6
¿Jaach kꞌopo ix tol watxꞌ xacꞌal ja wili xol ebꞌ ix ix?¿Bꞌeytuꞌ jix too oc naj achꞌe tol camcꞌulnebꞌil ja wu tuꞌ? ¡Oj toj cu sey naj ja wetoj ẍi ebꞌ ey jin!
Chi yalon ix kꞌopo:
2 Jaꞌ naj achꞌe tol camcꞌulnebꞌil wu tuꞌ, tol jix too naj xol yawo, bꞌey awbꞌil ey teꞌ tol sukꞌukꞌi xacꞌal yoc sabꞌ; jix too naj steyne low smeꞌ, cꞌal syambꞌantej teꞌ xumac teꞌ naj.
3 Jain tiꞌ, yet jin naj achꞌe tuꞌ, catuꞌ wet cꞌal pax naj. Chi yakꞌ tzalabꞌoj scꞌul naj steynen slow smeꞌ bꞌey xol an xumac teꞌ tuꞌ, ẍi ix.
Yet Sjoꞌ Tujan Bꞌit
Chi yalon naj achꞌe:
4 Jaach kꞌopo tol camcꞌulnebꞌil wu, manxa jantajoj swatxꞌil ja wili, ochbꞌetaj xacꞌal ja wili jaxca yili conobꞌ Tirsá, cꞌal conobꞌ Jerusalén tol eyxa smey yili, jaxca junoj bꞌulan ebꞌ soldado chi bꞌey yul bꞌe yin xolilal yetoj sbandera chi bꞌilwi yu kaꞌeꞌ.
5 Cꞌam ojabꞌxa chi mutzꞌmon oc ja sat win, yutol tuxa jix jin moncha a ja wu. Jaꞌ xil ja jolom, laan yili jaxca yeytej bꞌululoj noꞌ chiw bꞌey spacꞌanil yet txꞌotxꞌ Galaad.
6 Jaꞌ ja wee, tuxa cꞌal chi latzꞌatzꞌi yili, jaxca wal yili noꞌ meꞌ tol to chi eltej bꞌey chi txꞌale eloj, cacꞌon cꞌal chi yun sbꞌey noꞌ yetoj yuneꞌ, cꞌam junoj noꞌ chi ecꞌ xꞌojli.
7 Jaꞌ spacꞌul ja tiꞌ, laan yili jaxca nanoj tujan teꞌ granada poꞌobꞌil ey snan, catuꞌ majan el yu junoj an kꞌap.
8 Tzala ojabꞌ naj rey yetoj 60 ebꞌ ix yistil tol reina yeocoj, cꞌal yetoj 80 ebꞌ ix scaabꞌ yistil naj, yetoj cꞌal pax ebꞌ ix kꞌopo cꞌamxa chi bꞌischai.
9 Jal jin jain tiꞌ an, asan jun ix wet, jaxca wal yili noꞌ uch tol watxꞌ xacꞌal yili. Asanne ix camcꞌulnebꞌil yu xutx, yuxan cꞌam junojxa ix laan jaxca ix tiꞌ. Jaꞌ yet chi il-le ix yu ebꞌ ix kꞌopo, cꞌal yu ebꞌ ix reina, cꞌal yu ebꞌ ix yet scaabꞌ yistil naj rey, masanil ebꞌ tuꞌ chi aloni yel watxꞌ yili ix, ẍi naj.
Chi yalon ebꞌ ánima:
10 Mactxequel jun ix chi xꞌox sbꞌa tuꞌ, jaxca wal xꞌoxon sbꞌa yajan cꞌu yet skꞌinibꞌalil. Watxꞌ xacꞌal yili jaxca yet caw ey yajan xꞌaaw. Kopopi xacꞌal yili jaxca yili yajan cꞌu, eyxa smey yili jaxca junoj bꞌulan ebꞌ soldado chi bꞌey yin xolilal yetoj sbandera, ẍi ebꞌ.
Chi yalon ix kꞌopo:
11 Jix jin bꞌeytoj xol teꞌ teꞌ bꞌey nogales, yu wilon masanil tzet chi woli yul-laj jobꞌe; jix woche jix wilaꞌ, ta lalan yelol sat an uva, cꞌal wilon yelol xumac teꞌ granada.
12 Jaxa jix yunne, man xacꞌal naꞌanoj wu, jaxca wal tol ey jin xa oc yul carruaje yetoj waawil an, ẍi ix.
Chi yalon ebꞌ ánima:
13 Jaach Sulamita, meltzaan, meltzaan. Meltzaan, yutol chi yoche cu cꞌul chach kilaꞌ, ẍi ebꞌ tuꞌ.
Chi yalon ix kꞌopo:
¿Tzet yu, yuxan che yoche che yil jin canalwi snan xol caabꞌ txol ánima tiꞌ? ẍi ix.