Masanil Tzetyetal Ey Scꞌual
3
Masanil tzettaj yetal ey scꞌual, masanil tzet chi ui bꞌey yul yibꞌankꞌinal tiꞌ, ey yorail:2 Ey scꞌual yet chi cu ali, ey scꞌual yet chi cu cami. Ey scꞌual yet chi awle awo, ey cꞌal pax scꞌual yet chi jocꞌle a tzet awbꞌil.
3 Ey scꞌual yet chi makꞌle cam ánima, ey cꞌal pax scꞌual yet chi antele ánima. Ey scꞌual yet chi uchle ey junoj tzetyetal, ey cꞌal pax scꞌual yet chi waꞌnele aoj.
4 Ey scꞌual yet chi cu okꞌi, ey cꞌal pax scꞌual yet chi cu tzee. Ey scꞌual cuscꞌulal, ey cꞌal pax scꞌual yet chi oc kꞌin.
5 Ey scꞌual yet chi uchle sajlem wanoj chꞌen chꞌen, ey pax scꞌual yet chi yambꞌale oc bꞌulan chꞌen. Ey scꞌual yet chi oc lakꞌlebꞌail, ey pax scꞌual yet cꞌam lakꞌlebꞌail.
6 Ey scꞌual yet chi seyle tzetyetal, ey cꞌal pax scꞌual yet chi bꞌejle qꞌueytoj. Ey scꞌual yet chi cꞌubꞌale a tzetyetal, ey pax scꞌual yet chi kꞌojle eloj.
7 Ey scꞌual yet chi nicꞌletoj junoj kꞌap, ey cꞌal pax scꞌual yet chi tzꞌisle eyoj. Ey scꞌual yet tzꞌin xacꞌal cu chi, ey pax scꞌual yet chi cu kꞌanabꞌi.
8 Ey scꞌual camcꞌulal, ey cꞌal pax scꞌual cajlebꞌail. Ey scꞌual yet chi oc jowal, ey cꞌal pax scꞌual yet chi oc watxꞌcꞌulal.
9 ¿Tzet wal chi kiꞌ yin cu mulnail, yutol naꞌbꞌacꞌal chi ketne cu cꞌul yin mulnail? 10 Jain tiꞌ, jix wilaꞌ, manxa jantajoj mulnail jix yaoc Dios yibꞌan ebꞌ ánima. 11 Caw watxꞌ jix yun swaꞌnen masanil tzetyetal Dios, ta chi eloc cu waꞌneni. Jix yakꞌ kochwan yin kotajne el tzettaj yetal yet bꞌakꞌin, asan xin, cꞌam chi yakꞌ naꞌcha el ku sicꞌlebꞌil yu jantaj tzet chi snaꞌ yuneni.
12 Jix wotajne eloj tol cꞌam junojxa tzetyetal yel xacꞌal watxꞌ chi skeꞌ kuneni, asan tol chi cu tzalai, catuꞌ watxꞌ cꞌal tzet chi kunne yajbꞌan iquis jon. 13 Tol junjun jon chi cu lowi, cꞌal kuqꞌuen jaꞌ, catuꞌ chi kakꞌon tzalabꞌoj cu cꞌul yin masanil tzetyetal chi kiꞌ yin cu mulnail, yutol jaꞌ Dios chi akꞌon ey jon. 14 Yetoj cꞌal pax oj, jix wotajne eloj tol jaꞌ masanil tzettaj yetal jix swaꞌne Dios, ey cꞌal ecꞌ yin tobꞌalkꞌinal. Cꞌam chi skeꞌ yale oc stzꞌajil, tam wal ey tzet chi skeꞌ yiꞌle eloj. Queytuꞌ jix yute Dios jaxca tuꞌ, yuxan smoo tol miman yeloc apnoj Dios yul cu sat. 15 Jaꞌ masanil tzetyetal ey tinaniꞌ, eyxa cꞌaltaꞌa. Jal pax tzetyetal tol to oj juloj, eyxa cꞌaltaꞌ ecꞌ yet yalantoj, asan tucꞌal chi qꞌuexlabꞌi yili yu Dios.
Jaꞌ Tzetyetal Man Smoo Oj Chi Bꞌeybꞌalnelei
16 Catuꞌ jix wilon cꞌal pax oj, tol jaꞌ bꞌey yul yibꞌankꞌinal tiꞌ, jaꞌ yet chi naꞌle oc yin ebꞌ ánima, smoo tol ey swatxꞌilal, cꞌal sjichanil, asan cꞌal pax tzetyetal man watxꞌoj chi bꞌeybꞌalnelei. 17 Yu jun tuꞌ, yuxan chin naꞌ tol jaꞌ Dios oj naꞌon oc kin jaon ánima jon tiꞌ, caxcꞌal watxꞌ cu bꞌeybꞌal ma pena cu bꞌeybꞌal, yutol jaꞌ masanil tzettaj yetal cꞌal masanil tzet chi bꞌeybꞌalnelei, oj aapnoj scꞌual yet oj naꞌle oc yin.
18 Jacꞌalaꞌ pax oj, chi walon cꞌal pax yu cu bꞌeybꞌal jaon ánima jon tiꞌ, tol jaꞌ Dios chi cu akꞌon porobꞌal, yet chi naꞌcha el ku tol laan jon jaxca noꞌ noꞌ. 19 Jaon ánima jon tiꞌ, cꞌal noꞌ noꞌ, jun laan cꞌal chi yun cu lawi eyoj, chi cam noꞌ noꞌ, catuꞌ chi cu cam cꞌal pax oj, jun laan cꞌal chi yun kiꞌon cu kaꞌeꞌ yetoj noꞌ, man ecꞌbꞌanoj chi yun kiꞌon cu kaꞌeꞌ yintaj noꞌ noꞌ, yutol masanil tzetyetal cꞌam yeloc apnoj. 20 Junne jun lugar bꞌey chi cu apni can oc cu masanil yetoj noꞌ noꞌ, yutol jaꞌ yin pojoj jix cu tita. Jacꞌalaꞌ oj cu meltzo can oc yin pojojal. 21 ¿Mactxequel otajneni, ta tol jaꞌ cu pixan tol chi too bꞌey satcan, jaxa spixan noꞌ noꞌ chi toocan bꞌey snaatil yalan txꞌotxꞌ txꞌotxꞌ? 22 Jix naꞌcha wal el wu tol cꞌam junojxa tzetyetal watxꞌ chi kunne, asan tol chi kakꞌ tzalabꞌoj cu cꞌul yin tzetyetal chi kiꞌ yin cu mulnail, yutol queytuꞌ yeoc kibꞌan. ¿Macto oj akꞌon kotajne eloj tzet chi ecꞌtoj yet xax cu cami?