19
24
Cꞌam ojabꞌ chi chichon oc je cꞌul yin ebꞌ penawom,cꞌam ojabꞌ che yaoc je bꞌa xol ebꞌ;
2 yutol asan yin etne ánima eyoc snaꞌbꞌal ebꞌ, jaxa cꞌal spenail tuꞌ chi yaloꞌtane ebꞌ.
20
3 Che naꞌ sicꞌlebꞌil tzet chi yun je waꞌne a junoj je na, yetoj jelan naꞌbꞌale chi eycantoj yipomaloj xeꞌ yich.
4 Che naꞌ sicꞌlebꞌil tzet chi yun je yakꞌon no yul je na yetoj tzetyetal watxꞌ yili, cꞌal yetoj jantaj tzet ey stool.
21
5 Yel xacꞌal watxꞌ ebꞌ ey snaꞌbꞌal, yintaj pax ebꞌ tol ey yip; yel xacꞌal watxꞌ tol ey tzet kotaj yintaj pax tol ey kip.
6 Ta tol chex oc yin jowal, kꞌanle ecꞌ junoj je naꞌbꞌal. Ta tol ecꞌal ebꞌ oj akꞌon je naꞌbꞌal, oj skeꞌ je yu.
22
7 Jaꞌ junoj cꞌam snaꞌbꞌal, cꞌam chi naꞌcha el yu tzetyetal chi yal sattaj ebꞌ yaaw bꞌey despacho, tzꞌin xacꞌal ẍi, yutol cꞌam sjelanil.
23
8 Jaꞌ mactxequel asanne spenail chi snaꞌ, ecꞌal mac chi bꞌinane yu spena naꞌbꞌal tuꞌ.
9 Jaꞌ tzet chi snaꞌ ebꞌ cꞌam snaꞌbꞌal, jaꞌton spenail; cꞌam mac chi ochen ebꞌ bꞌuchwawom.
24
10 Ta tol chi jul ja caabꞌcꞌulal yet ey jaach oc yin somcꞌulal, cꞌamto ja tecꞌanil chi yal tuꞌ.
25
11 Colel ebꞌ tol chi iꞌletoj yul skꞌabꞌ camich; mitxꞌoc tucan ebꞌ lalan stoo tzꞌeytzꞌon bꞌey sjolanil smujbꞌanil ebꞌ camom.
12 Caxcꞌal cha walaꞌ tol man ja wotaj oj, jal pax Jehová xin, yotaj tzet ey yin cu naꞌbꞌal, oj yakꞌ ja wotajne eloj; jaꞌ Naj chach teyneni yotaj tzet ja weocoj, jaꞌ oj toolanen tet junjun jatacꞌalaꞌ tzet chi el yunen junjun.
26
13 Jaach wuninal, ucꞌ yaal scabꞌil noꞌ ajan tol caw chiꞌ; abꞌle wal niꞌoj ẍiꞌal scabꞌil eyoc yin.
14 Jaxca wal ẍiꞌal noꞌ yal awcabꞌ, queytuꞌ oj je yute je yabꞌen swatxꞌil, jelanil cꞌal je watxꞌ naꞌbꞌal. Ta tol oj ilcha oc je yu, watxꞌ oj jex elocoj, jaꞌ tzetyetal eyoc yipoj je cꞌul, cꞌam bꞌakꞌin oj lawoj eyoj.
27
15 Cꞌam ojabꞌ che naꞌ junoj pena naꞌbꞌale yin ebꞌ ánima watxꞌ snaꞌbꞌal, cꞌam ojabꞌ che yelkꞌane tzetyetal ey yul sna ebꞌ;
16 yutol caxcꞌal chi eyqꞌuey jujeloj, jacꞌalaꞌ jujel oj a pax waan junelxa; jal pax ebꞌ penawom xin, chi eyqꞌuey xacꞌal can ebꞌ yin junelne.
