Sowalil Cha Wun Bꞌey Cha Wakꞌ Can Ja Tiꞌ Tet Dios
5
Jaꞌ yet chach too bꞌey stemplo Dios, chi cam ja naꞌon bꞌey chach oc linanoj. Yel xacꞌal watxꞌ tol cha jitztoj ja bꞌa sattaj yet cha wabꞌen skꞌane Dios, cꞌal ja jijeni; yintaj pax tol tucꞌal cha wakꞌcan ja xaambꞌal, jaxca chi yun ebꞌ cꞌam snaꞌbꞌal, cꞌam chi snaꞌ ebꞌ ta pena chi el yuneni.2 Chi cam ja naꞌon yin sbꞌabꞌelal, catuꞌ cha wakꞌon ja tiꞌ tet Dios yin tzet cha wakꞌ tet, yutol jaꞌ bꞌey satcan tuꞌ tꞌanan eytej Dios ja win, jal jaach xin, jaꞌ bꞌey sat txꞌotxꞌ tiꞌ ey jaach ecꞌoj. Yu jun tuꞌ xin, chi cu naꞌ tzet chi kalaꞌ. 3 Yutol jaꞌ yet miman tzet chi cu naꞌ, chi cu weyichli a yu. Ta miman cu kꞌane chi kalaꞌ, ey xacꞌal kꞌane cꞌam yeloc apnoj chi kalaꞌ.
4 Jaꞌ yet cha wakꞌon ja tiꞌ yin junoj tzetyetal tet Dios, cꞌam ojabꞌ chi too mimanoj tiempo ja wakꞌoni, yutol cꞌam chi ẍaꞌ scꞌul Dios ebꞌ comon cꞌal chi stakꞌe stiꞌ yakꞌoni, yuxan akꞌ eloc bꞌey cha wakꞌcan ja tiꞌ tet Dios. 5 Yel xacꞌal mi watxꞌ tol cꞌam cha wakꞌcan ja tiꞌ yin ja wakꞌon junoj tzetyetal, yintaj pax tol cha takꞌe ja tiꞌ ja wakꞌoni, catuꞌ cꞌam pax cha wakꞌa.
6 Cꞌam ojabꞌ chi oc cu penail yu tzet chi kalaꞌ, tala chi kal sattaj ebꞌ ẍejabꞌ Dios jaxca tiꞌ: Tol ey jon oc yin qꞌueycꞌulal yet jix kaloni. ¿Tzet yu, yuxan chi cu txꞌemtej sjowal scꞌul Dios yu tzet chi kalaꞌ, catuꞌ chi yakꞌon lawoj ey tzetyetal chi cu waꞌne tuꞌ? 7 Ta tol tucꞌal chi cu naꞌ tol miman tzet oj cu waꞌne yin yet Dios, ta miman xacꞌal tzet chi kalaꞌ, cꞌam pax chi cu waꞌne, naꞌbꞌacꞌal; watxꞌ tol miman ojabꞌ yeloc apnoj Dios yul cu sat.
Wan Tzetyetal Cꞌam Chi Ẍaꞌle Sbꞌa
8 Cꞌam ojabꞌ chi qꞌueya ja cꞌul ta tol jaꞌ bꞌey junoj conobꞌ cha wilaꞌ, tol chi etex ebꞌ mebꞌa; cꞌam chi iꞌle bꞌey ley yin sjichanil, yutol jaꞌ ebꞌ ey yopiso, chi col-le yu wanxa ebꞌ caw mimej yopiso; jaꞌ wanxa ebꞌ tuꞌ chi col-le ebꞌ yu junojxa yel xacꞌal miman yopiso. 9 Yutol jaꞌ naj rey miman yeloc apnoj yetoj yopiso yibꞌan wanxa ebꞌ yaaw, yu jun tuꞌ, yuxan miman tzet chi yiꞌcan naj yin jantaj tzet chi el sat txꞌotxꞌ yul sconobꞌ tuꞌ.
