Jaꞌ An Libro
ECLESIASTÉS
Masanil Tzetyetal Cꞌam Niꞌoj Yeloc Apnoj
1
1-2 Jaꞌton wan skꞌane naj alom el kꞌane tiꞌ, jaꞌton scꞌaal naj rey David jix yakꞌ reyal bꞌey conobꞌ Jerusalén.¡Naꞌbꞌacꞌal, naꞌbꞌacꞌal! ¡Masanil tzetyetal cꞌam niꞌoj yeloc apnoj!
3 ¿Tzet chi yiꞌ ebꞌ ánima yin miman mulnail chi swaꞌne bꞌey yul yibꞌankꞌinal tiꞌ?
4 Ey mac chi ali, ey mactxequel chi cami, jal pax txꞌotxꞌ txꞌotxꞌ yul yibꞌankꞌinal tiꞌ xin, jacꞌalaꞌ yeecꞌoj cꞌam chi qꞌuexmo yili.
5 Chi aol cꞌu, catuꞌ chi too pax can junelxa. Queytuꞌ chi yun stoo bꞌey ey cꞌaltaꞌa, catuꞌ chi meltzo pax junelxa.
6 Jaꞌ kaꞌeꞌ chi too bꞌey sur, catuꞌ chi meltzo pax cantoj bꞌey norte. Chi ecꞌ cꞌal xuyuyoj kaꞌeꞌ tuꞌ, catuꞌ chi meltzo pax yintaj junelxa.
7 Jaꞌ masanil jaꞌ jaꞌ, chi too can jaꞌ xol jaꞌ mar; jaꞌ jaꞌ mar tuꞌ, cꞌam bꞌakꞌin chi noel jaꞌ. Chi meltzo pax jaꞌ jaꞌ junelxa bꞌey chi aol snukꞌ jaꞌ, jacꞌalaꞌ chi too pax jaꞌ yul sbꞌe junelxa.
8 Jaꞌ yu masanil tzetyetal tuxa cꞌal chi tibꞌi el kiloni, cꞌamxa chi alcha jantaj chi yun stibꞌi el kiloni, cꞌam pax bꞌakꞌin chi kalaꞌ tol kꞌojbꞌilxa cu matzꞌli. Cꞌam cꞌal pax bꞌakꞌin chi kalaꞌ tol kꞌojbꞌilxa kabꞌeni.
9 Jaꞌ masanil tzetyetal ey tinaniꞌ, eyxa cꞌaltaꞌ yet peyxa. Cꞌam junoj tzet chi kun tinaniꞌ tol ma yun ebꞌ ánima yet peyxa tuꞌ. Cꞌam tzetyetal tol to chi txeclo aoj.
10 Ey cꞌaltaꞌ mactxequel chi aloni: Jaꞌ jun tiꞌ, caw wal acꞌto, ẍi ebꞌ chi yaloni. Jaꞌ masanil tzetyetal, caw ecꞌalxa abꞌil jun yet cꞌamto chi cu ali jaon tiꞌ.
11 Jaꞌ wan tzetyetal eyxa cꞌaltaꞌ yet peyxa tuꞌ, ey ebꞌ chi too can qꞌueycꞌulal ku jaon tiꞌ. Queytuꞌ oj yun stoo pax qꞌueycꞌulal wan tzettaj yetal tuꞌ yu ebꞌ ánima yet cu sattajto tuꞌ.
Jaꞌ Tzet Yotaj Xa Naj Chi Alon El Junoj Skꞌaneal
12 Jain chin kꞌanabꞌ tiꞌ, jix jin oc sreyaloj ebꞌ wet Israelal bꞌey conobꞌ Jerusalén. 13 Jix jin oc wal ian jin seyon wilaꞌ, cꞌal jin cuyon jelanil, yin masanil tzetyetal ey bꞌey yul yibꞌankꞌinal tiꞌ. Manxa jantajoj yalil ijatz jix yaoc Dios kibꞌan jaon ánima jon tiꞌ. 14 Queyton wal tuꞌ jix yun snaꞌcha el wu tol jaꞌ masanil tzet chi kun bꞌey yul yibꞌankꞌinal tiꞌ, naꞌbꞌacꞌal, cꞌam niꞌoj yeloc apnoj, jaxca cꞌal yet chi kochen chi cu mitxꞌey kaꞌeꞌ, cꞌam pax chi michꞌcha ey ku, queytuꞌ keocoj.
15 Jaꞌ tzetyetal tol cotxan ecꞌoj, cꞌamxa chi skeꞌ cu jichlonen ocoj, cꞌam chi skeꞌ cu bꞌison tzetyetal tol cꞌam.
16-17 Catuꞌ chin naꞌon yul wet jaxca tiꞌ: Jain tiꞌ, caw wal mimej winaj jin yalon ebꞌ ánima, yel xacꞌal jelan jin yintaj ebꞌ jix ecꞌle yin reyal bꞌey Jerusalén tiꞌ yet yalantoj. Caw wal ey jin naꞌbꞌal, miman cꞌal pax tzet wotaj. Jix jin oc wal ian jin naꞌoni, tzet wal sqꞌuexanil jelanil yetoj yin cꞌam cu naꞌbꞌal, cꞌal pena naꞌbꞌale. Jix wiltej wan tuꞌ, jaxca wal kaꞌeꞌ tol cꞌam chi skeꞌ cu mitxꞌon eyoj, queywal tuꞌ yeocoj. 18 Caw yel toni, ta chi kiꞌ cꞌal cu jelanil, chi chꞌibꞌ cꞌal pax cu bꞌiscꞌulal. Ta chi kotajne el mimanoj tzetyetal, chi chꞌibꞌ cꞌal pax kabꞌen syaꞌil.