Chi yalon ix kꞌopo:
2
Laan jin jaxca junoj an xumac teꞌ bꞌey spananil yet Sarón,jaxca an xumac teꞌ chi chꞌibꞌ sat acꞌal, ẍi ix.
Chi yalon naj achꞌe:
2 Jaꞌ ix jin camcꞌulnebꞌil xol ebꞌ ix ix, laan ix jaxca junoj an xumac teꞌ ey xol teꞌ qꞌuix, ẍi naj.
Chi yalon ix kꞌopo:
3 Jaꞌ naj jin camcꞌulnebꞌil xol ebꞌ achꞌe, laan yili naj jaxca junoj teꞌ mansan eya xol-laj teꞌ teꞌ. Manxa jantajoj swatxꞌil wey chotan yenel teꞌ, caw chiꞌ sloꞌi sat teꞌ chi wabꞌe.
4 Jix jin yiꞌontoj bꞌey snail bꞌey chi waꞌxi miman loꞌbꞌe, yetoj wal scamcꞌulal jix oc tꞌanan win.
5 Akꞌ an tajin uva ey jin yet chi oc wip; cha wakꞌon teꞌ mansan jin loꞌ, yet chi sicbꞌi jin cꞌul yu, yutol caw ian chin camel jaach wocheni.
6 Aoctoj ja qꞌuexan kꞌabꞌ yalan jin jolom, jaxa ja watxꞌ kꞌabꞌ chi oc lakꞌan win, ẍi ix.
Chi yalon naj achꞌe:
7 Jex kꞌopo a Jerusalén, chi wakꞌ bꞌina noꞌ xutx scꞌultajil che bꞌey xol-laj teꞌ xol jin kꞌane chi wal ey jex, tol cꞌam ojabꞌ che tenel sweyan ix jin camcꞌulnebꞌil tiꞌ, masantaꞌcꞌal jaꞌ ix oj yochen janicꞌ oj el sweyan, ẍi naj.
Junxa Yet Scaabꞌ Tujan Bꞌit
Chi yalon ix kꞌopo:
8 ¡A… lalan sjul naj jin camcꞌulnebꞌil! Chi wabꞌ yoc yul snukꞌ naj; caw chi a tꞌujna naj yet chi tit bꞌey sjolomlaj wonan. Chi a tꞌujna yet chi eyol naj bꞌey txꞌotxꞌ tzalquiltaj.
9 Jaꞌ naj jin camcꞌulnebꞌil tuꞌ, laan naj jaxca noꞌ scꞌultajil che, ma jaxca junoj noꞌ yuneꞌ scꞌultajil che. Ey xacꞌal ecꞌ yinlaj na, lalanxa sjul tꞌananoj bꞌey swentanail na, catuꞌ tꞌanan xacꞌal octej bꞌey yul-laj jolan.
10 Jix yalon naj jin camcꞌulnebꞌil ey jin jaxca tiꞌ: Jaach jin camcꞌulnebꞌil, aan waanoj, titan jin cꞌatan, yutol caw ochebꞌil jaach wu.
11 Ilaꞌ tol jix ecꞌtoj nabꞌilkꞌinal, tuxa jix too nabꞌ.
12 Eyxa an xumac teꞌ xol-laj teꞌ, tuxa chi jul scꞌual yet chi oc bꞌit, chi xa kabꞌ yoc yul snukꞌ noꞌ cuateꞌ.
13 Eyxa sat teꞌ higo, sukꞌukꞌi xacꞌal yel sabꞌ an uva. Jaach kꞌopo tol camcꞌulnebꞌil wu, aan waanoj, toon yin eymanil, yutol naꞌan jaach cꞌal wu, ẍi naj ey jin, ẍi ix.
Chi yalon naj achꞌe:
14 Jaach jin camcꞌulnebꞌil, laan jaach jaxca noꞌ cajmu chi scꞌubꞌa el sbꞌa bꞌey satlaj chꞌen. Txꞌox ja bꞌa ey jin, chi woche chi wabꞌ yoc yul ja nukꞌ. Caw watxꞌ xacꞌal ja wili, caw watxꞌ xacꞌal yoc yul ja nukꞌ chi wabꞌe.
15 Ujtewej noꞌ waax yetoj cꞌal yuneꞌ, tol chi yetne el an uva noꞌ, an lalanto yakꞌon xumac, ẍi naj.
Chi yalon ix kꞌopo:
16 Yet jin xa naj jin camcꞌulnebꞌil; wet cꞌal pax naj, chi ilwi meꞌ naj bꞌey xol-laj an xumac teꞌ.
17 Yajbꞌan cꞌamto chi jul kaꞌeꞌ yet skꞌinibꞌ, yet cꞌamto chi sajbꞌi, meltzaantej yin eymanil jaach jin camcꞌulnebꞌil. Laan ojabꞌ cha wute ja bꞌa jaxca junoj scꞌultajil che, ma jaxca noꞌ achꞌe scꞌultajil che tuxa cꞌal chi a tꞌujna stit bꞌey txꞌotxꞌ tzalquiltaj, ẍi ix.