Chi yalon ix kꞌopo:
3
Jaꞌ bꞌey sat jin txꞌat yet akꞌbꞌalil,jix jin weyichne jin seyon ecꞌ naj camcꞌulnebꞌil wu an. Jix jin seyon ecꞌoj, ma cꞌal ilcha oc naj wu.
2 Jix lawi tuꞌ xin, jix jin naꞌ yul wet tol oj jin a waanoj, jix jin ecꞌ jin seyon ecꞌ yul conobꞌ tuꞌ. Jix jin seyon ecꞌ jun jin camcꞌulnebꞌil tuꞌ bꞌey yul-laj scalleal conobꞌ, cꞌal bꞌey yul-laj txombꞌal. Jix jin sey cꞌal ecꞌoj, ma cꞌaltaꞌ ilcha oc wu.
3 Jix jin kꞌanlen tet ebꞌ yaaw chi teynen conobꞌ tuꞌ: ¿Ma mi je yil naj jin camcꞌulnebꞌil wu? jin chi tet ebꞌ.
4 Txenne to wal chin too scꞌatan ebꞌ naj tuꞌ, catuꞌ jix ilcha oc naj jin camcꞌulnebꞌil tuꞌ wu. Jix jin oc xacꞌal nicꞌan yin skꞌabꞌ, cꞌamxa chin jajeloj, jix wiꞌontoj bꞌey sna ix jin txutx, bꞌey jix jin ali, ẍi ix.
Chi yalon naj achꞌe:
5 Jex kꞌopo a Jerusalén, chi wakꞌ bꞌina noꞌ xutx scꞌultajil che bꞌey xol-laj teꞌ xol jin kꞌane chi wal ey jex, tol cꞌam ojabꞌ che tenel sweyan ix jin camcꞌulnebꞌil tiꞌ, masantaꞌcꞌal jaꞌ ix oj yochen janicꞌ oj el sweyan, ẍi naj.
Yet Yox Tujan Bꞌit
Chi yalon ebꞌ ánima:
6 ¿Tzetyetal jun chi tit bꞌey cusiltaj txꞌotxꞌ tuꞌ, tol chi tit xol jun topan mucꞌ, jaꞌton xol smucꞌal teꞌ mirra cꞌal incienso, yetoj cꞌal sukꞌukꞌial sabꞌ masanil tujan perfume chi xon ebꞌ txonwom?
7 Jaꞌton sbꞌatxomal ecꞌ naj Salomón. Bꞌey joyan oc ebꞌ 60 soldado yin, jaꞌton wan ebꞌ soldado yel xacꞌal jelan yin jowal xol ebꞌ Israel.
8 Masanil ebꞌ tuꞌ, jix skꞌanbꞌalne chꞌen espada ebꞌ yin jowal. Junjun cꞌal ebꞌ eyoc yespada ebꞌ yin snan, caxcꞌal ey jowal chi oc yet akꞌbꞌalil.
9 Jaꞌ naj Salomón jix swaꞌne jun teꞌ teꞌ bꞌey chi bꞌatxle ecꞌoj, yetoj teꞌ teꞌ manxa jantajoj swatxꞌil ey bꞌey Líbano.
10 Ey yoyal eeyoj, tol plata cꞌal eloj, jaꞌ skꞌelubꞌ yichin, oro cꞌal eloj; jal bꞌey chi ey chotanoj, jaꞌ an púrpura eyoc yin; waꞌnebꞌil oc yelawiloj yul yu ebꞌ ix ix a Jerusalén, yu xꞌoxon el scamcꞌulal ebꞌ ix tet naj.
11 Jex ix a Sión, elanwejtoj je yil naj rey Salomón, eyoc corona yin sjolom naj, jaꞌton jun jix ale oc yin sjolom naj yu xutx yet jix nupi naj, jaꞌton jun cꞌual yet jix tzala naj sicꞌlebꞌil, ẍi ebꞌ.