌ ánima yetoj; chi yaoc kꞌin ebꞌ, jal ta pena snaꞌbꞌal ebꞌ chi yiꞌ yopiso xin, tol chi yewbꞌa el sbꞌa ebꞌ ánima tet ebꞌ.

13 Jaꞌ mactxequel cꞌam chi yalatej spenail, man watxꞌoj chi elocoj; jal pax mactxequel chi yalatej spenail xin, catuꞌ chi sbꞌejoncan yuneni, jaꞌ jun tuꞌ oj akꞌle mimancꞌulal yibꞌan.

14 Caw tzalacꞌulal yet ebꞌ ánima tol ey yeloc apnoj Jehová yul sat; jal pax mac pit chi yute snaꞌbꞌal xin, jaꞌ syaꞌtajilal oj tit yibꞌan.

15 Ta tol jaꞌ junoj pena snaꞌbꞌal eyoc yaawilal yul junoj conobꞌ tol mebꞌa, laan jaxca junoj noꞌ bꞌalam chi el yaw, ma jaxca junoj noꞌ oso tol ey swail.

16 Jaꞌ junoj yaaw chi yetne yet animail, cꞌam snaꞌbꞌal jun tuꞌ, jal pax junoj tol cꞌam chi chaꞌon montebꞌal tumin yin ewantajil xin, jaꞌ jun tuꞌ oj naatbꞌoj skꞌinal.

17 Jaꞌ mactxequel chi oc spenail yu chi smakꞌ cam junoj yet animail, sowalil chi cami, cꞌam ojabꞌ mac chi colon eloj.

18 Jaꞌ junoj ánima watxꞌ snaꞌbꞌal, chi col-le eloj; jal pax mac pena snaꞌbꞌal xin, oj eyqꞌuey yin syaꞌtajilal.

19 Jaꞌ mactxequel chi mulna sat txꞌotxꞌ txꞌotxꞌ, caw chi yakꞌ sobra sloꞌbꞌe; jal pax mactxequel chi yakꞌ yip yin tzetyetal tol cꞌam yeloc apnoj, jaꞌ tzet oj ilcha yu, jaꞌton mebꞌail.

20 Jaꞌ mactxequel watxꞌ cꞌal snaꞌbꞌal, jaꞌ jun tuꞌ, oj iꞌle a can; jal pax mactxequel chi yoche chi oc bꞌeomal yin eymanil xin, jaꞌ jun tuꞌ sowalil oj yabꞌ syaꞌilal.

21 Caw man watxꞌoj ta ey sqꞌuexanil ebꞌ ánima yul sat ebꞌ yaaw; ey bꞌey chi moncha ebꞌ juez yu niꞌoj tzetyetal chi akꞌle tet.

22 Jaꞌ mactxequel chi yakꞌ yip yet chi oc bꞌeomal yin eymanil, yutol chi yoche xacꞌal miman tzetyetal, man yotaj oj ta tol oj jul mebꞌail yibꞌan.

23 Jaꞌ ebꞌ chi cu tenchanen yin spenail, miman ojabꞌ yeloc apnoj ebꞌ yul cu sat, yintaj pax ebꞌ chi slan yalon watxꞌ kꞌane kin yin caabꞌ satil.

24 Jaꞌ mactxequel chi naꞌoni tol man penaoj yet chi yelkꞌane stzetyetal smam xutx, jaꞌ jun tuꞌ, chi yalaꞌ tol ma oc spenail.

25 Jaꞌ mactxequel caw miman tzet chi yoche oc yetoj snaꞌbꞌal, caw chi yiꞌa can jowal; jal pax mactxequel chi yaoc Jehová yipoj scꞌul xin, caw wal chi al-le watxꞌil.

26 Jaꞌ junoj cꞌam snaꞌbꞌal, asan niꞌoj tzet yotaj chi yaoc yipoj scꞌul, jal pax junoj mactxequel ey snaꞌbꞌal xin, chi skꞌanle snaꞌbꞌal tet ebꞌ jelan, jaꞌ jun tuꞌ, caw watxꞌ chi elocoj.

27 Jaꞌ mactxequel chi colwa tet ebꞌ mebꞌa, cꞌam bꞌakꞌin oj jul mebꞌail yibꞌan; jal pax mac cꞌam tzet chi yakꞌ xin, pena cꞌal tzet oj al-le yin.

28 Jaꞌ yet chi oc ebꞌ pena snaꞌbꞌal yin yaawil, chi yewbꞌa el sbꞌa ebꞌ ánima tet ebꞌ; jal yet chi el ebꞌ yin yopiso xin, jaꞌ ebꞌ watxꞌ snaꞌbꞌal chi iꞌle a can.