Chi yal naj achꞌe:
7
¡Jaach kꞌopo, manxa jantajoj swatxꞌil yili ja wajan yul ja xanabꞌ,jaach scutzꞌin rey! Jaꞌ ja xubꞌ, caw watxꞌ yili jaxca chꞌen oro watxꞌ yeoc yelawiloj junoj tzetyetal yu junoj tol jelan swaꞌneni.
2 Jaꞌ ja cꞌul, laan wal jaxca junoj mooque tol nonaj yetoj yal uva; jaꞌ ja nan, laan yili jaxca junoj bꞌulan ixim tiriw tol joyan xacꞌal oc an xumac teꞌ yinlaj.
3 Jaꞌ scaabꞌil ja wim, laan wal yili jaxca cacꞌonoj noꞌ scꞌultajil che, tol tioẍ chi yun yali.
4 Jaꞌ ja nukꞌ, laan jaxca junoj torre waꞌnebꞌil a yetoj chꞌen marfil; jaꞌ sbꞌakꞌ ja sat, laan jaxca caabꞌ tujan jaꞌ naabꞌ jaꞌ bꞌey conobꞌ Hesbón, junne ey bꞌey spuertail yet Bat-rabim; jal ja txaam xin, laan wal yili yetoj torre bꞌey Líbano, jaꞌton jun jacantoj bꞌey conobꞌ Damasco.
5 Jaꞌ ja jolom, laan yili jaxca sjolom wonan Carmelo; caw wal chi kopopi yili xil ja jolom jaxca an púrpura. Caw ochbꞌetaj yeytej mekꞌan xil ja jolom chi yil naj rey.
6 Jaach kꞌopo tol camcꞌulnebꞌil wu, caw ochbꞌetaj ja wili, yutol yel xacꞌal watxꞌ ja wili.
7 Caw wal jichan ja wili jaxca chi yun ẍꞌibꞌ junoj teꞌ palma; jaꞌ scaabꞌil ja wim, laan wal jaxca junjun chaan sat teꞌ palma.
8 Chi woche chin atoj yin teꞌ palma tuꞌ, yet chi wiꞌon eytej sat teꞌ tuꞌ. Jaꞌ ja wim, laan wal jaxca junoj chaan sat teꞌ uva; jaꞌ xobꞌ ja tiꞌ, sukꞌukꞌi xacꞌal yoc sabꞌ jaxca teꞌ mansan.
9 Jaꞌ yul ja tiꞌ, laan wal ẍiꞌal jaxca an yal uva manxa jantajoj ẍiꞌal chi wabꞌe, ẍi naj.
Chi yalon ix kꞌopo:
Jaach achꞌe, ucꞌ teꞌ yal uva tiꞌ, yet watxꞌ chi apni oc ẍiꞌal teꞌ yichlaj ja wee.
10 Jain tiꞌ yet jin naj achꞌe tuꞌ, yutol ochebꞌil jin yu naj.
11 Jaach achꞌe, toon xol-laj teꞌ, yet chi ecꞌ junoj akꞌbꞌal ku bꞌey xol-laj xumac teꞌ alheña.
12 Jaxa yet chi kꞌinibꞌi eloj, chi cu too xol-laj an uva, yu kiloni, ta eyxa swol an, ta lalanxa spoꞌoel xumac an. Oj kilaꞌ, ta lalanxa xumacli teꞌ granada; jaꞌ tituꞌ oj jin txꞌox jin camcꞌulal ey jaach.
13 Caw wal lalanxa sbꞌey yecꞌ sabꞌ an mandrágora. Jaꞌ bꞌey stiꞌ cu na, eyxa sat masanil awo watxꞌ sloꞌi, ey sat awo tol tajin xa, catuꞌ ey teꞌ tol to chi yambꞌale eytej. Jaach achꞌe tol camcꞌulnebꞌil wu, ey teꞌ ja wet jix wiꞌ can eloj, ẍi ix.