3 Jaꞌ xol masanil tzet chi yun cu xol bꞌey yul yibꞌankꞌinal tiꞌ, ey tzet man smoo oj, yutol laan cꞌal chi yun slawi ey masanil ebꞌ ánima. Yetoj cꞌal pax oj, asan yin spenail eyoc snaꞌbꞌal masanil ánima, yajbꞌan iquis ecꞌ ebꞌ, yutol yin pax eyman chi jul cu camichal, catuꞌ chi cu lawi eyoj.

4 Yu jun tuꞌ xin, jaꞌ ebꞌ ánima cꞌamto chi cami, chito skeꞌ snaꞌon sbꞌa scꞌul ebꞌ. Watxꞌ to wal yet junoj noꞌ txꞌiꞌ iquisto, yintaj junoj noꞌ bꞌalam tol camnajxa. 5 Yetoj cꞌal pax oj, jaꞌ ebꞌ iquis, yotaj ebꞌ tol oj cam ebꞌ, jal pax ebꞌ camnajxa xin, cꞌamxa tzetyetal yotaj ebꞌ, tam wal eyto yalon yet ebꞌ yin junoj tzetyetal, yutol chi too can ebꞌ qꞌueycꞌulal yu ebꞌ ánima. 6 Jaꞌ bꞌey smujbꞌanil ebꞌ camom tuꞌ, jaꞌ tituꞌ chi lawi can masanil scamcꞌulal ebꞌ, cꞌal ẍichoncꞌulal ebꞌ, cꞌal masanil spenail jix yun ebꞌ, cꞌamxa yalon yet ebꞌ yin masanil tzetyetal chi ecꞌtoj bꞌey yul yibꞌankꞌinal tiꞌ.

7 Jex wet animail, kakꞌwej tzalabꞌoj cu cꞌul cu lowi, cꞌal kuqꞌuen jaꞌ, yutol jaꞌ tinaniꞌ chi ẍaꞌ scꞌul Dios tzet chi kunne. 8 Cu pich cu bꞌa yetoj an sajin pichile. Chi kaon oc perfume yaniloj xil cu jolom. 9 Naꞌbꞌacꞌal masanil wan cꞌual chi yakꞌ Dios ey jon, yu jun tuꞌ xin, asan tol chi kakꞌ tzalabꞌoj cu cꞌul yetoj ix kistil tol camcꞌulnebꞌil ku, yutol asan jun tuꞌ chi akꞌle ey jon yu Dios, yu spajtzebꞌaloj yu chi ketne cu cꞌul yin cu mulnail bꞌey yul yibꞌankꞌinal tiꞌ. 10 Jaꞌ masanil tzetyetal chi skeꞌ cu waꞌneni, cu waꞌnewej cꞌal yin masanil cu cꞌul, yutol jaꞌ yet oj cu camtoj yet oj cu tojcan bꞌey camposanto, jaꞌ tituꞌ cꞌamxa tzet oj skeꞌ kuneni, tam wal cu naꞌoni, cꞌamxa cꞌal yeloc apnoj jelanilal tituꞌ.

11 Ey jun tzetyetal jix wil bꞌey yul yibꞌankꞌinal tiꞌ: Man masaniloj ebꞌ jelan sbꞌeyi tol bꞌabꞌel chi apni oc bꞌey tꞌinan yapni ocoj; man masaniloj ebꞌ jelan yakꞌon jowal chi eyqꞌuey jowal yu ebꞌ; man masaniloj ebꞌ ey snaꞌbꞌal, watxꞌ chi ecꞌ tiempo yu, man masaniloj ebꞌ jelan snaꞌbꞌal chi oc bꞌeomal, man pax masaniloj ebꞌ cuywinaj, chi oc yin junoj mimej opiso. Junjun cꞌal yetoj tzet chi chaꞌlo yu. 12 Yetoj cꞌal pax oj, cꞌam mac yotaj bꞌakꞌin oj aapnoj yorail cu cami. Jaxca chi yun yoc noꞌ pescado yul junoj txim yaal, cꞌal noꞌ tzꞌiquin chi can yul yaal, queytuꞌ yeoc ebꞌ ánima, cꞌam tzet naꞌan yu ebꞌ, catuꞌ chi jul junoj syaꞌtajilal yibꞌan ebꞌ yin jun txolan.

13 Yetoj cꞌal pax oj, ey wan tzetyetal jix wil bꞌey yul yibꞌankꞌinal tiꞌ, tol chi xꞌoxtej junoj miman cuybꞌanile: 14 Ey jun yaliẍ conobꞌ jix wilaꞌ, tol txenne ánima caan bꞌey, jaꞌ junoj rey tol ey mimanoj sbꞌisil soldado jix oc joyan yinlaj yu yakꞌon jowal yin. 15 Jaꞌ ebꞌ ánima caan yul jun yaliẍ conobꞌ tuꞌ, jaꞌ tituꞌ caan jun mebꞌa winaj, asan xin tol caw ey snaꞌbꞌal. Jaꞌ yetoj sjelanil tuꞌ chi skeꞌ scolon el jun conobꞌ tuꞌ, jaxa jix yunne cꞌamxa junoj mac jix naꞌontej.

16 Caxcꞌal mi yu sjelan naꞌbꞌal junoj winaj tol mebꞌa, cꞌam yeloc apnoj yul sat ánima, yuxan cꞌam chi chaꞌle abꞌle tzet chi yalaꞌ, asan xin, jain tiꞌ chi walaꞌ, tol yel xacꞌal ey yeloc apnoj junoj ey snaꞌbꞌal, yintaj junoj tol chi smeyne sbꞌa.