Chi yalon naj achꞌe:
5
Jaach kꞌopo ix tol chach oc wistiloj,tuxa jix jin octoj xol jin awo. Lalan wiꞌon a jin mirra cꞌal jin perfume, lalan wabꞌlen yaal scabꞌil noꞌ ajan, lalan wuqꞌuen jin vino yetoj jin lech, ẍi naj.
Chi yalon ebꞌ ánima:
Jex wamigo, lowanwej, ukꞌwej jaꞌ, ukꞌwej jantaj che yoche, ẍi ebꞌ.
Yet Scan Tujan Bꞌit
Chi yalon ix kꞌopo:
2 Weynaj jin eloj, jal jin naꞌbꞌal xin iquis cꞌal ecꞌoj. Jix wabꞌeni tol jaꞌ naj achꞌe camcꞌulnebꞌil wu chi awi octej naj bꞌey stiꞌ jin na, chi yalon naj jaxca tiꞌ: Jaach kꞌopo ix tol camcꞌulnebꞌil jaach wu; jaj jin octoj yul ja na, yutol caw wal watxꞌ ja wili jaxca noꞌ uch cꞌam niꞌoj bꞌey pena yili. Caw wal chi ey yal xil jin jolom yu yal akꞌbꞌal. Caw chi el tꞌulabꞌoj yal akꞌbꞌal yin xil jin jolom, ẍi naj ey jin.
3 Jix walon tet naj jaxca tiꞌ: Tuxa jix wiꞌel jin pichil, ¡tumi oj waoc an junelxa! Tuxa jix jin txꞌael wajan, ¡tumi man oj bꞌonchatoj wajan junelxa! jin chi tet.
4 Jaꞌ yet jix yaon octej skꞌabꞌ naj achꞌe tuꞌ bꞌey sjolanil smajil jin na; caw wal jix jin a jucna yu naj.
5 Yu jun tuꞌ, yuxan jix jin a waan jin jajon octej naj jin camcꞌulnebꞌil tuꞌ. Tuxa cꞌal jix el tꞌulabꞌoj yal mirra yin jin kꞌabꞌ, jix oc can yinlaj stiꞌlaj puerta tuꞌ. Jaꞌ yet jix wabꞌen skꞌanabꞌi, ian xacꞌal tol jix jin cam chi wabꞌe.
6 Jaꞌ yet jix jin jajon smajil jin na tuꞌ tet naj, cꞌamxa naj eyecꞌoj. Jix jin seyecꞌ naj, ma xa ilcha oc naj wu; jix wawte naj, ma xa takꞌwoj naj ey jin.
7 Jix chaꞌlo el ebꞌ naj chi teynen conobꞌ wu; jix jin smakꞌon yasoj ebꞌ naj. Caw pena xacꞌal jix yun yiꞌon el an jin xotil ebꞌ naj chi teynen spuertail conobꞌ tuꞌ.
8 Jex kꞌopo a Jerusalén, chin kꞌan ey jex an; ta chi ilcha oc naj jin camcꞌulnebꞌil tuꞌ je yu, Alwej tet naj, tol cꞌamxa chi techa jin camcꞌulal yin naj, jin chi tet ebꞌ.
9 ¿Jaach kꞌopo ix tol watxꞌ xacꞌal ja wili yintaj ebꞌ ix ix watxꞌ yili, tzet wal swatxꞌil naj achꞌe tuꞌ? ¿Tumi yel xacꞌal watxꞌ naj, yuxan cha kꞌan ey jon tol chi kakꞌ cu tiꞌ? ẍi ebꞌ ey jin an.
10 Jaꞌ naj achꞌe chin camcꞌulne tuꞌ, saj yili naj, caj wainaj yili naj; caw wal watxꞌ yili naj yintaj junoj 10,000 winaj.
11 Laan yili sat naj jaxca chꞌen oro caw wal watxꞌ; kꞌolotxtaj yili xil sjolom naj, caw kꞌejin yili xil sjolom naj jaxca noꞌ joo.
12 Jaꞌ sbꞌakꞌ sat naj, laan yili jaxca noꞌ uch chi ecꞌabꞌ stiꞌlaj jaꞌ, jaxca xacꞌal tol xol lech chi aẍni noꞌ, chi lawi tuꞌ chi ey pajan noꞌ stiꞌlaj jaꞌ paam jaꞌ.
13 Jaꞌ spacꞌul-laj sat naj, laan yili jaxca junoj awo bꞌey awbꞌil an cꞌultaj manxa jantajoj swatxꞌil yoc sabꞌ. Jaꞌ xaj stiꞌ naj, laan jaxca junoj an xumac teꞌ manxa jantajoj swatxꞌil yoc sabꞌ.
14 Jaꞌ skꞌabꞌ naj, laan jaxca junoj xoyan chꞌen oro eyoc chꞌen topacio yin; jaꞌ smimanil naj, laan wal jaxca chꞌen marfil neleli xacꞌal yili, tol eyoc chꞌen zafiro yelawiloj.
15 Jaꞌ yajan naj, laan yili jaxca caabꞌoj oy waꞌnebꞌil yin chꞌen mármol, linan ey chꞌen yibꞌan sbꞌatxlubꞌal tol oro cꞌal eloj. Laan yili naj jaxca teꞌ kꞌuteꞌ ey bꞌey Líbano, tol sicꞌbꞌil eloj.
16 Jaꞌ skꞌane naj chi yalaꞌ, manxa jantajoj ẍiꞌal chi wabꞌe, caw ochbꞌetaj yili naj masanil. Queyton wal tuꞌ yili naj achꞌe tuꞌ jex kꞌopo a Jerusalén, jin chi tet ebꞌ ix.