28
17 Cꞌam ojabꞌ chach tzala yet chi eyqꞌuey mactxequel chi jowi oc ja win.
18 Ta chach tzala yu jaxca tuꞌ, manxa oj yaoc sjowal scꞌul Jehová yibꞌan, yutol man watxꞌoj jun ja tzalacꞌulal tuꞌ yul sat Dios.
29
19 Cꞌam ojabꞌ chi tit ja jowal yin ebꞌ penawom, cꞌam ojabꞌ chi chichon oc ja cꞌul yin ebꞌ,
20 yutol jaꞌ ebꞌ penawom tuꞌ, man watxꞌoj yet ebꞌ; tucꞌal oj taney ebꞌ jaxca chi yun staney skꞌakꞌal junoj tzejtebꞌal.
30
21 Jex wuninal, ey ojabꞌ yeloc apnoj Jehová yul je sat yetoj cꞌal naj rey, cꞌam ojabꞌ che yaoc je bꞌa yetoj ebꞌ chi jowi oc yin naj rey tuꞌ,
22 yutol jun txolan oj yun sjul scamichal ebꞌ, queytuꞌ oj yun slawi ey ebꞌ tuꞌ. Cꞌam mac otajnen tzet syaꞌilal oj jul yibꞌan ebꞌ yu Dios yetoj pax yu naj rey.
Wanxa Kꞌane Jix Yal Ebꞌ Ey Snaꞌbꞌal
23 Yetoj cꞌal pax oj, jaꞌ wan tiꞌ jix yal ebꞌ ey snaꞌbꞌal:
Yel xacꞌal man watxꞌoj ta jaꞌ sattaj bꞌey chi naꞌle oc yin ebꞌ ánima ey sqꞌuexanil.
24 Jaꞌ junoj juez tucꞌal chi jajcha el ebꞌ ey spenail yu, pena chi yal ebꞌ conobꞌ yin, chi intajnele el yu masanil ebꞌ ánima.
25 Jal pax mactxequel chi aon oc syaꞌilal yibꞌan ebꞌ ey spenail xin, watxꞌ chi eloc jun yaaw tuꞌ yul sat masanil conobꞌ.
26 Jaꞌ mactxequel watxꞌ chi yun spajtzen junoj kꞌane, laan jaxca junoj chi tzꞌubꞌon el stiꞌ junoj mactxequel.
27 Cꞌam ojabꞌ to cha waꞌne ja na, ta tol cꞌamto tzet ey, ey jaach yu tzet cꞌal oj yun yecꞌ tiempo ja wu.
28 Man comonoj cha wal junoj kꞌane yin ja wet animail, tam wal cha wal junoj lekꞌtiꞌal kꞌane yin ebꞌ.
29 Cꞌam ojabꞌ cha naꞌ yin ja naꞌbꞌal yu ja waon ecꞌ spaj yin ebꞌ a wet animail, jaxca wal chach utele yu ebꞌ.
30 Ey junel jix jin ecꞌ xol smulnail junoj ebꞌ isa, jaꞌton bꞌey awbꞌil yuva junoj cꞌam snaꞌbꞌal.
31 Jaꞌ tzetyetal jix wil bꞌey xol jun mulnail tuꞌ, asan cꞌal qꞌuix jix chꞌibꞌa sat txꞌotxꞌ tuꞌ, yetoj chꞌen colal chꞌen uchchanajtoj.
32 Jaꞌ yet jix wilon wan tuꞌ, jix jin cꞌubꞌan can yin jin naꞌbꞌal; jix wiꞌon can jin cuybꞌanil yin.
33 Ta asan cꞌal weyan cha wunne, cꞌal swacxi a ja jolom ja weyi, catuꞌ cha jeltzomnen ja kꞌabꞌ yet chach xew sicꞌlebꞌil,
34 jaꞌ mebꞌail chi tit ja wibꞌan, jaxca wal junoj elkꞌom iꞌbꞌil oc smitxꞌkꞌabꞌ yet jowal yu, queytuꞌ oj yun sjul ja win.