3 Jix wakꞌle wal wakꞌon tzalabꞌoj jin cꞌul yin uqꞌue an, jix wute jin bꞌa jaxca junoj cꞌam snaꞌbꞌal; naꞌan cꞌal wu tol jaꞌ jin jelanil chin ijbꞌani. Jix woche jix wotajne eloj, tzetyetal tol miman yeloc apnoj chi wunne, yajbꞌan iquis jin ecꞌ jayebꞌoj cꞌual bꞌey yul yibꞌankꞌinal tiꞌ.

4 Manxa jantajoj tzetyetal jix jin waꞌne. Jix jin waꞌne a jin na caw miman, miman an uva jix waw sat jin txꞌotxꞌ. 5 Jix waw wanxa jin awbꞌeal teꞌ, cꞌal wan xumac teꞌ awbꞌil bꞌey jin parque. Jaꞌ tituꞌ jix waw masanil tujan teꞌ teꞌ chi yakꞌ sat. 6 Jix jin waꞌne cꞌal pax bꞌey chin yambꞌa jaꞌ jaꞌ yet chi waon oc yal wan jin awbꞌeal teꞌ tuꞌ. 7 Jix jin manon ebꞌ naj chin akꞌon servil, cꞌal ebꞌ ix chin akꞌon servil, ey ebꞌ wakꞌomal servil jix ali yul jin na; yetoj cꞌal pax oj, miman sbꞌisil noꞌ jin wacax, cꞌal noꞌ jin meꞌ yintaj wanxa ebꞌ jix ecꞌle bꞌey Jerusalén yet yalantoj. 8 Manxa jantajoj chꞌen oro, cꞌal chꞌen plata jix jin yambꞌa ecꞌ bꞌulanoj, tol titnaj yin sbꞌeomal wanxa ebꞌ rey bꞌey wanxa nacionlaj. Ey cꞌal pax ebꞌ winaj, cꞌal ebꞌ ix ix jix bꞌitni ey jin, jaꞌton masanil wan tuꞌ chi yoche ebꞌ ket animail. Ecꞌal pax ebꞌ ix ix jix oc wistiloj, txololi xacꞌal sjul ebꞌ ix jin cꞌatan an.

9 Caw mimej winaj jix wute jin bꞌa. Yel xacꞌal miman tzetyetal ey yul jin kꞌabꞌ yintaj masanil ebꞌ jix ecꞌle yet yalantoj bꞌey Jerusalén tiꞌ. Caxcꞌal ey masanil wan tiꞌ yul jin kꞌabꞌ, man yu oj tuꞌ jix qꞌueyel jin jelanilal. 10 Tzꞌajan cꞌal jix wiꞌ jantaj tzet chi yoche jin cꞌul. Cꞌam cꞌal pax junoj tzetyetal tol ma wunne. Jix wakꞌ tzalabꞌoj jin cꞌul yetoj masanil jin mulnail, jaꞌton jun tzalacꞌulal tuꞌ jix oc spajtzebꞌaloj ey jin.

11 Jix lawi tuꞌ, jix wilon oc masanil jin mulnail jix jin waꞌne, jaꞌton wan mulnail tol yin syaꞌtajilal jix yun swaꞌxi wu, queytuꞌ jix yun snaꞌcha el wu tol jaꞌ masanil wan tuꞌ, cꞌam niꞌoj yeloc apnoj. Laan xacꞌal jaxca chi yun kakꞌon kip cu mitxꞌon ey kaꞌeꞌ, cꞌam junoj tzetyetal tol watxꞌ chi kiꞌ bꞌey yul yibꞌankꞌinal tiꞌ.

12 Jix lawi tuꞌ, jix wilon pax oj tzet utbꞌil yeoc jelanil, yetoj yin cꞌam cu naꞌbꞌal, cꞌal pena naꞌbꞌale. ¿Tzet to wal yetal oj yun junojxa oj yakꞌ yaawilal jin qꞌuexeloj? ¿Tumi eyto cꞌal tzet oj swaꞌne, yutol watxꞌ xacꞌaltaꞌ yeoc masanil tzetyetal yet tax cꞌaltaꞌ peyxa? 13 Queyton tuꞌ jix yun snaꞌcha el wu, tol jaꞌ jelanil yel xacꞌal watxꞌ yintaj cꞌam naꞌbꞌale. Jaxca sajkꞌinal, yel xacꞌal watxꞌ yintaj kꞌejkꞌinal.

