4
Jix watoj jin naꞌbꞌal yin masanil tzetyetal man watxꞌoj chi ecꞌtoj bꞌey yul yibꞌankꞌinal tiꞌ. Jix wilon xin, tol jaꞌ ebꞌ chi etnelei, caw wal chi okꞌ ebꞌ, yutol cꞌam mac chi colon el ebꞌ, jaꞌ wan chi etnen ebꞌ tuꞌ, jaꞌton ebꞌ ey yopiso. 2 Yu jun tuꞌ, jix jin naꞌ tol yel xacꞌal watxꞌ yet ebꞌ xax camtoj, yintaj ebꞌ iquisto ecꞌoj. 3 Watxꞌ yet ebꞌ cꞌamto chi ali, yutol jaꞌ mac cꞌamto chi ali, cꞌamto chi yil masanil tzetyetal man watxꞌoj chi ecꞌtoj bꞌey yul yibꞌankꞌinal tiꞌ.4 Jix wiloni, ta tol miman chi cu mulna bꞌey yul yibꞌankꞌinal tiꞌ, catuꞌ ta miman tzet chi cu yambꞌa ocoj, ey ebꞌ ánima chi jowi oc kin. Naꞌbꞌacꞌal cu mulnail chi yal tuꞌ. Laan xacꞌal jaxca yet chi kakꞌle cu mitxꞌon ey kaꞌeꞌ yetoj cu kꞌabꞌ.
5 Ey bꞌey chi al-lei, tol asan ebꞌ cꞌam snaꞌbꞌal, tucꞌal eyecꞌoj, chi sculusne skꞌabꞌ cꞌam tzet chi yunne, chi yakꞌ cam sbꞌa ebꞌ yu wail. 6 Jain tiꞌ chi wal jaxca tiꞌ: Yel xacꞌal watxꞌ ta txenne tzet ey yul cu kꞌabꞌ, tane wal tol tzalacꞌulal cꞌal ey jon, yintaj pax tol miman tzetyetal ey, ey jon, ta tol caw chi ketne cu cꞌul cu seyoni, laan jaxca yet chi kakꞌle cu mitxꞌon ey kaꞌeꞌ yetoj cu kꞌabꞌ.
7 Jix wilon junxa tzetyetal chi ecꞌtoj bꞌey yul yibꞌankꞌinal tiꞌ, tol naꞌbꞌacꞌal. 8 Ey mactxequel tol xꞌojli xacꞌal, cꞌam junoj yuninal, cꞌam junoj yuẍtaj, cꞌam pax swatxꞌil ánima, cꞌam chi xew pax junoj txolan, cꞌam chi sbꞌej yilon smulnail, tam wal chi snaꞌ yin snaꞌbꞌal jaxca tiꞌ: ¿Mac taꞌ la yu, yuxan chin mulna an? ¿Tzet taꞌ la yu, yuxan tol chi wetne jin cꞌul? man ẍi oj. Jaꞌ yin jaxca tuꞌ, naꞌbꞌacꞌal, tucꞌal chi ketne cu cꞌul.
Jaꞌ Cu Junbꞌanebꞌail Miman Tzet Chi Skeꞌ Cu Waꞌneni
9 Watxꞌ ta tol junne chi yun smulna cawanoj ánima yintaj tol asan chꞌan jun, ta jaxca tuꞌ, miman tzetyetal chi yiꞌ ebꞌ yin smulnail tuꞌ. 10 Ta chi telcꞌotoj junoj ebꞌ tuꞌ, jaxa junxa tuꞌ chi ketzon a waanoj. Jal ta xꞌojli junoj ánima xin, ta chi telcꞌotoj, cꞌamxa mactxequel chi ketzon a waanoj. 11 Yetoj cꞌal pax oj ta jaꞌ cawan ánima tuꞌ junne chi wey ebꞌ, chi yijbꞌale kꞌaxna ey sbꞌa ebꞌ, jal ta asan chꞌan junoj ánima chi wey xꞌojli, ¿Tzet wal oj yun skꞌaxna ey xꞌojli? 12 Subꞌo cꞌal pax chi yun yeyqꞌuey junoj mactxequel yu junojxa ta xꞌojli, ta ey pax cawanoj xin, chi skeꞌ scol-len sbꞌa ebꞌ, ilaꞌ cꞌal pax junoj txꞌan lasu ey oxebꞌoj yeocoj, man subꞌo chi yun snicꞌchai.
Man Yu Oj Tol Icham Ánima Jon Xa, Yuxan Ey Cu Jelanil
13 Yel xacꞌal watxꞌ junoj achꞌe tol jelan snaꞌbꞌal, yintaj pax junoj rey tol icham winajxa tol cꞌam pax snaꞌbꞌal, cꞌamxa chi ẍaꞌ yabꞌ naꞌbꞌale. 14-15 Caxcꞌal mi jaꞌ naj achꞌe tuꞌ speto yul preso, ma caw mebꞌa naj yet chi oc yin reyal, jix wilaꞌ tol masanil ánima chi aloni, tol jaꞌ naj achꞌe tuꞌ chi oc can reyal sqꞌuexeloj naj icham winajxa tuꞌ. 16 Caxcꞌal mi cꞌamxa chi bꞌischa jantaj sbꞌisil conobꞌ bꞌey chi yakꞌ yaawil naj rey tuꞌ, cꞌam chi can cꞌal ebꞌ yin tzalacꞌulal yetoj, tam wal yicꞌaal ebꞌ. Jaꞌ masanil wan tuꞌ naꞌbꞌacꞌal. Taꞌ chi kakꞌ kip kakꞌon tzalabꞌoj scꞌul masanil ebꞌ ánima kin, naꞌbꞌacꞌal, laan jaxca yet chi kakꞌle cu mitxꞌon ey kaꞌeꞌ yetoj cu kꞌabꞌ.