10
Jaꞌ yu junoj noꞌ camnaj us chi etex el sabꞌ perfume tol txꞌojxa swatxꞌil yoc sabꞌ.Queyton tuꞌ chi yun junoj mactxequel caw bꞌinabꞌil yu sjelanil, ta chi yun junoj tzetyetal man watxꞌoj, chi etex el smimanbꞌilal jun mactxequel tuꞌ yu sbꞌeybꞌal.
2 Jaꞌ yochwan junoj ánima jelan snaꞌbꞌal, chi yaoc sbꞌa yin tzetyetal watxꞌ, jal pax yochwan junoj mac cꞌam snaꞌbꞌal xin, asan yin spenail chi yaoc sbꞌa.
3 Jaꞌ junoj cꞌam snaꞌbꞌal, jaꞌ yin masanil tzetyetal chi swaꞌne, chi xꞌoxel sbꞌa tol cꞌam ton snaꞌbꞌal.
4 Ta ey junoj yaaw chi tit sjowal ja win, cꞌam ojabꞌ cha kꞌanel ja bꞌa yin ja wopiso bꞌey ey jaach ocoj. Ta chi kiꞌey cu bꞌa, ey swaꞌxubꞌal oc yin, caxcꞌal miman yeoc bꞌey chi cu eyqꞌuey yin junoj tzetyetal.
5 Ey ton tzet man smoo oj chi yun bꞌey yul yibꞌankꞌinal tiꞌ, jaꞌton tzet chi el yunen ebꞌ yaaw. 6 Yutol jaꞌ junoj cꞌam snaꞌbꞌal, jatuꞌ chi akꞌle junoj opiso miman yeloc apnoj tet; jal pax tet junoj ánima caw ey yeloc apnoj, jaꞌ junoj comon opiso chi akꞌle tet. 7 Jix wilaꞌ tol jaꞌ ebꞌ eyoc yin yakꞌomaloj servilal, yibꞌan che xacꞌal chi ecꞌ ebꞌ, jal ebꞌ mimej winaj xin, tol chi bꞌey ebꞌ jaxca xacꞌal tol yakꞌomal servil yeoc ebꞌ.
8 Jaꞌ mactxequel chi waꞌnen junoj jolan, jacꞌal oc bꞌey jun jolan tuꞌ chi eyqꞌuey jun mactxequel tuꞌ. Jaꞌ mac chi makꞌon poꞌo junoj smuroal yich xeꞌ na, jaꞌ noꞌ labꞌa chi chiꞌoni.
9 Jaꞌ mactxequel chi joswi chꞌen, jacꞌal oc yin chꞌen chꞌen tuꞌ chi yasitoj. Jaꞌ mactxequel chi poꞌowi siꞌ, ey smey chi stzokꞌtoj sbꞌa.
10 Ta chi el yee chꞌen eche, ta cꞌamxa chi nijle yee chꞌen, sowalil mi tol ip xacꞌal chi yun stzokꞌle oc chꞌen. Yel xacꞌal mi watxꞌ ta tol chi cam snaꞌlei, catuꞌ chi waꞌnele junoj tzetyetal.
11 ¿Tzet to yopiso junoj chi skeꞌ sucbꞌanen noꞌ labꞌa, ta xax chiꞌle yu noꞌ?
12 Ta tol chi cu kꞌanabꞌ yin jelanil, watxꞌ kꞌane chi al-le kin. Ta tol comon cꞌal chi kute kꞌanabꞌ cu bꞌa xin, junne cꞌal chi cu loctej kibꞌan.
13 Jaꞌ yet chi ẍaꞌon el yich skꞌanabꞌ junoj mactxequel cꞌam snaꞌbꞌal, comon kꞌane cꞌal chi yalaꞌ, jaꞌ yet chi lawi skꞌanabꞌ xin, laan cꞌal yetoj yin cꞌam tzet chi yalaꞌ.
14 Jaꞌ ebꞌ cꞌam snaꞌbꞌal, miman cꞌal tzet chi yal ebꞌ.
¿Mactxequel chi skeꞌ yalon tzet ey jon yet yecal, ma bꞌakꞌin chi jul scꞌual cu cami? Ilaꞌ tol cꞌam mac yotaj tzet chi jul cu sattaj.
15 Jaꞌ junoj cꞌam snaꞌbꞌal chi smakꞌ cꞌuumbꞌoj sbꞌa yin mulnail, chi pax xacꞌal yip, ian cꞌamxa chi skeꞌ meltzotej yul sconobꞌ.
16 Okꞌbꞌal cꞌul junoj nación tol jaꞌ junoj unin chi yaoc sreyaloj; jal pax ebꞌ icham winaj yeoc yul conobꞌ, ja bꞌey kꞌin chi kꞌinibꞌi a ebꞌ.
17 Caw watxꞌ yet junoj nación, ta tol watxꞌ snaꞌbꞌal junoj eyoc yin yaawil, jaꞌ ebꞌ icham winaj yeoc yul conobꞌ tuꞌ, chi low ebꞌ yin yorail, yet chi oc yip ebꞌ, catuꞌ man asanne oj yin uqꞌue an chi toocan ebꞌ.
18 Jaꞌ ebꞌ isa chi swaꞌne oc yibꞌan sna, chi stzꞌui sna ebꞌ tuꞌ, niẍtejal chi ey wejna sna ebꞌ tuꞌ yibꞌan.
19 Ta ey loꞌbꞌe watxꞌ scawxi, watxꞌ toni, ta ey tzet chi kuqꞌueꞌ tzalacꞌulal cꞌal pax oj, ta cꞌam pax tumin, cꞌam tzalacꞌulal, yu jun tuꞌ, yuxan chi ochele chꞌen tumin.
20 Cꞌam ojabꞌ cha wal skꞌumal naj rey, yetoj cꞌal ebꞌ eyoc yin yaawil yul conobꞌ, man ojabꞌ tucꞌal oj chi ecꞌ yul ja cꞌul ja naꞌoni. Cꞌam ojabꞌ cha wal pena kꞌane yin ebꞌ bꞌeom, caxcꞌal ja txꞌojli ey jaach ecꞌ yul ja na, yutol eyman chi abꞌcha ocoj, jaꞌ cu kꞌane chi kalaꞌ, laan chi yun stoo jenenoj jaxca noꞌ tzꞌiquin.