14 Jaꞌ mactxequel ey snaꞌbꞌal, caw chi cam yilon bꞌey chi eqꞌui. Jal pax mac tol cꞌam snaꞌbꞌal xin, jaxca tol xol kꞌejkꞌinal bꞌey chi ecꞌabꞌi. Jaꞌ yet jix naꞌcha el wu an, laan cꞌal chi yun yeloc apnoj scaabꞌ tujanil. 15 Catuꞌ jix walon yul wet jaxca tiꞌ: Jaꞌ tzetyetal chi echbꞌanen junoj cꞌam snaꞌbꞌal, jaꞌ chin echbꞌanen cꞌal pax jain tiꞌ, yu jun tuꞌ xin, cꞌam niꞌoj tzet oj oc jin jelanil tuꞌ wu, yutol masanil wan tuꞌ cꞌam wal niꞌoj yeloc apnoj. 16 Yutol cꞌam junoj mac oj naꞌletej, tam wal ebꞌ jelan, tam wal ebꞌ cꞌam snaꞌbꞌal. Jaꞌ yet chi bꞌey cꞌaltoj tiempo, masanil chi toocan qꞌueycꞌulal. Jaꞌ ebꞌ jelan, cꞌal ebꞌ cꞌam snaꞌbꞌal, laan cꞌal chi yun scam ebꞌ.

17 Yuxan jix jin naꞌ jaxca tiꞌ: Naꞌbꞌa xacꞌal iquis jin. Yutol jaꞌ masanil tzet chi wun bꞌey yul yibꞌankꞌinal tiꞌ, tucꞌal chi ketne cu bꞌa cu waꞌneni. Caw yel, cꞌam niꞌoj yeloc apnoj masanil, laan xacꞌal jaxca yet chi kakꞌle cu mitxꞌon kaꞌeꞌ. 18 Jix lawi tuꞌ, caw cꞌamxa chi woche masanil wan jin mulnail jix jin waꞌne bꞌey yul yibꞌankꞌinal tiꞌ, yutol jaꞌ masanil wan tuꞌ jacꞌal mi tet junojxa oj oc can jin qꞌuexeloj yin wopiso tiꞌ, jaꞌ oj iꞌon can ocoj. 19 Yutol cꞌam mactxequel otajneni, ta jelan ma tol cꞌam snaꞌbꞌal junoj mac oj iꞌon can oc jin mulnail tiꞌ, naꞌbꞌal cꞌal jix wabꞌ syaꞌil jin mulna yetoj jin jelanil, jaꞌ wan tuꞌ, caw naꞌbꞌacꞌal.

20 Jaꞌ yet chi wilon masanil tzetyetal jix jin waꞌne bꞌey yul yibꞌankꞌinal tiꞌ, tuxa cꞌal chin naꞌtej yu jantaj bꞌey jix wetne jin cꞌul yin mulnail. 21 Ey ebꞌ cꞌasan, jelan swaꞌnen smulnail ebꞌ yu tzet yotaj, jaxa chi yunne, asan pax tet junoj ma yetne scꞌul niꞌoj yin mulnail tuꞌ; jaꞌ jun tuꞌ chi iꞌon can oc masanil, caw man smoo oj jaxca tuꞌ.

22 Yu jun tuꞌ xin, ¿tzet wal chi yiꞌ junoj ánima yu miman oj smulnail catuꞌ caw miman chi yakꞌ bꞌiscꞌulal bꞌey yul yibꞌankꞌinal tiꞌ? 23 Ey cꞌal oc yin bꞌiscꞌulal masanil tiempo, caw al chi yabꞌ jaxca yalil junoj ijatz. Cꞌam bꞌey chi xew niꞌoj snaꞌbꞌal yet akꞌbꞌalil, yuxan jaꞌ jun tuꞌ naꞌbꞌacꞌal pax oj.

24 Jaꞌ jun tzetyetal tol watxꞌ chi yun ebꞌ ánima, asan tol chi low ebꞌ cꞌal yuqꞌuen jaꞌ ebꞌ, cꞌal yakꞌon tzalabꞌoj scꞌul ebꞌ yin smulnail tuꞌ. Jix naꞌcha el wan tuꞌ wu, tol jaꞌ bꞌey Dios chi tita. 25 Yutol, ¿mac wal junoj chi skeꞌ stzala scꞌul slowi, ta man yu oj Dios? 26 Ta tol chi tzala Dios ketoj, chi yakꞌ cu jelanil, chi yakꞌ cu naꞌbꞌal, chi yakꞌon cu tzalacꞌulal. Jaꞌ chi akꞌon yip ebꞌ penawom yin smulnail, yet chi syambꞌa cantoj bꞌulan tzettaj yetal ebꞌ, yet chi akꞌle tet junoj tol watxꞌ chi yute sbꞌa sattaj Dios. Caw naꞌbꞌacꞌal wan tuꞌ, laan xacꞌal jaxca yet chi kakꞌle cu mitxꞌon ey kaꞌeꞌ yetoj cu kꞌabꞌ.