2 Jaꞌ ojabꞌ junojxa mactxequel chach alon watxꞌil; yintaj pax tol jaach, cha wal oc ja bꞌa watxꞌil yul ja wet.

3 Jaꞌ chꞌen yaaxchꞌen yetoj chꞌen arena caw wal al chꞌen, ian cꞌam chi laccha chꞌen ku, queyton tuꞌ sjowal scꞌul junoj pena snaꞌbꞌal, yel xacꞌal cꞌam chi techa ku.

4 Jaꞌ sjowal scꞌul junoj mactxequel, miman tzet chi yetnetoj. Jal pax chichoncꞌulal tuꞌ xin, ¿Cꞌam mactxequel oj skeꞌ stecꞌbꞌan sbꞌa sattaj?

5 Yel xacꞌal watxꞌ junoj tenchebꞌal tol chi txeclo eloj, yintaj pax camcꞌulal tol ewantaj yeocoj.

6 Jaꞌ junoj watxꞌ ja wakꞌon yetoj, chi sey tzet chi yun scolwa ja win, caxcꞌal ey jaach oc yin syaꞌtajilal, ta jaꞌ junoj ja cajat chi oc lakꞌan ja win xin, tol cha col ja bꞌa tet.

7 Jaꞌ mactxequel nonaj scꞌul, caxcꞌal mi yal awcabꞌ chi akꞌle tet, pena xacꞌal yuqꞌui chi yabꞌe; jal pax mactxequel tol ey swail xin, caxcꞌal mi kꞌaꞌ junoj tzetyetal, chiꞌ xacꞌal chi yabꞌe.

8 Jaꞌ mactxequel chi sbꞌejcan yuninal, laan jaxca junoj noꞌ xutx tzꞌiquin chi sbꞌejcan sweyubꞌ yetoj yuneꞌ.

9 Jaꞌ yu perfume yanil xil jolome, chi tzala a cu cꞌul. Queytuꞌ chi yun cu tzala yu watxꞌ snaꞌbꞌal junoj cu watxꞌil ánima chi yal ey jon yu scamcꞌulal kin.

10 Cꞌam ojabꞌ bꞌakꞌin cha bꞌejcan ebꞌ watxꞌ ja wakꞌon yetoj, tam wal ebꞌ swatxꞌil ánima naj ja mam. Cꞌam ojabꞌ chach too bꞌey sna junoj ja wuẍtaj tol naat eycantoj yetoj junoj ja cuscꞌulal. Yel xacꞌal watxꞌ, ta tol jaꞌ tet junoj ja watxꞌil ánima ey ja cawilal cha walaꞌ.

11 Jaach wuninal, jelan ojabꞌ cha wute ja naꞌbꞌal, yet watxꞌ cha wakꞌ tzalabꞌoj jin cꞌul; yu jun tuꞌ, ey tzet chi skeꞌ jin pajtzen tet ebꞌ chin intajnen can eloj.

12 Ta tol ey ja naꞌbꞌal, cha teyne ja bꞌa tet tzetyetal ey smey, catuꞌ cha colon ja bꞌa tet, jal pax mac cꞌamto snaꞌbꞌal xin, comon cꞌal chi yaoc sbꞌa yin junoj tzetyetal, masantaꞌcꞌal chi eyqꞌuey jun syaꞌtajilal tuꞌ yibꞌan.

13 Jaꞌ mactxequel chi yaoc sbꞌa yin fiadoral yin junoj txꞌoj animail, che yiꞌcan ecꞌ spichil yu smaan tumin tuꞌ.

14 Ta caw ip chi yun yel je yaw, catuꞌ che yakꞌon scawil scꞌul junoj je watxꞌil ánima yet caw skꞌinibꞌto, jaxca tol pena tzet che yal tet chi yabꞌe.

15 Jaꞌ junoj ix istile jowal cꞌal ey, laan ix jaxca junoj tzꞌu chi tit tꞌulabꞌoj yet nabꞌilkꞌinal yul junoj na.

16 Ta chi koche chi cu tenchane ix yin sjowal tuꞌ, laan jaxca yet chi kochen chi cu mitxꞌoc tucan kaꞌeꞌ, ma jaxca yet chi kochen chi cu mitxꞌa niꞌoj aceite yul cu kꞌabꞌ.

17 Jaꞌ chꞌen hierro, chi nijle ye chꞌen yu junojxa yet chꞌenal; quey cꞌal pax tuꞌ chi yun junoj mactxequel chi jelanbꞌi skꞌanabꞌ yu junojxa.

18 Jaꞌ mactxequel watxꞌ chi yun steyne teꞌ higo awbꞌil yu, caw wal chi sloꞌ sat higo; quey pax tuꞌ mactxequel chi syaꞌilne spatrón, caw wal chi iꞌle a can yu.

19 Jaxca chi yun kilon eytoj cu sat xol junoj jaꞌ, queytuꞌ chi yun kiꞌon cu naꞌbꞌal yet chi kilon oc snaꞌbꞌal junoj ket animail tol watxꞌ snaꞌbꞌal.

20 Jaxca camich, cꞌal bꞌey chi mujle ebꞌ camom, cꞌam cꞌal bꞌakꞌin chi noeloj, queytuꞌ yochwan ebꞌ ánima, cꞌam bꞌakꞌin chi oc tucan tzet chi yoche oc ebꞌ.

21 Jaꞌ chꞌen oro, cꞌal chꞌen plata tol chi akꞌle porobꞌal chꞌen yetoj kꞌakꞌ, queytuꞌ ebꞌ ánima chi akꞌle porobꞌal yu watxꞌ kꞌane chi al-le yin ebꞌ.

22 Jaꞌ junoj cꞌam snaꞌbꞌal, caxcꞌal mi chi chakꞌoꞌtanele ebꞌ jaxca chi yun sjutxꞌle koo junoj tzetyetal, cꞌam cꞌaltaꞌ chi el jun pena naꞌbꞌale tuꞌ yin ebꞌ.

23 Ey ojabꞌ cꞌal jaach oc ja wilontoj tzet chi yun yil-le noꞌ ja meꞌ, tol ey ojabꞌ jaach cꞌal oc yin bꞌiscꞌulal yu noꞌ junjun cꞌu,

24 yutol jaꞌ bꞌeomal, cꞌal junoj opiso man tobꞌalkꞌinal cꞌal eyecꞌoj.

25 Jaꞌ yet chi tzokꞌle a an chꞌim bꞌey sjolomlaj wonan, chi yambꞌale can a an, catuꞌ chi woli pax an junelxa.

26 Jaꞌ xil noꞌ ja meꞌ chi oc ja pichiloj, ey cꞌal pax ja tumin yu noꞌ, jaꞌ yu noꞌ ja chiw chi skeꞌ ja manon ja txꞌotxꞌ.

27 Chi lawi tuꞌ, cha wiꞌon cꞌal pax el mimanoj lech yin noꞌ ja chiw tuꞌ, yet chi yuqꞌuen ebꞌ ja wuninal cꞌal yetoj ebꞌ chi mulna ja wetoj.