Kakꞌwej Kip Yin Tzet Miman Yeloc Apnoj
7
Yel xacꞌal watxꞌ, tol watxꞌ cu bꞌinale ecꞌoj,yintaj pax tol sukꞌukꞌi yel sabꞌ perfume yin cu pichil.
Yel xacꞌal watxꞌ yet chi jul scꞌual yet chi cu cami, yintaj pax yet chi jul scꞌual yet chi cu ali.
2 Yel xacꞌal watxꞌ tol chi cu too ilo akꞌbꞌal bꞌey ey junoj camom, yintaj pax tol yin junoj ilo kꞌin chi cu toocanoj, yutol jaꞌ camich jaꞌ eyoc cu lawubꞌaloj cu masanil; watxꞌ ta tol chi cu naꞌ yin jun tuꞌ yajbꞌan iquis jon to ecꞌoj.
3 Yel xacꞌal watxꞌ ta tol chi cu okꞌi, yintaj pax tol chi cu tzeewi, caxcꞌal cusiltaj yili cu sat, jaxa slawubꞌal tol chi waꞌxi oc cu naꞌbꞌal yu.
4 Jaꞌ mactxequel ey snaꞌbꞌal chi snaꞌ yibꞌan camich; jal pax mac cꞌam snaꞌbꞌal xin, asan yin yakꞌon tzalabꞌoj scꞌul bꞌey eyoc snaꞌbꞌal.
5 Yel xacꞌal watxꞌ ta chi cu chaꞌ kabꞌ tenchebꞌal chi yakꞌ junoj ey snaꞌbꞌal ey jon, yintaj pax tol chi cu al-le watxꞌil yu junoj cꞌam snaꞌbꞌal.
6 Jaꞌ yet chi kabꞌen yul snukꞌ junoj cꞌam snaꞌbꞌal yet chi stzeewi, laan jaxca yet chi paꞌlabꞌi teꞌ qꞌuix yet chi tzꞌaꞌtoj teꞌ xol kꞌakꞌ, yutol cꞌam niꞌoj yeloc apnoj.
7 Jaꞌ chꞌen montebꞌal tumin chi akꞌle yin ewantajil, jaꞌ chi etnen el snaꞌbꞌal ebꞌ jelan. Laan chi yun can el ebꞌ jaxca junoj cꞌam snaꞌbꞌal.
8 Yel xacꞌal watxꞌ ta tol yin tzalacꞌulal chi yun slawi yal-lei junoj tzetyetal, yintaj yet chi ẍaꞌel yich.
Yel xacꞌal watxꞌ ta yeynajil chi kute cu bꞌa, yintaj pax tol chi cu meyne cu bꞌa.
9 Man ojabꞌ cꞌuun oj stit cu jowal, yutol jaꞌ jun chichoncꞌulal tuꞌ, yet ebꞌ ánima cꞌam snaꞌbꞌal yeocoj.
10 Cꞌam ojabꞌ cha kꞌanle jaxca tiꞌ: ¿Tzet yu, yuxan watxꞌ cꞌal jix yun sbꞌeycꞌaltej tiempo yet peyxa yintaj pax tinaniꞌ? man ojabꞌ ja chioj. Jaꞌ wan kꞌanlebꞌal jaxca tuꞌ, jaꞌ ebꞌ cꞌam snaꞌbꞌal chi kꞌanleni.
11 Ta tol jelan jon, ey cu naꞌbꞌal, yel xacꞌal watxꞌ ket yintaj pax tol miman tzetyetal chi cu majcan oc bꞌey yul yibꞌankꞌinal tiꞌ. 12 Yutol jaꞌ jelanil tuꞌ, chi colwa tet mactxequel jaxca chi yun scolwa chꞌen tumin kin, yuxan yel xacꞌal watxꞌ jun jelanil tuꞌ, yutol chi cu yiꞌ bꞌey yin watxꞌcꞌulal.
13 Chi cam wal kiloni, jantaj tzetyetal jix swaꞌne Dios: ¿Mactxequel junoj chi skeꞌ sjichlonen oc tzetyetal tol cotxan jix yute canoj? 14 Ta watxꞌ ey jaach, akꞌ tzalabꞌoj ja cꞌul; ta man watxꞌoj ey jaach cha wabꞌe, naꞌ yibꞌan yutol jaꞌ Dios chi uten caabꞌ tujan tuꞌ, yu jun tuꞌ xin, jaon ánima jon tiꞌ, man kotajoj tzetyetal chi jul cu sattaj.