10 Ta tol caw chi koche oc chꞌen tumin, cꞌam bꞌakꞌin chi lawi kochen oc chꞌen. Ta tol chi koche cꞌal oc bꞌeomal, cꞌam bꞌakꞌin tol oj kalaꞌ tol kꞌojbꞌil xacꞌal tzetyetal ey, ey jon. Jaꞌ jun tuꞌ, naꞌbꞌacꞌal chi ketne cu cꞌul. 11 Yutol ta mimanxa tzetyetal ey tet junoj mactxequel, miman cꞌal pax tzetyetal chi lawi yu. Asan tzetyetal chi yiꞌ yin, asan tol chi yil yecꞌ yul skꞌabꞌ. 12 Jaꞌ mactxequel chi mulnai, caxcꞌal ey sloꞌbꞌe ma cꞌam wal sloꞌbꞌe, yin cꞌal tzalacꞌulal chi yun sweyi. Jal pax junoj bꞌeom xin, cꞌam chi wey yu bꞌiscꞌulal yu snaꞌon sbꞌeomal tuꞌ.
13 Ey wal jun tzetyetal tol cusiltaj yeoc jix wil bꞌey yul yibꞌankꞌinal tiꞌ: Tol ey mac tucꞌal chi syambꞌa ecꞌ bꞌulan sbꞌeomal, jacꞌal oc sbꞌeomal tuꞌ chi iꞌontej cuscꞌulal yibꞌan. 14 Kꞌinaloj ta jaꞌ junoj txon man watxꞌoj, chi skeꞌ slawi ey jun bꞌeomal tuꞌ yu. Ta tol jaꞌ jun mac ey yet jun txon tuꞌ ey junoj scꞌaal, cꞌamxa tzetyetal chi skeꞌ yakꞌon can tet yin slawubꞌal. 15 Jaxca cꞌal chi yun kali bꞌey yul yibꞌankꞌinal tiꞌ, quey cꞌal pax tuꞌ chi yun cu paxtoj. Tꞌiran jon eloj yet chi cu ali, jaxa yet chi cu meltzotoj cꞌam niꞌoj cu mulnail chi kiꞌtoj ketoj. 16 Jaꞌton jun tuꞌ cuscꞌulaltaj yet chi cu naꞌontej. Yutol jaxca wal jix yun yali jun bꞌeom tuꞌ, quey cꞌal pax tuꞌ yili yet oj camtoj. Naꞌbꞌacꞌal chi ketne cu cꞌul yin miman mulnail chi kunne. 17 Jaꞌ yet iquis jon ecꞌ yul yibꞌankꞌinal tiꞌ, xol xiwcꞌulal chi cu lowi, ey bꞌey chi ketne cu cꞌul kabꞌen syaꞌil, manxa jantajoj cu bꞌiscꞌulal.
18 Asan jun tzetyetal watxꞌ jix wil bꞌey jun yul yibꞌankꞌinal tiꞌ, asan tol chi cu lowi, chi kucꞌ jaꞌ, catuꞌ chi kakꞌon tzalabꞌoj cu cꞌul yin tzet chi kiꞌ yin cu mulnail, yajbꞌan ey niꞌoj cu cawil chi yakꞌ Dios titiꞌ, asan ton jun tiꞌ chi jul kunne. 19 Yetoj cꞌal pax junxa tiꞌ, ta tol jaꞌ Dios chi akꞌon chꞌibꞌ cu bꞌeomal, yu cu loꞌoni cꞌal kuqꞌueni, yuxan chi yakꞌ ey jon; jaꞌ chi akꞌon cꞌal pax yet chi kakꞌon tzalabꞌoj cu cꞌul yin cu mulnail tuꞌ. Syaxilal ton Dios wan tuꞌ. 20 Yajbꞌan chi yakꞌ Dios cu tzalacꞌulal yin cu mulnail tuꞌ, tumi naꞌan cu tzet chi yun yecꞌtoj cu kꞌinal junjun cꞌu.