6
23
Ta ey junoj ebꞌ naj mimej winaj chach awten low yetoj,chi cam ja naꞌoni, mactxequel naj bꞌey ey jaach ecꞌ tuꞌ.
2 Caxcꞌal mi caw ey ja wail, watxꞌ ta tol txenne cꞌal chi yun ja lowi.
3 Man comonoj cha loꞌ junoj loꞌbꞌe manxa jantajoj swatxꞌil yili, tala tucꞌal chi yoche jun mactxequel tuꞌ chach yetne.
7
4 Cꞌam ojabꞌ cha wakꞌ xacꞌal ja wip ja woc yin bꞌeomal; cꞌam ojabꞌ chach oc yin bꞌiscꞌulal yu wan tuꞌ.
5 Jaꞌ chꞌen tumin, junne txolan chi yun slawi ey chꞌen, eyman chi too chꞌen jaxca chi yun stoo jenenoj noꞌ chii, jaxca xacꞌal tol chi elol xicꞌ.
8
6 Cꞌam ojabꞌ chach low bꞌey smeẍa junoj ebꞌ bꞌas, cꞌam ojabꞌ cha woche oc sloꞌbꞌe ebꞌ, caxcꞌal caw watxꞌ yili jun loꞌbꞌe tuꞌ.
7 Jaꞌ jun chach awten low tuꞌ, miman chi snaꞌ yu stool jun loꞌbꞌe tuꞌ; caxcꞌal chi xij yal ey jaach: Lowan, ẍi, yutol cꞌam chi yal yin masanil scꞌul.
8 Oj ja xae atej tzetyetal jix ja loꞌeytoj tuꞌ, catuꞌ cꞌam yopiso ja kꞌane tol watxꞌ xacꞌal jix yun ja walon tet.
9
9 Cꞌam ojabꞌ cha wal watxꞌ naꞌbꞌale tet junoj pena snaꞌbꞌal, yutol tucꞌal oj bꞌuchwa yin ja kꞌane cha walaꞌ.
10
10 Cꞌam ojabꞌ cha qꞌuexecꞌ smoonal txꞌotxꞌ txꞌotxꞌ tol ey can ey yet tax peyxa, tam wal cha tokꞌecꞌ smajul txꞌotxꞌ ebꞌ cꞌamxa smam xutx,
11 yutol jaꞌ Naj ey yipalil oj colon el ebꞌ, cꞌal yakꞌon jowal ja wetoj.
11
12 Aoc ja txiquin yin, cꞌal ja naꞌbꞌal yin wan cuybꞌanile tiꞌ, yet cha wotajne eloj.
12
13 Cꞌam ojabꞌ cha bꞌej ja wakꞌon cuenta ebꞌ ja wuninal, yutol man oj cam ebꞌ yu jayebꞌoj tzꞌuum yet cha wakꞌon yijaꞌ.
14 Ta tol oj ja wakꞌ cuenta ebꞌ, lalan ja colon el ebꞌ tet camich.
13
15-16 Jaach wuninal, jaꞌ yet oj ja wiꞌon ja jelanil, cꞌal yet oj wabꞌen ja kꞌanabꞌ jaxca smooalil, caw wal oj tzala a jin cꞌul wabꞌeni.
14
17 Cꞌam ojabꞌ chi chichon oc ja cꞌul yin ebꞌ penawom; jaꞌ jun smoo cha wunne, tol ey ojabꞌ yeloc apnoj Jehová yul ja sat.
18 Ta jaxca tuꞌ oj ja wunne, caw watxꞌ oj jaach elocoj, jaꞌ tzet eyoc yipoj ja cꞌul, cꞌam bꞌakꞌin oj lawoj ecꞌoj.
15
19 Jaach wuninal, maj cꞌal ja wabꞌe, cha cuyoni; akꞌ ja wip ja too yin watxꞌ bꞌeybꞌale.
20 Man ojabꞌ junne oj chach ecꞌ yetoj ebꞌ uqꞌuem an, tam wal yetoj ebꞌ yel xacꞌal chi ecꞌ yibꞌan slowi,
21 yutol jaꞌ ebꞌ uqꞌuem an, cꞌal ebꞌ miman tzet chi sloꞌ, oj lawoj xacꞌal ey ebꞌ yu mebꞌail. Jaꞌ ebꞌ isa, jolquiẍtaj yoc spichil ebꞌ oj yaocoj.
16
22 Chaꞌ ja wabꞌ tzet chi yal ja mam ja txutx, jaꞌton mac jix jaach ilon chꞌibꞌoj; cꞌam ojabꞌ cha wintajne el ebꞌ yet chi oc ebꞌ yin icham animail.
23 Akꞌ ja wip ja seyon ecꞌ tzetyetal tol yel, jelanil, cuybꞌanile cꞌal watxꞌ naꞌbꞌale; jaꞌ wan tuꞌ cꞌam ojabꞌ cha wintajne eloj.
24 Jaꞌ ebꞌ uninale watxꞌ, ebꞌ ey snaꞌbꞌal, smoo ton chi tzala smam ebꞌ yetoj.
25 Yu jun tuꞌ xin, akꞌ tzalabꞌoj scꞌul ja mam, cꞌal ja txutx, yet watxꞌ miman yeloc apnoj ebꞌ oj yabꞌe.
17
26 Jex wuninal, majwej je yabꞌ tzet oj walaꞌ, chi cam wal je yilon jin bꞌeybꞌal;
27 yutol jaꞌ junoj ix ix chi mulwi yul skꞌabꞌ yichamil, laan ix yetoj junoj jolan xabꞌ naat yich txenne pax yul.
28 Chi majwa ebꞌ ix yul bꞌe jaxca junoj elkꞌom, ecꞌal ebꞌ winaj chi etex el yu ebꞌ ix.
18
29 ¿Mactxequel chi yabꞌ syaꞌil? ¿Mactxequel chi el yaw? ¿Mactxequel chi ecꞌ yaꞌ chi yabꞌe? ¿Mactxequel chi yasitoj yin tol cꞌam tzet yual? ¿Mactxequel tol caj xacꞌal yili yul sat?
30 Jaꞌton mactxequel tol cꞌam chi sbꞌejcan uqꞌue an, ey cꞌal oc yin yabꞌlen tzet yuqꞌui an.
31 Cꞌam ojabꞌ chach oc cꞌal tꞌanan yin teꞌ an tuꞌ; cajin ojabꞌ xacꞌal yili yul scopail, subꞌo xacꞌal yeytoj teꞌ yucꞌlei.
32 Jal yin slawubꞌal xin, laan jaxca junoj noꞌ labꞌa tol manxa jantajoj syaꞌil bꞌey chi ẍiꞌ.
33 Txꞌojxa yili tzetyetal oj je yil yu, miman kꞌane man watxꞌoj je yalaꞌ, cꞌal tzet oj je naꞌ yu.
34 Jaxca xacꞌal tol yibꞌan jaꞌ mar ey jex oc che yabꞌe; joybꞌinaj xacꞌal je sat yu an, jaxca xacꞌal tol ey jex atoj yibꞌan ẍumuc steꞌal junoj miman barco che yabꞌe.
35 Catuꞌ oj je yalon jaxca tiꞌ: Caw jix cu smakꞌ ebꞌ, ma kabꞌ syaꞌil; jix cu smakꞌ ebꞌ yetoj tzꞌuum, ma cꞌal kabꞌe; jaꞌ yet jix el cu weyan, chi cu too pax cu seyon an junelxa, je chim xacꞌal.