2 Jaxca junoj noꞌ tzꞌiquin tucꞌal chi eqꞌui ma jaxca noꞌ kocꞌ tzꞌiquin cꞌam chi oc tucan yecꞌ jenenoj, queytuꞌ wan pena kꞌane chi al-lei ta tol cꞌam tzet yual, cꞌam chi oc yopiso.

3 Jaxca noꞌ tzꞌuum chicote chi makꞌle oc yin noꞌ che, ma jaxca chꞌen freno chi oc yin stiꞌ noꞌ bꞌuru yet chi sjijen noꞌ bꞌey chi iꞌle bꞌeyoj, queytuꞌ chi yun swaꞌxi snaꞌbꞌal junoj pena sbꞌeybꞌal yet chi makꞌle oc noꞌ tzꞌuum chicote yin xubꞌ.

4 Cꞌam ojabꞌ chach takꞌwi tet junoj pena snaꞌbꞌal, yet chi yalon spena bꞌeybꞌal tuꞌ ey jaach, yet watxꞌ man laan oj cha wute ja bꞌeybꞌal yetoj.

5 Jaxca wal skꞌanabꞌ junoj ey snaꞌbꞌal, queytuꞌ chi yun ja takꞌwi tet junoj pena snaꞌbꞌal jaxca smooalil, yet watxꞌ chi yotajne eloj tol pena snaꞌbꞌal.

6 Ta chi cu chej junoj cꞌam snaꞌbꞌal yin junoj cu chejbꞌanil, laan jaxca tol chi cu tzokꞌtoj kajan; tucꞌal chi cu seytej syaꞌtajilal kibꞌan.

7 Jaꞌ junoj naꞌbꞌale chi yakꞌ junoj cꞌam snaꞌbꞌal, laan jaxca junoj coxoꞌ yajan cꞌam yopiso.

8 Naꞌbꞌacꞌal chi smeyne sbꞌa junoj cꞌam snaꞌbꞌal, laan jaxca yet chi cu kꞌalon oc chꞌen chꞌen yul junoj jinich cꞌam yopiso.

9 Jaꞌ junoj cꞌam snaꞌbꞌal chi yakꞌle yalon el kꞌane yet jelanil, laan jaxca junoj uqꞌuem an chi yakꞌle yiꞌon a teꞌ qꞌuix yul skꞌabꞌ.

10 Ta jaꞌ junoj patrón chi yaoc junoj cꞌam snaꞌbꞌal, ma uqꞌuem an yin smulnail, laan jaxca junoj comon cꞌal chi julwa xol ánima, comon xacꞌal chi low yin ánima yu.

11 Jaꞌ noꞌ txꞌiꞌ, chi meltzo noꞌ slekꞌon a xaaw, queytuꞌ ebꞌ pena snaꞌbꞌal chi meltzo yin spena bꞌeybꞌal junelxa.

12 Jaꞌ ebꞌ cꞌam snaꞌbꞌal, chi skeꞌ tocꞌal cu cuyon ebꞌ yin swatxꞌilal yintaj pax ebꞌ chi yal sbꞌa jelanil.

13 Jaꞌ ebꞌ isa chi yal ebꞌ tol ey jun noꞌ bꞌalam chi majwa yul bꞌe, yutol cꞌam chi yoche ebꞌ chi too mulnail.

14 Jaxca chi yun sbꞌeyecꞌ junoj smajil na yin sbisagrail, queytuꞌ chi yun smeltzo ecꞌ bꞌal-labꞌoj junoj isa bꞌey sat xꞌat.

15 Jaꞌ junoj isa chi yaeytoj skꞌabꞌ yul secꞌ, cꞌam pax chi yal scꞌul chi yaoctoj sloꞌbꞌe yul stiꞌ.

16 Jaꞌ junoj isa chi snaꞌ tol jelan yintaj jujwanoj ánima yotaj chi spajtze kꞌane yin swatxꞌil.

17 Jaꞌ mactxequel comon cꞌal chi yaltoj yet xol jowal bꞌey cꞌam yalon yet yin junoj kꞌane, laan jaxca yet chi cu mitxꞌon a xiquin junoj noꞌ txꞌiꞌ caw jow.

18 Jaxca junoj ey sloco chi julwa yetoj julbꞌal eyoc skꞌakꞌal,

19 queytuꞌ mactxequel chi yetne junoj swatxꞌil ánima, chi lawi tuꞌ, catuꞌ chi yalon pax aoj tol sajach chi yunne.

20 Ta cꞌam teꞌ siꞌ, chi tan el kꞌakꞌ; quey cꞌal pax tuꞌ, ta cꞌamxa alo kꞌumale chi al-lei, chi tan jowal.

21 Jaxca chi yun yiꞌon yip kꞌakꞌ kꞌakꞌ eyoc stzakꞌakꞌ yet chi ale octoj siꞌ yibꞌan, queytuꞌ chi yun ya jowal yu junoj mactxequel tol yin cꞌal akꞌo jowal chi yunne.

22 Jaꞌ skꞌane ebꞌ alom kꞌumale laan jaxca junoj tzetyetal watxꞌ sloꞌi, tol chi apni xacꞌal ẍiꞌal yin cu pixan chi kabꞌe.

23 Jaxca wal niꞌoj tzet chi bꞌonle oc yelawiloj junoj txꞌotxꞌ xi, queywal tuꞌ kꞌane manxa swatxꞌiloj chi yal junoj ánima pena cꞌal tzet naꞌbꞌil yu.

24 Jaꞌ ebꞌ pena snaꞌbꞌal, watxꞌ xacꞌal chi yute kꞌanabꞌ sbꞌa, jal pax yin snaꞌbꞌal xin, caw pena cꞌal tzet naꞌbꞌil yu.

25 Caxcꞌal watxꞌ xacꞌal skꞌanabꞌ ey jaach, cꞌam ojabꞌ cha chaꞌ ja wabꞌe, yutol jaꞌ snaꞌbꞌal tuꞌ, caw wal pena tzet chi snaꞌ ja win.

26 Caxcꞌal cꞌam chi yoche chi xꞌoxel sjowal scꞌul ja win, sowalil chi txeclo el sattaj masanil ánima.

27 Jaꞌ mactxequel chi joton junoj jolan, jacꞌal oc bꞌey yul jun jolan tuꞌ chi eyqꞌueyi; jaꞌ mactxequel chi tenon a junoj chꞌen chꞌen, jacꞌal oc yibꞌan chi tit canoj.

28 Jaꞌ junoj lekꞌtiꞌ caw chi chichon scꞌul yin tzetyetal watxꞌ; jaꞌ junoj chi xij yal junoj montebꞌal kꞌane, miman tzet chi yetnetoj.