2 Caw miman yeloc apnoj Dios yu jantaj tzet ewan cꞌuan yeoc yu, jal pax ebꞌ rey xin, chi al-le ebꞌ watxꞌil, yutol chi cam snaꞌon oc yin junoj kꞌane ebꞌ.

3 Jaxca snaatil ey satcan, cꞌal snaatil yich txꞌotxꞌ txꞌotxꞌ tiꞌ, queywal tuꞌ yeoc snaꞌbꞌal ebꞌ rey, cꞌam mac chi naꞌcha el yu tzet utbꞌil yeoc snaꞌbꞌal ebꞌ.

4 Ta chi iꞌle el stzꞌilal chꞌen plata, chi skeꞌ swaꞌnele junoj tzetyetal caw watxꞌ yetoj chꞌen.

5 Ta chi iꞌle el ebꞌ penawom yin yopiso yu naj rey, queywal tuꞌ chi yun yiꞌon can yip yopiso naj yin sjichanil.

6 Cꞌam ojabꞌ cha meyne ja bꞌa sattaj naj rey, tam wal chach ey chotan bꞌey chi ey chotan ebꞌ winaj tol miman yeloc apnoj.

7 Yel xacꞌal watxꞌ, ta tol jaꞌ naj rey chach awten atoj bꞌey chotan eyoj, yintaj pax tol jaach chach iꞌle eytej sattaj ebꞌ mimej winaj tuꞌ.

8 Jaꞌ tzet cha wilaꞌ, cꞌam ojabꞌ chi too ja wal sattaj ebꞌ yaaw yin eymanil, tala ey junojxa chi apni oc yalon tzet utbꞌil yeoc jun kꞌane tuꞌ, jaxa tala chi yunne, tuxa cꞌal chach qꞌuixwi can aoj.

9 Ta ey jowal ja xol yetoj junoj mactxequel caan ja cawilal, akꞌ ja wip ja waꞌnen ey yetoj, cꞌam ojabꞌ cha wal tet junojxa.

10 Jaxa tala chi yunne, jaꞌ ebꞌ chi abꞌen jun kꞌane tuꞌ chi alon ecꞌ ja kꞌumal, catuꞌ pena xacꞌal oj yun ja bꞌinale ecꞌoj.

11 Jaꞌ junoj kꞌane tol watxꞌ chi yun yal-le ja win, laan jaxca junoj mansan tol oro cꞌal eloj, ey cꞌal pax oc chꞌen plata yelawiloj.

12 Jaxca kolkꞌabꞌe ma jaxca chꞌen ue tol oro cꞌal eloj, queytuꞌ junoj tenchebꞌal chi yakꞌ junoj mac jelan snaꞌbꞌal tet mac chi ẍaꞌ yabꞌ yin swatxꞌil.

13 Jaꞌ junoj yakꞌomal servil tol jijem chi yute sbꞌa tet spatrón, laan jaxca yet chi kuqꞌuen eytoj siquil jaꞌ yet ey cu tajin tiꞌal xol kꞌakꞌ, chi sicbꞌi scꞌul jun mactxequel chi chejon tuꞌ.

14 Jaxca tajin asun, cꞌal tajin kaꞌeꞌ, tol cꞌam nabꞌ iꞌbꞌil oc yu, queytuꞌ junoj mactxequel tuxa cꞌal chi smeyne sbꞌa yin yakꞌon junoj tzetyetal yaloni, cꞌam pax tzetyetal chi yakꞌa.

15 Ta ey cu mimancꞌulal, ta yin cꞌununi kꞌaneal chi yun kalon cu bꞌa sattaj ebꞌ yaaw, chi yakꞌ mimancꞌulal ebꞌ kin, catuꞌ chi oc tꞌanan ebꞌ pit chi yute sbꞌa.

16 Jaꞌ yet chi ilcha noꞌ yal awcabꞌ ja wu, cꞌam ojabꞌ chi ecꞌbꞌantoj ja loꞌoni; ta miman oj ja loꞌ, oj jaach xabꞌ yu.

17 Ta chach too scꞌatan junoj ja watxꞌil ánima, cꞌam chi skeꞌ tol kocꞌtaj xacꞌal chi yun ja too ecꞌoj, jaxa tala chi yunne, pena chi yabꞌe yet chach apni cꞌal oc scꞌatan.

18 Jaꞌ mactxequel chi oc yin lekꞌtiꞌ testigoal yin junoj yet animail, laan jaxca junoj teꞌ teꞌ, ma junoj chꞌen espada, ma junoj julbꞌal tol caw eel xaam.

19 Ta chi kaoc cu naꞌbꞌal yin junoj tol pena snaꞌbꞌal yet ey jon oc yin syaꞌtajilal, laan jaxca yet kꞌail junoj cu xubꞌ yet chi cu bꞌeyi, ma jaxca syaꞌil junoj chꞌen ee tol jolanxa.

20 Jaꞌ yet ey jon oc yin syaꞌilal, catuꞌ chi bꞌitnele junoj bꞌit cu sattaj, laan wal jaxca syaꞌil yet chi ale oc vinagre yin junoj cu yasil, ma jaxca yet chi iꞌle el cu pichil yet caw jow siic.

21 Ta ey swail junoj ja cajat, akꞌ lowoj; ta ey stajin tiꞌal akꞌ jaꞌ yuqꞌueꞌ.

22 Ta queytuꞌ oj je yute je bꞌa tet ebꞌ, oj cajbꞌoj a sat yu qꞌuixwilal je sattaj, jaꞌ Jehová oj pajtzen ey jex yu tzetyetal che yakꞌ tet ebꞌ tuꞌ.

23 Jaꞌ pena kꞌane chi al-lei, jaꞌ chi akꞌon jowbꞌoj yili cu sat, laan jaxca kaꞌeꞌ chi iꞌontej nabꞌ bꞌey yetcꞌulal norte.

24 Yel xacꞌal watxꞌ tol jaꞌ bꞌey junoj yaliẍ pat na bꞌey caan jon, yintaj pax tol bꞌey junoj miman na caan jon yetoj junoj ix ix tol jowal cꞌal ey jon yetoj.

25 Jaxca wal siiquil jaꞌ chi kuqꞌueꞌ yet ey cu tajin tiꞌal, queytuꞌ swatxꞌil chi yun yal-le junoj kꞌane chi tit naat.

26 Jaxca junoj snukꞌ jaꞌ tat yili yu txꞌotxꞌ, queytuꞌ chi yun junoj mac watxꞌ sbꞌeybꞌal chi ijbꞌaletoj yin spenail yu ebꞌ pena sbꞌeybꞌal.

27 Man watxꞌoj ta tol miman noꞌ yal awcabꞌ chi kucꞌ eytoj; quey cꞌal pax tuꞌ, man pax watxꞌoj ta tol chi koche xacꞌal tol chi cu bꞌinale ecꞌ yu ebꞌ ket animail.

28 Jaxca wal junoj conobꞌ tol uchbꞌilxa ey smuroal eyoc yinlaj, queytuꞌ junoj mactxequel tol cꞌam chi skeꞌ yiꞌon bꞌey snaꞌbꞌal yin swatxꞌilal.