6
Jaꞌ bꞌey yul yibꞌankꞌinal tiꞌ jix wil wan tzetyetal chi ecꞌtoj cu xol tol man smoo oj: 2 Jaꞌ Dios chi akꞌon bꞌeomal cꞌal smimanbꞌilal junoj mactxequel, ey xacꞌal masanil tzet chi yoche, cꞌam pax chi chaꞌle yakꞌ tzalabꞌoj scꞌul yin masanil tzet ey yul skꞌabꞌ, jaxa yet chi cami, txꞌojxa junoj mactxequel chi yakꞌ tzalabꞌoj scꞌul yetoj. Jaꞌ jun tuꞌ, caw man smoo oj jaxca tuꞌ, caw cuscꞌulaltaj xacꞌal kalontej. 3 Ta ey junoj winaj ey junoj 100 sbꞌisil yuninal, caxcꞌal mi caw naatil chi ecꞌ yul yibꞌankꞌinal tiꞌ, ta cꞌam chi yakꞌ tzalabꞌoj scꞌul yin tzetyetal watxꞌ, ta man pax watxꞌoj chi yun smujle yet chi camtoj. Jaꞌ yet chin naꞌon yibꞌan jain tiꞌ, tol yel xacꞌal mi watxꞌ yet junoj unin tucꞌal chi ecꞌ eloj, yintaj pax junoj winaj queytuꞌ yili skꞌinal bꞌey yul yibꞌankꞌinal tiꞌ. 4 Jaꞌ junoj unin tucꞌal chi ecꞌ el jaxca tuꞌ, cꞌam cꞌal bꞌey chi bꞌinale can ecꞌ niꞌoj, 5 caxcꞌal mi cꞌam chi yil niꞌoj sajil yajan cꞌu, tam wal ey tzet chi yotajne eloj, jaꞌ jun tuꞌ, tol chi xewi yintaj pax junoj winaj tucꞌal chi julecꞌ yetne scꞌul, 6 ta tol ma yakꞌ tzalabꞌoj scꞌul niꞌoj yin tzetyetal ey yul skꞌabꞌ, caxcꞌal mi chi ecꞌ yin caabꞌoj mil abꞌil bꞌey yul yibꞌankꞌinal tiꞌ. Jaꞌ yet chi lawi can apnoj, jun laan cꞌal chi yun stoo can ebꞌ bꞌey cambꞌal.7 Jaꞌ masanil cu mulnail chi kunne, asan cꞌal yu yoc yopiso yu cu mimanil tiꞌ, cꞌam cꞌaltaꞌ bꞌakꞌin chi oc tucan kochen oc jantaj tzetyetal chi kiloc yetoj cu sat. 8 ¿Tzet swatxꞌilal yet junoj ánima ey snaꞌbꞌal, yintaj junoj tol cꞌam snaꞌbꞌal? Ta mebꞌa jun jelan snaꞌbꞌal tuꞌ, caxcꞌal mi caw yotaj chi yiꞌ bꞌey sbꞌa yin swatxꞌilal yetoj ebꞌ ket animail. 9 Yel xacꞌal watxꞌ ta txenne tzetyetal ey, ey jon, yintaj pax tol chi koche xacꞌal oc wanojxa tzetyetal. Jaꞌ tzet chi koche oc tuꞌ, naꞌbꞌacꞌal, laan xacꞌal jaxca yet chi kochen chi cu mitxꞌey kaꞌeꞌ yetoj cu kꞌabꞌ.
10 Jaꞌ tzetyetal eyecꞌ tinaniꞌ, chi bꞌinale cꞌaltaꞌ ecꞌ yet peyxa tuꞌ. Jaꞌ tzet keoc jaon tiꞌ, otajbꞌil tzet keocoj, yutol naꞌbꞌa ánima jon. Yuxan cꞌam chi skeꞌ cu teelen cu bꞌa yetoj Dios, yutol caw ey yipal Naj. 11 Ey jun kꞌane chi al-le jaxca tiꞌ: Jaꞌ xol mimanoj kꞌane chi al-lei, ey kꞌane cꞌam yeloc apnoj chi kalaꞌ, cꞌam niꞌoj tzetyetal chi kiꞌ yin caxcꞌal ey mimanoj cu kꞌane chi kalaꞌ. 12 Tumi ey junoj mac yotaj tzetyetal watxꞌ chi oc swatxꞌiloj, yajbꞌan eyecꞌ bꞌey yul yibꞌankꞌinal tiꞌ. Jaꞌ cu kꞌinal tiꞌ cꞌam niꞌoj yeloc apnoj, laan cꞌal jaxca junoj enele tucꞌal chi ecꞌ eloj. ¿Tumi ey junoj mactxequel oj skeꞌ yalon ey jon tzetyetal oj jul bꞌey yul yibꞌankꞌinal tiꞌ yet xax cu camtoj?