11
Jaꞌ tinaniꞌ, bꞌejan ojabꞌ kakꞌon junoj tzetyetal tet ebꞌ mebꞌa.Jaxa yet jayebꞌ cꞌu, catuꞌ oj cu chaꞌon spaj.
2 Chi yal yeloc apnoj tol jaꞌ tzetyetal ey, ey jaach, poꞌoecꞌ xol ebꞌ cꞌam sloꞌbꞌe, jatacꞌalaꞌ jantaj chi skeꞌ ja colwa tet ebꞌ, yutol man kotajoj tzet oj tit yibꞌan cu conobꞌ tiꞌ.
3 Ta tol kꞌej yili asun, oj tit nabꞌ chi yal tuꞌ.
Ta chi telcꞌo junoj teꞌ teꞌ bꞌey yetcꞌulal norte, ma bꞌey sur, jaꞌ tituꞌ chi can xacꞌal can teꞌ.
4 Ta tol oj ja wechbꞌane cꞌal swaꞌxi oc yul yibꞌankꞌinal tiꞌ, ma yet watxꞌ yecꞌ kaꞌeꞌ ma tucꞌal oj jaach atoj tꞌanan yin asun, ta jaxca tuꞌ oj ja wunne, cꞌam bꞌakꞌin oj jaach awwoj jinat, tam wal ey bꞌakꞌin oj ja yambꞌa oc sat awo tuꞌ.
5 Man ja wotaj oj bꞌeytuꞌ chi kakꞌ stooc kaꞌeꞌ, tam wal ja wotaj tzet chi yun ẍꞌibꞌoc junoj unin yin xutx, yuxan man ja wotaj oj tzetyetal chi yun Dios, jaꞌton Naj chi akꞌon pitzcꞌu a masanil tzettaj yetal.
6 Aw ja bꞌabꞌel awo, catuꞌ cha wawon cꞌal pax ja tzunan awo, yutol man ja wotaj oj bꞌeytet yel watxꞌ oj yunne, ta jaꞌ bꞌabꞌel awo tuꞌ, ma jaꞌ tzunan awo watxꞌ oj yunne, ma tol watxꞌ cꞌal oj yun pax scaabꞌ tujanil xin.
7 Caw watxꞌ yili sajkꞌinal, watxꞌ cꞌal pax yili yajan cꞌu. 8 Caxcꞌal mi ecꞌal abꞌil chi kilaꞌ, sowalil chi kakꞌ kip kakꞌon tzalabꞌoj cu cꞌul. Chi cam cu naꞌoni, tol ecꞌal abꞌil cꞌal pax oj cu cancan bꞌey camposanto; cꞌamxa cꞌal tzet oj kiꞌ tituꞌ, naꞌbꞌa xacꞌal toni.
Naꞌbꞌale Chi Akꞌle Tet Ebꞌ Achꞌe
9 Jex achꞌe cꞌal jex kꞌopo, akꞌwej tzalabꞌoj je cꞌul yajbꞌan eyto je yip. Akꞌwej tzalabꞌoj je cꞌul yin tzetyetal tol watxꞌ yajbꞌan chi skeꞌ je yu, bꞌejan ojabꞌ je cꞌul je yunen tzet che waꞌne, ma tzet che yilaꞌ, asan xin, chi cam wal je naꞌoni tol jaꞌ Dios oj naꞌon oc yin masanil tzet che yun tuꞌ. 10 Bꞌejwej can masanil bꞌiscꞌulal cꞌal jantaj spenail che naoꞌtane, cꞌam ojabꞌ chex oc yin bꞌiscꞌulal yu junoj syaꞌilal chi jul yin je mimanil, yutol jaꞌ unin animail eyman chi ecꞌ eloj.