Chi yalon naj achꞌe:
4
¡Jaach jin camcꞌulnebꞌil, caw watxꞌ xacꞌal ja wili!¡Yel xacꞌal sakꞌal ja wili! Laan yili sbꞌakꞌ ja sat jaxca yet noꞌ uch, majan el ja sat yetoj an kꞌap. Jaꞌ xil ja jolom, laan yili jaxca chi yun yeytej bꞌululoj noꞌ chiw bꞌey spacꞌanil txꞌotxꞌ Galaad.
2 Jaꞌ chꞌen ja wee, sakꞌal yili chꞌen, laan xacꞌal yili chꞌen jaxca yili noꞌ meꞌ chi txꞌale el yet tol to chi tzujle eloj, ey cꞌal yucꞌlem noꞌ jaꞌjun yetoj, jaxca junoj noꞌ txutxe meꞌ chi bꞌey yetoj yuneꞌ.
3 Cajtzꞌobꞌinaj xacꞌal xaj ja tiꞌ jaxca an cajin txꞌal, txꞌojxa swatxꞌil ja kꞌanabꞌi. Jaꞌ spacꞌul-laj ja sat majan el yu an kꞌap, jaxca xacꞌal yili yul kꞌaxebꞌoj teꞌ granada.
4 Jaꞌ ja nukꞌ, laan wal jaxca torre waꞌnebꞌil a yu naj rey David, eyoc 1,000 chꞌen majbꞌal sat julbꞌal yet ebꞌ soldado jelan yakꞌon jowal yin yelawiloj.
5 Jaꞌ scaabꞌil ja wim, laan yili jaxca cacꞌonoj yuneꞌ noꞌ scꞌultajil che tol tioẍ, chi low noꞌ bꞌey xol-laj an cꞌultaj yaax yili xaj.
6 Yajbꞌan cꞌamto chi sajbꞌi el yet skꞌinibꞌalil, oj jin toj bꞌey sjolomlaj wonan bꞌey ey teꞌ mirra, cꞌal bꞌey txꞌotxꞌ tzalquiltaj bꞌey chi chꞌibꞌ teꞌ incienso.
7 Caw watxꞌ ja wili jaach jin camcꞌulnebꞌil; caw watxꞌ yili masanil ja mimanil, cꞌam cꞌal bꞌey pena yili niꞌoj.
8 Jaach kꞌopo tol jaach oj jaach oc wistiloj, titan jin cꞌatan bꞌey Líbano tiꞌ; titan wetoj bꞌey sjolom wonan Líbano. Oj kileytoj jobꞌe masantaꞌcꞌal bꞌey sjolom wonan Amaná tiꞌ, bꞌey sjolom wonan Senir, yetoj cꞌal bꞌey sjolom wonan Hermón, bꞌey ey snachꞌen noꞌ bꞌalam, cꞌal noꞌ leopardo.
9 Jaach jin camcꞌulnebꞌil wu, oj jaach oc xacꞌal wistiloj, tuxa wal jix can xacꞌal jin naꞌbꞌal ja win, jaꞌ yet jix wilon oc yin jun xꞌanil chꞌen ue locan oc yin ja nukꞌ. Junel chꞌan jix jaach oc tꞌanan win. Queytuꞌ jix yun waon oc jin naꞌbꞌal ja win.
10 Manxa jantajoj swatxꞌil ja camcꞌulal, yuxan jaach oj jaach oc wistiloj. Jaꞌ ja camcꞌulal tuꞌ, yel xacꞌal watxꞌ yintaj ẍiꞌal yal uva, yel xacꞌal watxꞌ yecꞌ sabꞌ perfume cha kꞌanaꞌ, yintaj masanil tujan teꞌ teꞌ sukꞌukꞌi yoc sabꞌ.
11 Jaach oj jaach oc wistiloj, jaxca wal yal awcabꞌ eyoc yinlaj xaj ja tiꞌ, jaxca wal yal awcabꞌ, cꞌal noꞌ lech ey yul ja tiꞌ. Jaꞌ ja pichil eyocoj laan wal jaxca yoc sabꞌ teꞌ kꞌuteꞌ ey bꞌey Líbano.
12 Jaach jin camcꞌulnebꞌil, laan jaach jaxca junoj awbꞌeal teꞌ tol majan eyoj, jaxca junoj jaꞌ snukꞌ jaꞌ tol majan eyoj, caw majchebꞌil ey sicꞌlebꞌil.
13 Laan jaach jaxca junoj awbꞌeal teꞌ bꞌey ey swol teꞌ granada, jaxca junoj sat awo tol manxa jantajoj ẍiꞌal, jaxca cꞌal pax xumac an alheña,
14 jaxca an nardo, cꞌal an azafrán, yetoj wan teꞌ teꞌ sukꞌukꞌi yoc sabꞌ, yetoj cꞌal canela, yetoj masanil tujan teꞌ incienso, yetoj teꞌ mirra cꞌal yetoj teꞌ áloe, yetoj masanil teꞌ cꞌultaj tol sukꞌukꞌi yoc sabꞌ.
15 Laan jaach jaxca jaꞌ snukꞌ jaꞌ chi aol xol awo, jaꞌ chi aol snukꞌ chi eytej bꞌey Líbano, ẍi naj.
Chi yalon ix kꞌopo:
16 Jaꞌ kaꞌeꞌ bꞌey yetcꞌulal norte, cꞌal kaꞌeꞌ bꞌey yetcꞌulal sur, tit ojabꞌ xol bꞌey ey jin awbꞌeal teꞌ tiꞌ, yet watxꞌ chi bꞌeytoj sukꞌukꞌi yoc sabꞌ teꞌ. Jaach achꞌe camcꞌulnebꞌil wu, titan bꞌey ey teꞌ awbꞌeal teꞌ tiꞌ, yet chi jul ja loꞌon sat teꞌ tol manxa jantajoj ẍiꞌal, ẍi ix.