15 Jain tiꞌ, masanil cꞌal chi el wilon yin jin kꞌinal cꞌam yeloc apnoj, jix wil masanil tzetyetal. Ey ebꞌ ánima watxꞌ snaꞌbꞌal chi cam ebꞌ, ey pax ebꞌ ánima caw pena sbꞌeybꞌal, caw miman tiempo chi yil pax ebꞌ.
16 Yu jun tuꞌ, yuxan cꞌam ojabꞌ chach ecꞌ yibꞌan ja wotajnen el swatxꞌilal, tam wal chach ecꞌ yibꞌan ja wotajnen el jelanilal, tala jaach cꞌal oc cha wetne ja bꞌa.
17 Cꞌam ojabꞌ chach ecꞌ xacꞌal yibꞌan tol pena cha wute ja bꞌa, cꞌam ojabꞌ cha wute cꞌal pax ja bꞌa yin tol cꞌam ja naꞌbꞌal, yet watxꞌ man oj jaach cam yet cꞌamto chi aapnoj scꞌual ja camichal.
18 Watxꞌ ojabꞌ chi kute kiꞌon bꞌey cu bꞌa yin jun tiꞌ, cꞌam ojabꞌ chi kakꞌ qꞌueytoj cu naꞌbꞌal.
Jaꞌ mactxequel tol ey yeloc apnoj Dios yul sat, watxꞌ cꞌal chi yun yeloc apnoj yin masanil tzetyetal.
19 Jaꞌ junoj jelan, chi akꞌle stecꞌanil yu sjelanil snaꞌbꞌal tuꞌ, ecꞌbꞌan yeloc apnoj yintaj laonwan ebꞌ yaaw eyoc yin yopiso yul junoj conobꞌ.
20 Asan xin, cꞌam junoj mactxequel caw jichan sbꞌeybꞌal bꞌey yul yibꞌankꞌinal tiꞌ, yin tol cꞌam bꞌey chi oc spenail.
21 Cꞌam ojabꞌ cha chaꞌ ja wabꞌ masanil tzetyetal chi al-lei, ta jaxca tuꞌ, man pena oj cha wabꞌe, yet pena tzet oj yal ebꞌ ja wakꞌomal servil ja win, 22 yutol kotaj, ey bꞌey chi kal pena kꞌane yin junojxa mactxequel.
Tzet Chi Yun Cu Seyon Ecꞌ Jelanilal
23 Yetoj jin jelanil jix jin naꞌ yibꞌan masanil wan tiꞌ, yutol ey wal oc yin jin naꞌbꞌal tol jelan chin elocoj. Asan xin, cꞌam chi naꞌcha el wu chi wabꞌe. 24 Jaꞌ masanil jun jelanil tuꞌ, cꞌam chi naꞌcha el wu, yutol caw yaꞌtaj snaꞌcha eloj, cꞌam mac chi skeꞌ snaꞌcha el yu.
25 Jix jin oc wal ian wotajnen eloj, cꞌal jin cuyoni, cꞌal jin seyon ecꞌ jun jelanil tuꞌ, tzet utbꞌil yeoc masanil. Jaꞌ tzet jix yun snaꞌcha el wu, tol caw pena sattaj Dios, ta tol chi cu pitne cu bꞌa yetoj cu cꞌam naꞌbꞌalil.
26 Ey wal jun tzetyetal yel xacꞌal pena jix ilcha wu yintaj camich. Jaꞌton junoj ix tol jelan yin yakꞌon eyqꞌuey winaj yin amulal, cꞌamxa chi jajle el ebꞌ yu ix. Jal ebꞌ ey yeloc apnoj Dios yul sat xin, cꞌam chi eyqꞌuey ebꞌ yu ix, jal pax junoj tol pena cꞌaltaꞌ snaꞌbꞌal xin, subꞌo yeyqꞌuey ebꞌ yu ix.
27-28 Jaꞌ yet jix wakꞌon wip snaꞌcha el masanil wan tzetyetal tiꞌ wu, caw miman tzetyetal tol cꞌam tocꞌal chi wotajne eloj. Jaꞌ tzet jix wotajne el yin wan tuꞌ, jaꞌton jun tiꞌ: Asanne jun winaj tol yel miman yeloc apnoj jix ilcha wu xol jun mil ebꞌ winaj. Jal pax xol ebꞌ ix ix xin, cꞌam junoj ey yeloc apnoj jix ilcha oc wu. 29 Asan wan tiꞌ jix ilcha oc wu: Jaꞌ ebꞌ ánima caw watxꞌ jix yun swaꞌnele can ebꞌ yu Dios, jaxa ebꞌ ánima miman cꞌal tzetyetal jix sloctej ebꞌ yibꞌan.