12
Jex achꞌe ánima jexto, naꞌwejtej Dios, jaꞌton Naj jix jex waꞌneni, yajbꞌan cꞌamto che yabꞌ syaꞌil yin icham animail. Yutol oj jul scꞌual yet oj je yalon jaxca tiꞌ: Caw cꞌamxa cꞌal cu tzalacꞌulal, naꞌbꞌa xacꞌal iquis jon ecꞌoj, je chi xacꞌal mi. 2 Yuxan naꞌwejtej Dios tinaniꞌ, yajbꞌan tol watxꞌ to je yilon yajan cꞌu, yajan xꞌaaw cꞌal weycan, yet cꞌam tocꞌal chi jul txololoj syaꞌilal yin je mimanil. 3 Yutol ey jun cꞌual, tuxa cꞌal oj lujlon je kꞌabꞌ chex colon tinaniꞌ, cꞌal je yajan caw ey yip tinaniꞌ, oj pax yip. Cꞌamxa cꞌal pax je yee oj je yakꞌ kachꞌon je loꞌbꞌe, manxa oj skeꞌ je yilwan eltoj yul swentanail je na. 4 Jaꞌ yet oj aapnoj wan scꞌual tuꞌ, manxa oj je yabꞌ tzet oj al-le yul-laj calle, tam wal oj je yabꞌ sbꞌilwi chꞌen kaꞌ. Iquis jex xa yet chi okꞌa noꞌ tzꞌiquin, manxa oj je yabꞌ yoc bꞌit je sattaj. 5 Ey xacꞌal je xiwcꞌulal tet junoj tzetyetal naat eyaoj, ey xacꞌal smey che yabꞌ yet oj jex ecꞌ yul-laj bꞌe.Jaxa sajbꞌi el xil je jolom, cꞌuancꞌulal xacꞌal je yecꞌ matxlabꞌoj, cꞌamxa cꞌal pax tzet oj je naꞌ yin je yistil, yutol lalanxa je too can bꞌey jun je calubꞌal bꞌey camposanto yin junelne; jaxa bꞌey yul-laj calle, joyan xacꞌal oc ebꞌ ánima yokꞌ yu je camichal.
6 Naꞌwejtej jun Dios jix jex waꞌneni, yutol ey jun cꞌual oj lawoj cu kꞌinal, jaxca junoj tzejtebꞌal chi poꞌotoj yet chi nicꞌchatoj scadenail tol chꞌen plata cꞌal eloj bꞌey tꞌunan can ocoj. Ma jaxca chi yun spoꞌotoj txꞌotxꞌ mooque bꞌey stiꞌ jaꞌ jaꞌ, ma jaxca chi yun snicꞌchatoj chꞌen stokꞌbꞌanil atej jaꞌ jaꞌ yul kꞌobꞌ. 7 Jaꞌ yet oj lawoj ey cu mimanil tiꞌ, oj meltzo pax can oc yin pojojal junelxa sat txꞌotxꞌ txꞌotxꞌ, jaxca cꞌaltaꞌ yeoc yet yalantoj, jal je pixan xin, oj tojcan bꞌey Dios, yutol jaꞌ Naj jix akꞌon ey jon.
8 Jain chin kꞌanabꞌ tiꞌ, chin caekꞌne walon jaxca tiꞌ: ¡Naꞌbꞌacꞌal ton masanil, catuꞌ cꞌam yeloc apnoj!
Jaꞌ Wan Slawubꞌ Kꞌane Albꞌilcanoj
9 Jaꞌ yu jin jelanil, caw miman tzet jix wakꞌ yotajne el ebꞌ wet animail. Yetoj cꞌal pax oj, manxa wal jantajoj kꞌane jix waoc yin jin cꞌul jin cuyon yin xolilal. 10 Caw jix jin sey kꞌane tol watxꞌ xacꞌal ẍaꞌlen sbꞌa, yet chin tzꞌibꞌe wan kꞌane tol yel, tol smoo chi tzꞌibꞌelecanoj.
11 Jaꞌ kꞌane chi yal ebꞌ jelan, laan jaxca junoj chꞌen tejbꞌal, chi tejle oc yin junoj noꞌ noꞌ. Jaꞌ yet jix ẍaꞌlen sbꞌa wan kꞌane tuꞌ yin xolilal, laan wal jaxca teꞌ estaca tol caw chi yun smakꞌle eytoj yul txꞌotxꞌ. Jaꞌ wan kꞌane tiꞌ, jaꞌ Dios kilomal jix akꞌon ey jon. 12 Jex unin ánima, chi cam je yiloni, tol man comonoj che chaꞌ je yabꞌ wanojxa comon kꞌane, yutol jaꞌ tzꞌibꞌe juun tiꞌ cꞌam slawubꞌal; yetoj cꞌal pax oj, ta miman tzet chi cu cuyuꞌ, chi cꞌuumbꞌi a cu mimanil tiꞌ yu.
13 Queytuꞌ chi yun slawi can jun kꞌane tiꞌ. Tuxa jix al-le el masanil. Ey ojabꞌ yeloc apnoj Dios yul cu sat, cu jijewej ẍejbꞌanil, yutol jaꞌ jun tiꞌ sowalil chi kunwej. 14 Yutol jaꞌ Dios oj skꞌanle yabꞌ masanil tzettaj yetal chi kunne, ta watxꞌ ma pena, caxcꞌal mi yin ewantajil jix kunen junoj tzetyetal.