2 Jijem ojabꞌ chi kute cu bꞌa tet chejbꞌanile chi yal naj rey, yutol jaxca tuꞌ jix yun kakꞌon cu tiꞌ tet Dios. 3 Cꞌam ojabꞌ chach eltoj sattaj naj rey tuꞌ yin eymanil, tam wal cha tecꞌbꞌa ja bꞌa ja walon junoj pena kꞌane sattaj naj, yutol chi skeꞌ yunen tzetyetal tol chi ẍaꞌ scꞌul naj. 4 Yutol asan naj rey chi skeꞌ yalon junoj slawubꞌ kꞌane, cꞌam junoj mactxequel oj skeꞌ skꞌanlen yabꞌ tzetyetal chi yun naj.

5 Jaꞌ mactxequel chi sjije junoj chejbꞌanile, cꞌam tzetyetal chi tit yibꞌan. Jaꞌ mactxequel ey snaꞌbꞌal, chi naꞌcha el yu bꞌakꞌin oj yunne, cꞌal tzet chi yun sjijeni. 6 Ey wal xolilal tzet chi yun cu jijeni, cꞌal scꞌual, tzet chi yun cu waꞌnen junoj tzetyetal, asan xin, ey jun tzet chi cu etneni, 7 tol man kotajoj tzetyetal oj jul cu sattajto, tam wal ey mactxequel chi skeꞌ yakꞌon kotajne eloj.

8 Cꞌam mac ey yipal yibꞌan kiquisal, cꞌam mac chi skeꞌ smitxꞌon oc tucanoj. Cꞌam mac chi skeꞌ stenon oc tucan scꞌual cu camichal, yutol jaꞌ camich tuꞌ, jaxca wal junoj jowal cꞌam chi skeꞌ cu colon cu bꞌa tet, tam wal junoj penawom cꞌam chi skeꞌ scol-le el yul skꞌabꞌ yu spenail tuꞌ.

9 Masanil wan tiꞌ jix wilaꞌ, yet jix jin oc ian wotajnen el tzetyetal chi ecꞌtoj bꞌey yul yibꞌankꞌinal tiꞌ, jaꞌ ebꞌ ánima tol ey yopiso eyocoj, chi yakꞌbꞌalne yopiso ebꞌ tuꞌ yin yetnen yet animail.

10 Jix wilon cꞌal pax oj, tol jaꞌ yet chi camtoj ebꞌ ánima pena snaꞌbꞌal, caw chi bꞌinale can ecꞌ ebꞌ yu ebꞌ ánima. Jal pax ebꞌ ánima yeynajil chi yute sbꞌa tet Dios xin, tumi eyto mactxequel chi naꞌontej ebꞌ, cꞌal yu jantaj tzetyetal watxꞌ jix el yunen ebꞌ yul sconobꞌ. Jaꞌ yu wan tuꞌ, yuxan tucꞌal chi somcha el cu naꞌbꞌal yet chi cu naꞌontej. 11 Yutol cꞌam chi ale oc syaꞌilal yibꞌan ebꞌ pena sbꞌeybꞌal yin eymanil, yuxan asanxane spenail tuꞌ chi snaꞌ ebꞌ ánima yuneni. 12 Caxcꞌal mi tol chi oc cꞌal spenail ebꞌ ánima tuꞌ, caw miman pax tiempo chi ecꞌ ebꞌ bꞌey yul yibꞌankꞌinal tiꞌ; asan jun tzet wotaj an, tol jaꞌ mactxequel ey yeloc apnoj Dios yul sat, watxꞌ cꞌal chi elocoj. 13 Jal pax ebꞌ penawom xin, pena oj eloc ebꞌ, jaꞌ yiquisal ebꞌ laan jaxca chi yun yecꞌ el junoj enele chi qꞌueyaoj, yutol cꞌam yeloc apnoj Dios yul sat ebꞌ. 14 Jaꞌ tzet man xolilaloj chi yun bꞌey yul yibꞌankꞌinal tiꞌ chi wilaꞌ, ey bꞌey qꞌuexan chi yunne. Jaꞌ ebꞌ ánima watxꞌ sbꞌeybꞌal, chi yabꞌ syaꞌil ebꞌ, jaxca xacꞌal tol penawom ebꞌ, jal pax ebꞌ ánima caw penawom xin, caw chi yakꞌ tzalabꞌoj scꞌul ebꞌ, jaxca xacꞌal tol watxꞌ sbꞌeybꞌal ebꞌ. Jain tiꞌ chi walaꞌ tol tucꞌal chi somcha el cu cꞌul yu wan tuꞌ.

15 Yu jun tuꞌ, yuxan chi walaꞌ yajbꞌan iquis jon ecꞌ yul yibꞌankꞌinal tiꞌ, tol smoo kakꞌon tzalabꞌoj cu cꞌul cu lowi, cꞌal kuqꞌuen jaꞌ, jaꞌton yu, yuxan chi cu mulnawej; chi kakꞌon tzalabꞌoj cu cꞌul yu cu kꞌinal chi yakꞌ Dios.

16 Jaꞌ yet jix wakꞌon wip jin cuyoni cꞌal wotajnen el tzet syaꞌilal ey bꞌey yul yibꞌankꞌinal tiꞌ, cꞌualil cꞌal akꞌbꞌalil jix jin cuyoni, ey bꞌey cꞌam chi oc jin weyan jin naꞌoni. 17 Jaꞌ jix yun snaꞌcha el wu an, tol masanil tzet chi yun Dios, cꞌal tzetyetal chi ecꞌtoj bꞌey yul yibꞌankꞌinal tiꞌ cꞌam chi skeꞌ snaꞌcha el ku. Caxcꞌal mi tol chi kakꞌ kip kotajne eloj, cꞌam cꞌaltaꞌ chi naꞌcha el ku. Caxcꞌal tol jaꞌ junoj ey snaꞌbꞌal chi aloni tol yotaj, cꞌam cꞌaltaꞌ tzet chi skeꞌ yotajnen eloj.